Lêkolîner Omer Guneş û Îbrahîm Şahîn ev demek dirêj e li ser dengbêjan û dengbêjî dixebitin, niha di vê rêzeya “#Antolojiya Dengbêjan#” de pirtûka sêyemîn derxistin. Pirtûk bi navê “#Dengbêj Huseyno#” ji Weşanxaneya Nûbiharê derket.
Her du lêkolîneran berî vê du pirtûk derxistibûn bi navê “#Dengbêj Reso#” û “#Dengbêj Şakiro#”. Di her du pirtûkan de li ser jiyan û klamên wan bi berfirehî sekinîbûn û niha jî li ser Dengbêj Huseyno pirtûka xwe amade û pêşkêş kirin.
Her du lêkolîneran li ser xebata xwe wisa gotine, “Di vê xebatê de armanca me ew bû ku em ji bo her cure xebat û lêkolînên ku di pêşerojê de li ser dengbêjiyê kirin, bingeheke têr û tijî amede bikin. Her kesê ku bixwaze lêkolîn li ser dengbêjan û kilamên dengbêjiyê bikin bila li ber destê wan xebateke antolojîk ku ji hemî kilaman û danasîna hemî dengbêjan pêk tê hebe. Em bi vê mebestê ketin rê.”
Di vê çarçoveyê de wan 20 salan kaset dane hev ku nêzî 400 kasetên dengbêjan gihîştine hev. Piştî vê jî wan dest bi deşîfrekirina kasetan û sazkirina pirtûkan kiriye. Û niha pirtûka sêyemîn li ber destên xwendevan û hezkiriyên dengbêjan e.
Guneş û Şahîn di van xebatan de pirtûk li ser 5 bingehan sazkirine, “Kilamên Serhildanê”, “Kilamên Evîniyê”, “Klamên li ser şer û pevçûnên navxweyî-eşîrî”, “Kilamên li ser xwezayê, ramanê, jiyanê” û “Destan”. Lê wisa gotine, “Ji ber ku di nav kilamên Dengbêj Huseyno de destan tuneye, ev beş wek kategoriyek di naveroka wê cildê de cih nagire.”
Û çend agahiyên li ser jiyana Dengbêj Huseyno: Ew di sala 1936’an de li gundê Mahbûba yê girêdayî navçeya Motka hatiye dinê. Û di 8’ê avrêla 2001’ê de dimire û cenazeyê wî li gundê wî tê definkirin. Ligel agahiyên berfireh ên li ser jiyana Dengbêj Huseyno, agahiyên li ser kilaman û gotinên kilaman jî di pirtûkê de hene.
- Antolojiya Dengbêjan 3: Dengbêj Huseyno / Amadekar Omer Guneş û Îbrahîm Şahîn / Nûbihar / 392 rûpel / 2021
[1]