باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و هەشتاهەمە
دمای موددێ، حەزرەت بېڎار بییۆ، دەروونش مەگریا پەی ئاوۍ، ئەبوبەکر کووپێ شۊتش پەی پېڎاکەرد، بەردش پەی خزمەتیش، دەمی موبارەکش بەرد پەی شۊتەکەی، نۊشش کەرد، ئەبوبەکر بە حەزرەتیش فەرماوا ڕاگەمان دوورەن، پەڕ مەتەرسییەن، مەشۊم پەلەکەرمۍ، دیسان سوارۍ بیۍ و جمێرە. قوڕەیشیەکۍ بەبۍ مدارا، عەرەبە عەشایرەکۍ مېیانو مەککە و مەدینەیشان هاگاڎارۍ کەردۍ، هەرکەس محەمەد و ئەبوبەکری، چەنی هەر نەفەرێ چەنیشان بگېرۊ پەیمان، یان بکشۊشان، ئانە سەڎ حوشترۍ خەڵاتشەن، هەرچیش گەرەکبۊن خەڵاتش کەران.
عەرزکەرد یا ڕەسوول دېرا ڕا دوورەن
جای مەدار نېیەن تەعجیل زەروورەن
دیسان حەزرەت و سیدیقی ئەکبەر
سوار بین وە پشت ناقەی کوپەیکەر
عەبدولڵا و عامر هەردوو بین سوار
ڕاهیی بین وە شۊن موستەفای موختار
وشتران چوون تەیر وە دەو نیشت وە باڵ
ڕاهان تەی کەردەن وېنەی بای شەماڵ
جەو تەرەف قوڕەیش ئەعیان و ئەشراف
حوکم کەردشان وە هەر چوار ئەتراف
عەرەبی عەشایېر گرووی سەڎ وېنە
مەخلووقی مابەین مەککە و مەدینە
هەرکەس محەمەد چەنی ڕەفېقش
بووبەکری سەروەر یانی سیدیقش
هەرچی سەحابەیێ شین چەنی ئەو
قەتڵشان بکەن وە دەوانی دەو
هەریەک سەڎ وشتر خەڵات بەهاشەن
پېش مەدای هەرچی ئەو تەمەڼاشەن
تاکە ئېد خەبەر جەو زېد وماوا
وە لای سوراقە بن مالیک یاوا
بەڵام سوراقە مەردی ناخار بۍ
دایېم موبارەزەی هەزار سوار بۍ
شەخسێ وات: ئارۊ من نە ڕاهی گوزەر
مەکەردم نیگاە سارا و دەشت و دەر
چن نەفەر وەی ڕەنگ وە تاو و تەعجیل
مەشین وە ڕاوە بەبۍ قال و قیل
جە ڕاگەی ساحیل چن کەس وېنەی باد
وېیەردەن بېباک وە خاتر گوشاد
بەو تەور ناقەشان هەردوو وە دەور بین
هەر محەمەد وە یارانی ئەو بین
سوراقە واتش: تۊ خاوت بەردەن
ئەوان بەو ڕاگە گوزەر نەکەردەن
پەی ئېڎ ئەگەر ڕۊ، ئەگەر هەم شەو بۊ
فەتحی ئەو کارە وە دەستی ئەو بۊ
ئەوش فریودا وېش هەم شیی وە ماڵ
پەخش کەرد وە سەردا لۊی چەتفە و عەگاڵ.[1]