باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و هەشتا و یەرەمە
دماجار سوراقە بەبۍ نەسرەت مەند، هاناش پەی حەزرەتی بەردە، داواو یارمەتیش کەرد، حەزرەت نزاو خەیریش پەی کەرد، ئەسپەکەش ڕزگار بی، حەزرەت پەنەش فەرماوا: گېڵۆ، بەڵام گەر ڕانە هەرکەسێت ۋینا نەواچی ئاڎېم دیېنۍ.
سوراقەی قاتڵ مەند وە بۍ نەسرەت
هانا کەرد هاناش یاوا وە حەزرەت
وات: یا محەمەد بە دوعای تۊ بۍ
تاسیری ئەنفاس سیحرگای تۊ بۍ
شەرمەند و خجڵ نادان و حەشەم
بویەر جە تەقسیر بدەر نۊ بەخشەم
هەر کەس جە عەقەب تالیب وە تۊ بۊ
ئەر شېری غەران یا دېو یا کۊ بۊ
یەقین مەبەرووش چەنی وېم وە پەس
هەنی کەس بە تۊ نەبۊش دەس ڕەس
تیری جوعبەی وېم ببەر چەنی وېت
هەرچیت لازمەن چەویان مدە و پېت
فەرما: من موحتاج نیم بە ماڵی کەس
پەیم وەسەن کەرەم فەردی فەریاد ڕەس
غەرەز سوراقە فراوان لاڵا
توزی پای ناقەش وە دیڎە ماڵا
دیسان حەزرەت وات: یا دانای داوەر
ئەگەر سادیقەن نەجاتش بدەر
دوعاش قبووڵ کەرد پادشای بېباک
ئەسپی سوراقە بەر ئاما جە خاک
سوراقە عەرز کەرد سەخت نەبۊ لېتان
زاد و مەتاعیم بوەن پەی وېتان
حەزرەت هەنی هیچ قبووڵ نەکەرد لېش
فەرما من زاد و مەتاعم پەی چېش
ئەر کەسێ ئاما جە بەد ئەندېشان
واقیعەی ئېمە مەواچە پېشان
سوراقە عەرز کەرد یەک ئامان نامە
مەبۊ کەرەم کەی تۊ وەی غولامە
حەزرەت ئەمرش کەرد عامری بۍ ئەندېش
مەرقووم کەرد جە پوست پارە دا وە پېش
سوراقە دەردەم هیمەتخواهیی کەرد
وە سەڎ شاڎیی و زەوق ڕوو وە پەس ئاوەرد.[1]