باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و هەشتا و پەنجەمە
حەزرەت و ئەسحابەکۍ، ڕاو سارایشان تەی کەردە، جە دوور چەمشان کەوت بە سیایانێ کە ڕۊشنایێش چەنە دیاربۍ، وېشا یاونا لاش. وەختێ نیشتېرە ئەسحابەکۍ داواو ئاو و خورماواشا کەرد، چونکم فرە ئاوراشا بۍ، بەڵام خاوەن یانە (سیاماڵ) ماچۊ: ئېمە خەڵکێ مېمان دۊسېنمۍ، گەر یانەمانە زاڎ بۊ، ئانە بۍ وەرانوەر ئارېنېش پەی خزمەتیتا، بەڵام وېتا مزاندۍ ئېساڵ واران نەواران، قووت یانەمانە نېیەن. حەزرەت سەرنجەش دا، وەراوەرشاوە گامېشێ بەسیابێ، هەواڵش جە ساحیب یانەی پەرسا، ئاڎییچە ماچۊ: چونکم لەوەڕ نېیەن، گوانېش هاڵیېنۍ، بەڵام حەزرەت ڕوخسەتش واست، بە دەسی موبارەکش دۊشتەش، گوانېش پەڕ شۊتۍ بیۍ.
دیسان خەیمەیێ دیارەن جە دوور
درەخشان تەرەن جە شەمعی کافوور
خەیمەی عاتیکە بنتی خاڵە بۍ
وە قەومی ئەو زەید یەکسەر واڵەبۍ
خەیلێ سەخا تەبع شیرین ڕەفتار بۍ
زەعیفەی دەوران ڕووی ڕوزگار بۍ
وە ئوممی موعید مەبەردەن نامش
عالەم مەنۊشا شەربەت نە جامش
سالاری ئەو هوز گرد نیک و بەڎ بۍ
زاهیرەن زەوجەی ئیبنی موعید بۍ
حەزرەت نەوخەیمە پا ئاوەردەوە
خەیمەگاو خەیمە ئاوا کەردەوە
خەیمەی عاتیکە ئەعلای نازەنین
پیا بیی بە وار فەخرلمورسەلین
تەبەق تەبەق نوور جە سەردا مەوەشت
خەیمە پەڕ نوور بیی چوون ڕەوزەی بەهەشت
یارانی حەزرەت جە نا تەوانا
جە گورسنەگی کەردشان هانا
واتشان: نانێ، یاخۊ خورمای تەڕ
بفروشین پېمان بسانین بە زەڕ
ئومی (موعید) هەم ڕوو کەرد وە یاران
واتش: چوون واران ئېساڵ نە واران
چونکم قەحتییەن ئەرزاق نەدارین
وېمان وە عەسرەت ئەوقات مەویارین
ئەر تەعام مەبیی منەت مەبەردم
بە خوڎا زیافەت ئېوە مەکەردم
هەنی بە خرید و بە فروش نەبۍ
موحتاج بە ئیزهار واتەی تۊش نەبۍ
خواجەی کائینات دیش پیرە مێشێ
جە وەراوەرشان نیشتەن وە پێشێ
جە گوشەی خەیمە پەژارەش بەردەن
چوون خەتاباران تەناف نە گەردەن
فەرما ئەو مېش بەو تەور ئەسیرەن
داخۊ شیردارەن یا خۊ بۍ شیرەن
ئومی موعید وات: ئەر گوسفەندە
ئەو لنگ لاغرە گلە وامەندە
جە زەعیفی حاڵ جەستەش پەڕ دەردەن
خەیلێوەن گلەی سەحراش نەکەردەن
ها وەختەن ئەڕواش بشۊ دەربەدەر
جە کۊ شیر دارۊ ئەی خاکش وە سەر
حەزرەت فەرماوا: ڕوخسەت بدەر پېم
بشوو بدوشووش من بە دەستی وېم
واتش: ڕوخسەتەن بەڵام نەدارۊ
سێ ساڵەن نەبی، چوون مەبۊ ئارۊ
حەزرەت تەشریف بەرد وە لای گوسفەند
ئیسمی پاکی زات شای بېزەواڵ وەند
دەسی موبارەک شەریفی وېش بەرد
نەرمی ئیشارە بۊستانی مېش کەرد
وە مەیلانی حەقق یەکتای بۍ نەزیر
دەمارش یەکسەر گرد پەڕ بیی جە شیر
بەو تەور سەنگین بی، جە شیر بوستانش
ڕای موری نەمەن جە بەینی ڕانش.[1]