باخچێوە بېگەرد
نویستەی: میرزا ئۆلقاڎرو پاوەی
بەشۍ: شەسس و حۆتەمە
میرزا ئۆلقاڎرو پاوەی، ئانەی بەیان کەرۊن، کە جە سەرەوەختو پېڎابیەی (محەمەد) نوورو کائیناتی، لاو کاهینو ساحېر و پیا ئاقڵەکاوە ڕۊشن بۍ، ئاڎۍ خاس زانېنۍ ئامای پېخامئاوەرو ئاخر زەمانی نزیکەن، پەوکەی وەرمەکەو عەبدولموتەلیبیشان بە قیمەت زانا.
کەسێ نەواچۊ، ئینە چە عەقڵەن
جە ئیبنی عەبباس، وەی تەورە، نەقڵەن
ئەو ڕۊ، حەقیقەت، نووری محەمەد
حەبیبی ئەزەڵ، بەرگوزیدەی حەقق
یاوا، وە بەتن، ئامینەی وەهەب
نمایان، بۍچوون، ڕۊشنی کەوکەب
جوملە کاهینان، کەهانەت، ئاسار
گرۊی ڕەهبانان، فەراسەت، شیعار
ئەهلی مونەجیم، کەوکەب، شوماران
ساحیرانی دەور، سەلیقە داران
گرد، موتەلیع بین، عەرەب، تا عەجەم
مەغریب، تا مەشریق، بۍ زیاڎ و کەم
واقیعەی زوهوور، خواجەی کائینات
گرد خەبەر، داشان، جە گرد ئەقلیمات
باقی ئەجناس، وەحشی و تیوور
ئەغنام و ئەشباح، مورغی ماهی و موور
گرد وە یەکدیگەر، بەشارەت داشان
ئەسبابی تەرەب، شاڎیی، نیاشان
عەرەز، حەیوانات، قوڕەیش و حیجاز
زەریف، وە یەکتر، مەکەردەن، ئاواز
واتشان، دنیا، ها وەختەن یاوا
بە نووری حوزوور حەزرەت، بۊ، ئاوا
دایەی محەمەد، سەفا، مەویارۊ
جە بەتنی پاکش، محەمەد دارۊ
یەک یەک، مەواتەن، خۊشا، بەحاڵش
خەیلێ بوڵندەن، پایەی ئیقباڵش
وەقت زایدەن، ئەعلا، جە حوزوورش
دنیا، مونەوەر، یەکسەر، جە نوورش
خوڎا، عادلی محەمەد ئەمین
سیراجەن، پەی فەرق، ئەهلی سەرزەمین
یاران، باوەران، دڵ، خاس دەن، وە گۊش
سەڵەوات، پەی حەزرەت، مەکەن فەرامۊش.[1]