33 پارت و ئالیێن سیاسی یێن رۆژئاڤایێ کوردستانێ داخواز ژ حوکمەتا سووریێ کرن کو چو رێککەفتنان ل گەل تورکیا نەکەت، چونکی د رەوشا نها دا هەر دانوستاندنەک کو ل گەل تورکیا بهێتە کرن دێ بیتە ئەگەرێ ئالۆزیێن نوو و ئه و یەک د بەرژەوەندیا سووریێ دا نینە.
33 پارت و ئالیێن سیاسی یێن رۆژئاڤایێ کوردستانێ د داخۆیانیەکا هەڤپشک دا دیار کرن کو نها رەوشا سووریێ گەلەک خرابە و د رەوشەکا وەسا خراب دا کو پێشبینیا گەلەک گوهۆرینان ژی دهێتە کرن نابیت شام خوە نێزیکی تورکیا بکەت، چونکی هەتا نها ژی قەیرانا سووریێ نەهاتیە چارەسەرکرن و وەلاتی چاڤەریێ گوهۆرینێن مەزن ل سووریێ دکەن، د دەمەکێ وەسا دا هەکە شامێ بڤێت ل گەل تورکیا دەست ب دانوستاندنان بکەت ئه و یەک دێ ئەنجامێن خوە یێن گەلەک خراب بۆ خەلکێ سووریێ هەبیت، چونکی ل وان دەڤەرێن کو ل ژێر کۆنترۆلا تورکیا دانە خەلکی ب توندی نەرازیبوونا خوە دیار کر و راگەهاندن کو ئه و ب چو رەنگەکێ قەبوول ناکەن تورکیا ل سەر خوونا وان سیاسەتێ بکەت.
د داخۆیانیێ دا ئه و یەک ژی هاتیە دیار کرن کو بەری هەر تشتەکێ دڤێت پرسا سووریێ د ناڤ سووریێ دا بهێتە چارەسەرکرن، دڤێت دستووری نها بهێتە گوهۆرین چونکی پێدڤیا سووریێ ب دستوورەکێ‌ دیموکراتی هەیە، لێ هەکە شامێ بڤێت ب جهێ چارەسەرکرنا قەیرانا نها ل گەل تورکیا دانوستاندنان بکەت دێ گەلێ سووریێ ب توندی بەرسڤا شامێ و ئەنقەرە دەن و دێ ئه و یەک ژی بیتە ئەگەرێ ئالۆزیێن نوو ل سووریێ، چونکی هەر دانوستاندنەک د ناڤبەرا شامێ و تورکیا دا بهێتە کرن ژ بۆ خەلکێ سووریێ ب گشتی دێ یا خراب بیت و ژ بەر هندێ ژی باشترە شام خوە ژ کارەکێ وەسا دوور بکەت.
ل ئالیێ دی دوهی مەولوود چاڤوش ئوغلۆ وەزیرێ دەرڤە یێ تورکیا ژی راگەهاند کو سەرۆک کۆمارێ ئەردۆغان ل گەل بەشار ئەسەدێ سەرۆکێ رژێما سووریێ چو هەڤدیتنان ناکەت و ئه و تشتێن کو ل هندەک دەزگەهێن راگەهاندنێ ل دۆر وی بابەتی ژی بەلاڤ بووینە راست نینن و چو بەرهەڤی ژی بۆ هندێ نەهاتینە کرن.
وەزیرێ دەرڤە یێ تورکیا ئه و یەک ژی دیار کر کو دڤێت پرسا سووریێ ب رێیێن ئاشتیانە بهێتە چارەسەرکرن و نها تورکیا ل گەل رۆسیا و ئیرانێ بۆ ڤێ یەکێ کار دکەت، لێ ژ بۆ چارەسەریا قەیرانا سووریێ دڤێت شام ژی هەلوەستێ خوە ل هەمبەر هێزێن ئۆپۆزسیۆنێ بگوهۆریت، نابیت شام ئۆپۆزسیۆنا سووریێ وەکو هێزێن تیرۆرست ببینیت، دڤێت شام ل گەل هێزێن ئۆپۆزسیۆنێ دەست ب دانوستاندنان بکەت و تورکیا ژی بەرهەڤە ژ بۆ چارەسەریا قەیرانا نها ل سووریێ یا پێدڤی بکەت.[1]