F.HR.SY qutkirina ava stasyona Elokê ji ser Hesekê û gundewarên wê ji hêla dewleta Tirk a dagirker ve şermezar kir û bang li civata navneteweyî kir ku sînorekî ji sûcên dagirkeriya Tirk re deyne. Her wiha da zanîn ku li gorî qanûna navneteweyî dewleta ku li ser peymanên navneteweyî yên mirovî îmze kiriye û îmze nekiriye neçar e rêzê ji qanûnên navneteweyî re bigire.
Desteya Rêveber a Fedrasyona Sûriyê ya Mafên Mirovan raporeke li ser sûcê qutkirina avê ji ser şêniyên bajêr û gundewarên Bakur û Rojhilatê Sûriyê ji hêla dewleta Tirk a dagirker ve amade kir û sûcên ku dewleta Tirk a dagirker û hevkarên wê li dijî welatiyan pêk tîne şermezar kirin. Her wiha bang li civata navneteweyî kir ku sînorekî ji van sûcan re deyne ku serweriya Sûriyê bin pê dike, kedên çareyên siyasî û têkoşîna li dijî terorê li Sûriyê qels dike.
Di raporê de wiha hate gotin: Hêzên dagirkeriya Tirk û hevkarên wê; muxalefeta Sûriyê ya çekdar ava stasyona Elokê ku li Serêkaniyê ye li ser Hesekê û gundewarên wê qut kir. Stasyon bi rêya xetên binerd avê dide gelek bajarê û gundan; ji gundên Zîbe, Dawûdiyê û Medbe bigire heta bi Til Temir û gundên derdorê, Hesekê û gundên wê yên li xeta rojava. Bi wê re herêma Bakur û Rojhilatê Sûriyê li kêlek astengiyên jiyanê li beramber astengiyeke din e.
Di raporê de hate destnîşankirin ku “li Bakur û Rojhilatê Sûriyê zêdetirî 4 milyon welatî hene, di nav de zêdetirî milyonek kçberên ji hemû herêmên Sûriyê hene. Pêdiviya wan bi xizmetên debarê û tenduristiyê hene. Li 11 kompan zêdetirî 100 hezar koçber hene, li kêlek wê jî bi hezaran malbatên çekdarên biyanî yên rêxistina DAIŞ´ê li kampa Holê hene.”
Di raporê de hate diyarkirin ku her du xetên sereke yên dayîna kehrebê ji stasyona Elokê re ji ber topbaranên hêzên dagirkeriya Tirk û muxalefeta çekdar zirar dîtin û stasyon ji xizmetê derket. Stasyona Elok ji girîngtirîn stasyonên li herêma Cizîrê ye, ji ber ava wê baş e.
raporê wiha berdewam kir: “Hêzên dagirkeriya Tirk asta êrişên xwe bi rêya hedefgirtina enerjiya kehrebê ku kehrebê dide stasyonê Elokê ya li rojhilatê Serêkaniyê ku 7 kîlo metere li derdor û têketina wê, zêde kiriye. Di encamê de kehrebe li ser stasyonê qut bû û stasyon ji xizmetê derket û ava vexwarinê li ser Hesekê û gundewarên wê qut bû.
Em F.HR.SY, deste, rêxistin û navendên hiqûqî ku ev rapora hiqûqî derxistine van hemû kiryarên dewleta Tirk a dagirker û hevkarên wê li dijî welatiyên sûrî pêk tînin, bi tundî şermezar dikin.
Em bang li civata navneteweyî dikin bi cidî tev bigerin û sînorekî ji êrişên li dijî gund û bajarên bakurê Sûriyê re deynin. Ji ber serweriya Sûriyê bin pê dike, kedên çareyên siyasî û têkoşîna li dijî terorê li Sûriyê qels dikin.
Bangawazî:
Li ser vê yekê em bang li NY´yê û endamên Konseya Ewlehiyê ya NY`yê yên Daîm, hemû deste û saziyên navneteweyî yên têkildarî mafên mirovan dikin ku:
1-Hemû zextên cidî û aktîf li hikumeta Tirkiyê bikin ku êrişên xwe yên berdewam li dijî bakur, Bakur û Rojhilatê Sûriyê bi dawî bike.
2-Yekser û bêyî tu şertan ji tevahî xaka Sûriyê ku dagir kirine vekişin.
3-Rêbazên terorîst û dermirovî yên hêzên dagirkeriya Tirk û hevkarên wê ku avê qut dikin ji bo zextê li Rêveberiya Xweser bikin û hin qezencên siyasî û aborî wergirin, teşhîr bikin.
4-Divê hikumeta Sûriyê û Rêveberiya Xweser bi awayekî lez çareyeke hevbeş, altarnatîf û aktîf bibînin ku avê bi awayekî mayînde ji Hesekê û gundewarên wê re dabîn bikin.
5-Divê aliyên navneteweyî yên li bakur, Bakur û Rojhilatê Sûriyê zextê li hêzên dagirker bikin ku sotemeniya guncaw ji bo bikaranîna stasyona Elokê dabîn bikin, heta tora kehrebe tê sererastkirin û alîkariya stasyona altarnatîf a Hemê bikin.
6-Hêsankirin û parastina gihandina pisporên taybet bi avê, da ku zirarên bi stasyonê bûne çareser bikin û hemû aliyên herêmî û navneteweyî bibin alîkar.
7-Zext li ser hikumeta Tirkiyê were kirin ku balafirên bêmirov û şer û topbaranên li dijî welatî, dêr û mizgeft û mal û milkên taybet û giştî rawestînin, talankirin û dizîna dikanan bi dawî bikin.
8-Xeterên dewleta Tirk a dagirker û êrişên wê yên li dijî sivîlên sûrî û koçberiya mezin werin eşkerekirin.
9-Çarenûsa jin, mêr û zarokan ku hêzên dewleta Tirk a dagirker û komên wê yên çekdar revandine, bêyî tu şert û mercan were eşkerekirin.
10-Komîteyeke lêpirsînê ya serbixwe, bêalî û dirust bi beşdariya nûnerên ji F.HR.SY û rêxistinên parastina mafên mirovan û mafên jinan li Sûriyê dikin were avakirin, da ku hemû sûcên dewleta Tirk ji destpêkê heta niha kirine eşkere bibin. Her wiha berpirsên dagirkeriyê ku bûne sedema kuştin û birîndaran eşkere bibin, da ku werin darizandin.
11-Bang li rêxistinên hiqûqî û sivîl ên Sûriyê were kirin ku hevkariyê di belgekirina hemû sûcên dermirovî ku hêzên dagirkeriya Tirk ji destpêka êrişên xwe û heta niha kirine de, her wiha dosyaya qutkirina ava vexwarinê bikin.
12-Divê gel û hiqûqnasên ji tevahî pêkhateyên li bakurê Sûriyê bixebitin da ku li hember xeteriyên ku dagirkeriya Tirk pêk tîne bi dawî bikin. Ji ber ew yek bi xwe re koçberiya bi darê zorê û qirkirina etnîkî tîne.
(fr)
[1]