باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و سی و چوارەمە
حەزرەت جە ڕاو گېڵایۆشەنە یاواوە بە حەزرەتو مووسای، عەرزش کەرد کە زاتو حەققی پەنجا ڕکاتۍ نماش فەرزەکەردېنه سەرو ئوممەتەکەیم، بەڵام مووسا فەرماواش: من وەڵتەر جە تۊ خەڵکم ئەشناسان، بەنی ئیسرائیل ئوممەتو من بېنۍ، ، بزانە تەواناو پەنجا ڕکاتاشا نېیەنە، مەجبوور بە قەرز مەناوە سەرشان.
جە وەقتی عەودەت ڕاگەی خەوف و بیم
جەو دەمدا یاوا بە مووسای کەلیم
تاکەلیمەڵڵا عەرزی حەزرەت کەرد
پەرساش پەی ئوممەت فەرز چېشت ئاوەرد
وات: پەنجا ڕکعەت یەک شەو و ڕۊ
ئەدای نمای فەرز مەعلووم بۊ جە تۊ
مووسا وات: موشکیل مەزانە ئاسان
من خەڵکم جە تۊ زووتەر شناسان
بەنی ئیسرائیل ئیسە گرد مەردەن
من گردم یەکسەر، ئیمتیحان کەردەن
ئوممەتانی تۊ چوون ئاخر بەرەن
جە باقی ئوممەت گرد زەعیف تەرەن
هەرگیز نەداران قوەی پەنجا فەرز
تا مەحشەر پېشان گرد مەبۊ وە قەرز
بشۊ دماوە جە قاپی داوەر
وەهەر سوورەت بۊ تەخفیز باوەر
حەزرەت دووبارە گېڵا وە ئەو پەس
دیسان پەنا بەرد وە زاتی ئەقدەس
عەرز کەرد قاپی پادشای غەففار
واتش: ئوممەتم زەعیفەن بېچار
نەداران قودرەت مەعاشی وېشان
پەنجا فەرز نماز زیادەن پېشان
حەقق فەرما (بیست) فەرز تەخفیزشان بۊ
بینا بە خاتر هومایونی تۊ
حەزرەت سوجدەی زات شای بۍ زەواڵ بەرد
هەم وەلای مووسا موعاوەدەت کەرد
دیسان پەرسا لېش کەلیمی کوی توور
واتش: چېشت کەرد جە لای شای غەفوور
فەرما: کەرەمدار چەنیم کەرەم کەرد
میقداری بیست فەرز تەخفیفم ئاوەرد
هەم کەلیموڵڵا وات زیادەن هاڵا
دیسان تەشریفت بشۊ وە باڵا
ئەرچن پەی تۊ مەبۊ بە زەحمەت
بەڵ هەم باوەری تەخفیف پەی ئوممەت
غەرەز تا سێ جار شای گەردوون بەیدەق
تەشریف بەرد وە بان قاپی بەرزی حەقق
شای بوراق سوار بە چن دەرد و ڕەنج
ئاخر پەنجا فەرز یاونا بە پەنج.[1]