باخچێوە بېگەرد
ئاماڎەکەرڎەی: ئەسعەد ڕەشید
بەشې سېڼزەهەمە
میرزا ئۆلقاڎر باس چانەیە کەرۊن هەکە بەعزێ جە تایفەو جنەکا ئیمانشان ئاردەن و سەرو دینو خوڎای ڕەفتار مەکەران، واتا نیمەشان کافرې و نیمەشان موسوڵمانېنې، هەم باسو شەیتانی مەکەرۊن هەکە چەنی تۊقێ جە غەزەبی کریێنە ملش، تاکو ئاخر زەمان ئینا پۊشۆ.
بەعزێ (بن جانی) ئیمانشان ئاوەرد
جە مەلایکان، وېشان پەنهان کەرد
جە واتای ئیسەی، جوڼی، ئەوانەن
نیمێ کافرەن، نیم، موسڵمانەن
حەقق فەرما، ئیبلیس علمش زیادەن
عەقڵی (بن جانی) گشت، بە ئەو دادەن
دنیا، هەم، جە نۊ، حاڵی کەردشان
ئیبلیس وە ئەسیر ، بە زۊر بەردشان
وە ئەمری فەرمان، دانای بېهتەرین
بەردشان، وە بان، چەرخی چوارەمین
یەک سەومەعەی خاس، وېنەی قورسی خۊوەر
پاکیزە، بې عەیب، پۊختە، موڼەوەر
قەراردان، پەرېش، پەی مەکتەب خوانی
بی بە مەدرەسە، زومرەی ڕۊحانی
نامشان نیا، مەلیکولکیبار
یەعنی موقەڕڕەب، قاپی شای غەففار
تا وەزعییەت، فەراهەم ئاوەرد
خەیلێ تەکەببور، پەی وېش حاسڵ کەرد
بەلا نەزاناش، بینای بې ئەندېش
تەوقێ، جە لەعنەت، سازیان پەرېش
جە لەوحەلمەحفووز، پەرېش کەرد تەقدیر
تەقدیری ئەزەل، نەدارۊ، تەدبیر
ئەبەدیی، دۊزەخ، دایېم، جاش مەبۊ
ناری زەمهەریر، ئارامگاش مەبۊ
هەر دەم مەواتەن، بە موقەڕبان
توقێ، جە لەعنەت، کریان، ئاوېزان
یەکێ موقەڕەب، بارەگای عیزەت
گرفتار مەبۊ، بە تەوقی لەعنەت
بادا، نەزانۊ، تاکو چېش مەیۊ پېش
تا ئەوڕۊ ، هەرچی، ڕوو مەدۊ لېش
با هەر مەشغووڵ بۊ، تا چن هەزار ساڵ
شاڎی دەماغش، با نەبۊ بەتاڵ
باز هەم، جەتەقدیر، گەردوونای گەردوون
ئەم شەو تا سەحەر، چوون مەبۊ چوون.[1]