$بڕوخێ ئۆپۆزسیۆنی بوکەڵە، بمرێ سەرۆکی داهۆڵ!$
#ڕێبین ئەحمەد ڕەشید#
سیستمەکانی بەڕێوەبردن هۆکاری سەرەکی درووستبوونی شۆڕشەکانن. شۆڕش کردەیەکی ئانییە، بە پێچەوانەی قسەکانی سەرۆکی نەوەی نۆێ کە دەڵێت شۆڕش دەکەم، دەشێ لایەنێک یا کەسێک بقۆزێتەوە ، ئاڕاستەی بکات و لێی بخوات بەڵام بە دڵنیایی شۆڕش شتێکە خۆبەخۆ کڵپە دەسێنێت و کەسێکی دیاریکراو هەڵناسێ بە ئەنجامدانی. شۆڕش خۆی درووستدەبێت، درووستناکرێت.
گەندەڵترین و دزترین سیاسیی کوردستان بکە بەفەرمانڕەوای وڵاتێکی وەک فیلەندا ناتوانت دز بێت، لەلایەکی دیکەوە سەرڕاستترین وڕاستگۆترین سیاسیی ئەوروپیش بهێنەرە کوردستان حوکم بکات ناتوانێت گەندەڵ و دز نەبێت. هۆکاری ئەمە دیارە سیتسمی بەڕێوەبردنە نەوەک جێگۆڕکێی کەسایەتی سیاسیی و گۆڕینی فڵان بە فیسار.
حاکم و کاربەدەستان هۆکاری سەرەکی درووستبوونی شۆڕشە خوێناوییەکانن. هیچ شۆڕشک نییە لەم دونیایەدا توانیبێتی عەدالەت و چاکسازیی و دیموکراسیی بەدوای خۆیدا بهێنێت. ئەوەی شۆڕش پێویستیی پێی هەیە تۆپەڵێک ڕق و قین عاتیفەی شێلدراوە بە ناعەدالەتیی و زوڵم، یەکەمین شریقەی ئەم تەقینەوەیەش فراوانبوونی مەودای نێوان چینەکان دەیتەقێنێتەوە. کاتێک چینێکی کەم لەئاسمان خودایەتیی بکات و زۆرینەی ڕەهاش لە چاڵ و دەهلیزە تاریکەکانی ژیاندا ڕێگای لی ون بووبێت و نەتوانێت مشتێ خۆر بەکرێ بگرێ بۆ ڕووناککردنەوەی تاریکیی ژیانی، جگە لە شۆڕش نابێت چاوەڕێی هیچی دیکە بکەین.
هیچ یەکێک لەشۆڕشەکانی مێژوو پێویستیان بە لۆژیک و ژیری نەبووە و ناشیانبێت. ئەو وێرانەیەی گڕو کڵپەو عاتیفەیەک سەرڕێ دەخات بە عەقڵی دەیان فەیلەسوف سەرڕێناخرێت، دیارە شۆڕشیش پێویستی بە وێرانە و بێ سیستمی و کەیئۆسە ، زۆری دەوێت تا شۆڕشگێڕان دێنەوە هۆش خۆیان و بە زوبانی حاڵ و قاڵیش ئیقراری ئەوە دەکەن کە ئەوەی ئەمان کردویانە دیکتاتۆر و زاڵمەکەی پێش ئەمان نەیتوانیوە بیکات: ئەوەی ئێمە کردمان بەعس نەیکرد؛ دانپێدانانی جێگری سەرۆکی هەرێم جەعفەر مستەفا بوو گۆڕینی دیکتاتۆرێکی پۆستاڵ لەپێ بە دیکتاتۆرێکی کڵاش لەپێ و دیکتاتۆری خاوەن کورسی بەکورسی چارەسەر نییە.
لە سیستمە دیکتاتۆر و داپڵۆسێنەرەکاندا هیچ ئەگەرێکی چاکسازیی نییە. چاکسازیی لە هەموو بارێکدا دەبێتە هۆی بڵێسەسەندنی گڕی شۆڕش و تارومارکردنی پێکەوەیی تەڕ و وشک.
بوونی ئۆپۆزسیۆنی چالاک و سیستمی دیموکراسیی باش و دادگای عەدالەتخوازی بێلایەن بۆ ڕێگریکردنە لە گۆڕین و چاکسازییکردن بە شۆڕش. زۆری ویستووە تا گۆڕینی سوڵتانێک بە سوڵتانێکی دیکە بە خوێن نەبێت، ئەمە گەشەسەندوویی مرۆڤ دەردەخا لەمڕۆدا.
بە پێچەوانەوە لە سیستمە دیموکراتەکاندا هیچ ئەگەر و پۆتەنسیەلێک نییە بۆ شۆڕش، هەموو ئەگەرێکی شۆڕش بە قازانجی سیستمەکە و بە چاکسازیی بۆ کۆی سیستمەکە و خەڵک کۆتایی دێت.
قسەکەی من لەسەر ترسنۆکیی و زەبوونیی و بێ ڕوئیایی و پرۆکسییبوون و ژیری لاوازیی ئۆپۆزسیۆن نییە، قسەکە لەسەر دەسەڵاتێکی بێباکە بەرانبەر داهاتووی خۆی. یەکێک لە ناشیرینترین کارەکانی دەسەڵات و سستمی حوکمڕانی لەم وڵاتەدا ئەوەیە بەردەوام ئۆپۆزسیۆنێکی لەخۆی ناشیرینتر و گەڕوگولترمان پێشکەش دەکات.
دەبوو دەسەڵات بۆ مانەوەی خۆشی بێت دەیان حیزب و دوکانی سیاسیی جیاواز لەخۆی بکاتەوە کە تەرویج بە ئارگیومێنتی ئۆپۆزسیۆنبوون بدەن، لەکاتی تەنگانەدا هەڵوێستی ڕادیکاڵی لە دژ بنوێنێن، بۆ ئیدامەدان بە مانەوەی خۆی و درووستنەبوونی شۆڕش و قڵپنەکردنەوەی سیستمەکە بەسەریدا جاروبار دژی خۆی و هەڵوێستەکانی بیانجوڵێنێت. نەک سەرۆکی گەورەترین حیزبی ئۆپۆزسیۆن ڕاسپێرێت تا بڵێت وەرن شەربەت بخۆن، گەر خۆتان نەتانتوانی �%A