باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و حەفتا و حۆتەمە
کافرەکۍ وەردەمو مەڕەو سەورینە جەمۍ بیۍ، کابرای شارەزا ماچۊ: محەمەد و ئەبوبەکر ئینێ چی مەڕېنە، بەڵام بە فەرمانو قادری وەڵۍ ئانەی ئاڎۍ یاوا وەردەمو مەڕەکۍ، فەرمانش کەرد بە پەسپەسەکڵۍ پەی تەڼەی دەموو مەڕەکۍ، هەم فەرمانش کەرد بە کاواترۍ بە وەشکەردەی هېلیانۍ پەی ئانەی هېڵۍ کەرۊن وەردەمو بەرەو مەڕەکېنە، وەروئانەی قوڕەیشیەکۍ باوەڕشان بە کەسە شارەزاکەی نەکەردە کە واتش محەمەد و ئەبوبەکر ئینێ دلۍ مەڕەکېنە، واتشان: چڼەها ساڵەن دەمو ئا مەڕۍ تەنیان، ئانە کارێ تازە نېیەن.
چەودەم موشریکان تایەفەی غەددار
یەکایەک جەم بین نە قاپی ئەودار
ئەبو گورز واتش: بکەن نەزارە
بە خوڎا مەتڵووب ها نە تۊی ئەی غارە
گوزەرگای موری نېیەن نەمەندەن
سەڎ ساڵ جەی وەرتەر عەنکەبووت تەندەن
هېمای محەمەد نامان بە وجوود
دەربی ئەی غارە با ساخن مەسدوود
کەس نەشین وە تۊی ئەندەروون ڕاهیی
بەیزەی کوتەر مەدۊ گەواهیی
هەرچن ئەبوگورز مەردی بەڎچارە
واتش: محەمەد ها جە ئەی غارە
قوڕەیش بە ئەو کەی نەکەردەن باوەڕ
ئەگەر محەمەد مەکەردش گوزەر
مەشکستەن وە هەم قاپی مەبی واز
خۊ بەشەر نەبېیەن بکەرۊن پەرواز
گفتوگوی قوڕەیش قەومی بەڎ گەوهەر
سەداشان مەشیی وە لای پېغەممەر
سیدیقی ئەکبەر خەیلێ غەم وەردش
وەسوەسەی عەزیم نە دڵ ئاوەردش
حەزرەت وات: ڕاسەن یە ڕاگەی ئېمەن
بەڵام مەتەرسە خوڎا کەریمەن
غەرەز بە مەیلان فەردی فەریاد ڕەس
زاتی بۍ زەواڵ پەی بۍ کەسان کەس.[1]