لە ڕاگەیەندراوێکدا هێزەکانی پاراستنی گەل #هەپەگە# زانیاریی نوێی-یان دەربارەی چالاکی گەریلاکان بڵاوکردەوە، کە تێیاندا 32 سەربازی تورک کوژراون و چەند گەریلایەکیش شەهیدبوون.
دەربارەی ئەنجامی چالاکیی گەریلاکان و دۆخی سنوورەکانی شەڕ، ئێوارەی ئەمڕۆ ناوەندی ڕاگەیاندنی هەپەگە ڕاگەیەندراوێکی بڵاوکردوە.
لە ڕاگەیەندراوەکەدا هاتووە: گەریلاکانمان لە دوێنی لە کاتژمێر03:00ی پاشنیوەڕۆ، لەدژی سەربازگەکانی سوپای تورک چالاکییان ئەنجامدا، لەو چالاکییەدا کە لە گردی بایرک بەڕێوەچوو، دوو پێگەی سوپا تێکشکێندراوەو ئەوەی ئاشکرا بووە، پێنج سەربازی تورک کوژراون، دوای چالاکییەکە، سوپای تورک لە ڕێگەی هەلکۆپتەری سکۆرسکییەوە سەربازەکانیان گواستووەتەوەو هەڵهاتوون.
زانیاری زیاتر ڕاگەیەندراوەو هاتووە: لە چوارچێوەی قۆناغی دووەمی هەڵمەتی شۆڕشگێڕانەی شەهید بەدران گوندەکرەمۆ و شەهید نالین-دا، گەریلاکانمان لە 1ی ئەم مانگەدا لە کاتژمێر 06:10، لە گردی قەلا مەرگانش دژی سوپای تورک چالاکییان ئەنجامدا، لەو چالاکییەدا گورزێکی کوشندە لە سوپای تورک درا، لە ئەنجامیدا سێ پێگەی سەربازانی تورک تێکشکێندراو شەش سەرباز کوژران.
ئەوەش هاتووە: دوای ئەو چالاکییە، سوپای تورک بە پشتیوانی فڕۆکەکانی ئۆپەراسیۆنێکی دەستپێکرد، دوێنێ سوپای تورک هەوڵی دا بە پشتیوانی ئەو ئۆپەراسیۆنە هێرشبکاتە سەر پێگەی گەریلاکان، بەڵام ڕووبەڕووی بەرخۆدانی گەریلاکانمان بوونەوەو چەند سەربازێک کوژران، بەڵام ژمارەیان ئاشکرا نەبووە.
هەپەگە ئەوەشی ڕاگەیاندووە:دوای ئەو چالاکییە سوپای تورک تۆپبارانی سنوورەکەی کردووە، بەڵام گەریلاکان بەبێ زیان گەراونەتەوە پێگەکانی خۆیان.
دەربارەی سنووری دەرسیم لە باکوری کوردستان، هەپەگە زانیاری لەسەر چالاکییەکانیان بڵاوکردووەتەوەو ڕایگەیاندووە:دوێنێ گەریلاکانمان لە دەورووبەری گوندی هێستران - هرسزپنار و گۆلباسان، لەدژی یەکینەیەکی سوپای تورک چالاکییان ئەنجام داوەو لە ئەنجامدا شەش سەرباز کوژراون و سەربازێکیش برینداربووە، دوای چالاکییەکە، سوپای تورک بە ئۆتۆمبێلی هاوڵاتیان تەرمی کوژراوەکانیان گواستووەتەوە.
دەربارەی سنووری ئاگری-یش، هەپەگە ڕایگەیاند:لە چوارچێوەی هەنگاوی شۆڕشگێرانەی شەهید ماهیر - شەهید ئەیلەم و شەهید ئارگەش-دا، نیوەڕۆی دوێنێ گەریلاکانمان لەدژی کاروانێکی هێزەکانی تورک و بەکرێ گیراوان ئەنجامدا، لەو چالاکییەدا دە سەربازی سوپای تورک کوژراون.
لەدرێژەی ئەو ڕاگەیەندراوەدا هەپەگە ڕایگەیاندووە:لە 29ی مانگی ڕابردوودا، سوپای تورک لە هەرێمەکانی بۆتکێ-ی بەستا-ی سەربە شرناخ، ئۆپەراسیۆنێکیان دەستپێکرد، هەمان ڕۆژ لە ڕێگەی فڕۆکەوە بۆردوومانی سنوورەکانی ئێمەیان کرد، ڕۆژی دواتری پێکدادان لە نیوان ئێمەو سوپای تورکدا ڕوویدا، هەڤاڵێکمان کە قارەمانانە بەرخۆدانی دەکرد شەهیدبوو، هەروەها هەڤاڵێکیش کە برینەکەی سەخت بووە، کەوتووەتە دەست دوژمنەوە.
ئاماژە بەوەشکراوە:هەمان ڕۆژ دژی بنکەیەکی سوپای تورک لە کاتژمێر03:00ی پاشنیوەڕۆدا، گەریلاکانمان چالاکیان ئەنجامداو تێیدا 10 سەربازی سوپای تورک کوژران، دوای چالاکییەکە سوپای تورک لە ڕێگەی فڕۆکەوە هەرێمەکەی بۆردوومان کرد، هەر لەو ڕۆژەدە گورز لە دوو هەلیکۆپتەری سوپای تورک درا.
هەپەگە شەهیدبوونی چوار گەریلای ڕاگەیاندووە لە سنووری ئامەدو وەها درێژەی بەڕاگەیەنداوەکەداوە:پاشنیوەڕۆی 29ی ئەم مانگە، سوپای تورک لە ناوچەی شەهید فەرهاد لە لیجەی سەر بە ئامەد، ئۆپەراسیۆنێکی ئاسمانییان ئەنجامدا، تێیدا چوار هەڤاڵمان شەهیدبوو.
03-10-2017