باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و ویسەمە
باس جە شەو ڕەوی (میعراج) ی کەرۊن، جوبرەئیل ئاما خزمەتش، تەڵەبو خوڎایش پەنە یاونا پەی ئاسمانی، جوبرەئیل سینەو حەزرەتیش شەق کەرد، دڵ و دەروونشان بە ئاوەو زەمزەمی شت، دماتەر بەردشان پەی (مەروە و سەفا) ی،
شەوێ شەریفتەر جە لەیلەتولقەدر
جە فریشتەی خەیر شای ئەسحابلبەدر
حەزرەت جە سەرای ئەمهانی پاک
فارغ بیی جە زیکر فەردی تەنیای تاک
خاتر حەزین بی جە گومڕاهیی قەوم
مەشغووڵ بی جەو دەم بە ئەسبابی نەوم
شیی نە جامەی خەو چوون سەوڵی ساوا
ناگاه وېنەی بەرق جوبرەئیل یاوا
وات: یا محەمەد حوکمم ئاوەردەن
پادشای شاهان تۊ تەڵەب کەردەن
فەلەک ئینتیزار پاپوسی پاتەن
مەلایەک یەکسەر چەمەڕای ڕاتەن
قم بسم الله الرحمن الرحیم
ڕۊشن کەر ئەفلاک تا عەرشی عەزیم
زەمین وە پابوس، پات پەڕ نوور بۊ
سەنگی هەردان گرد وە سورمەی توور بۊ
جوبرەئیل جە نۊ، وە ئەدەب دەس بەرد
سینەی موبارەک حەزرەت هەم شەقق کەرد
میکائیل دڵ و دەروونش کەم کەم
شتشان تەمام بە ئاوی زەمزەم
مەملووء کەردشان یەکسەر وە حیکمەت
جە ئەسڵی ئیمان ئەمری نبۊوەت
خولاسە ئەو شەو شای خەیرولبەشەر
جە حوجرەی شەریف بەردشان وە بەر
بە چن شاڎی و زەوق بە مەیل و وەفا
تا تەشریف بەردەن وە (مەروە و سەفا)
حەزرەت نیگا کەرد بوراقی چوون بەرق
نوورینتەرجە نوور شوعلەی شەمسی شەرق
ڕوانتەر بە ڕەفت چوون بەرقی ئەنجەم
ئادەمی سوورەت شوخی تاووس دەم
زین جە زېڕچە، سەرزین حوللەی نوور
ئالای مورەسسەع نم دادەی کافوور
کەفەڵ پۊش جە لای جەواهیر کاریی
سینەبەند مەفتوول تافتەی مرواریی
ڕیکاب جە ئەڵماس، بەند ڕیکاب گەوهەر
زەبرتەنگ تڵای دوو قاڵی ئەحمەر
لیجام دانەی بەند بېعەیبی ئاڵا
کارخانەی لا ڕەیب ئوستادی باڵا
باڵ چوون زوڵف حور، سم چوون قورسی خوەر
ساق چوون سیمی ساق ناڵ وېنەی قەمەر
دوو باڵ وېنەی باڵ بەیداخی شاهی
بە یەک دەم تەیی کەرد جە مەه تا ماهی.[1]