نامۍ: گۊشایېش
نازنام: مەولانا گۊشایېش
نامۍ تاتەی: پیر محەمەد(بابا مەردوخ)
نامۍ ئەڎێ: کناچۍ شېخ شەهابەدینی دزاوەری
ساڵەو ئامای دنیای: 1388ز
ساڵەو کۊچی دمایی: 1470ز
$ژیوای نامە$
نامۍ تەمامەش گوشایېش کوڕو پیر محەمەد هۆرامیەن کە ئەشناسیان بە(بابا مەردۊخ).ساڵەو(790ک) وەراوەرو(1388ز)جە دەگاو(دزاوەر)و هۆرامانی جە ئەڎیێ بیەن.ساڵەو(842ک) دەسش کەردەن بە بانگدای پەی وەڵاکەردەیۆ دین و ئیسلامی، یام زیاتەر ڕۊشنکەردەیۆ ئیسلامی. تاتەو گوشایېشی(بابا مەردوخ) جە نەوەڎو نۊ پیراو هۆرامانیەن، گۊڕەش نزیکەو گۊڕەو پیرشالیارینە. تەمەنو 89 ساڵینە کناچۍ(شېخ شەهابەدینی دزاوەری) مارەکەرۊو کوڕێش مەبۊن بە نامۍ(گوشایېش).
مەردوخیەکۍ(دەگا شېخان، هەزارکانیان، قەرەداخ) نەوۍ ئاییشانۍ، دیسان زانای گۆرە و بە نامبانگ محەمەد مەردوخ(آیة الله مەدوخ) نەوەو ئاڎییشان. ماموسا بەرزەکۍ مەردوخی قەرەداخی پېسە(شېخ عومەر قەرەدای)گردشان نەوەو ئاڎییشانۍ. دمای مەردەی بابا مەردوخی، گوشایېشی کوڕش کە نازنامش(مەولا)ن نامو نامبانگ(مەولانا گوشایېش) بەرکەرۊن و سەرو ڕاو تاتەیش دینداری وەڵاکەۊوە.ساڵەو(873ک) وراوەرو(1470ز)کوچی دمایی کەرۊن و دمای وېش کوڕێ جیامازۊ بە نامۍ(مەڵڵا عەباس)ی کە باباگۆرەو قازیەکان و هۆرامانیەن.
بڕێ جە مېژوو نویسەکا منویسان هۆرامان سەرو دەسو(مەولانا گوشایېش)ی ئیسلام بیەن، بە بەڵگەو دەسەواچێ کە دلۍ هۆرامیەکانە مەنەنۆ ئەپی تەعرە(بڕێ گەنجۍ جە هۆرامان مەپەرسانە ڕیش چەرمێوە قەڎیمی و ماچان: ئەرۍ لالۊ ماریفەت و پیرشالیاری قەدیما یام قرونی(قورئان)؟.
ئاڎییچ ماچۊ ماریفەت و پیرشالیاری قەدیما، قرونی هیزی گوشایېشە کوری ئاوەردەن. چن زانێوەتەرۍ پېسە مەڵڵا عەبدولکریمی مودەرسی ماچان مەولانا گوشایېش دمای مەردەی تاتەیش(بابا مەردوخ) دەسکەرۊن بە بانگەواز پەی ئیسلامیی. بە پاو چن سەرچەمێ تەری (بابا مەردوخ) جە بنەچەنە ئەمەوی بیەن و مەگېڵۊوە سەرو مەعاویەو کوڕو ئەبو سوفیانی، یانی گوشایېش جە بنەماڵێوە دینداری بیەن و کارش تازەکەردەیۆ(مجدد) دینی بیەن، نەک یەکەم کەس بیەبۊ دینو ئیسلامیش ئاردەبۊ پەی هۆرامانی. دیسان بنەماڵەو زانای گۆرەو نامدارو هۆرامانی(ناسری سوبحانی) نەوۍ مەولانا گوشایېشیەنۍ.[1]