پ.ی.د. #نەریمان خۆشناو# – سەرۆکی بەشی کوردی/ ئێواران، کۆلێژی پەروەردەی بنەڕەتی – زانکۆی سەڵاحەددین
لە چەند ڕۆژی ڕابردوودا وەزارەتی خوێندنی باڵا و توێژینەوەی زانستی لە کۆبوونەوەی ئەنجوومەنی وەزارەتدا، بڕیارێکی دژی وانەی کوردی دەرکرد، کە بەگوێرەی ئەم بڕیارە وانەکانی زمانی کوردی و زمانی عەرەبی دەبنە وانەی لاوەکی و ئارەزوومەندانە!، ئەمەش دژی ئاسایشی نەتەوەیی هەرێم و عێراقە.
بەندە وەک مامۆستایەکی زمانی کوردی بە ئەرکی خۆمی دەزانم، دژی ئەم بڕیارەی وەزارەتی خوێندنی باڵا بوەستمەوە و دەنگی ناڕەزایی خۆم ئاراستەی حکوومەت و لایەنە پەیوەندیدارەکان بکەم، کە لێنەگەڕێن ئەم بڕیارە بچێتە بواری جێبەجێکردنەوە، بەڵکو ئه و کەس و لایەنانەی لە پشتەوەی دەرچوونی بڕیاری لەم شێوەیەن، ڕێککاری یاساییان لە بەرانبەردا بگرێتە بەر، چونکه پێشتر حکوومەتی بەعس بڕیارێکی له و شێوەی دژی وانەی کوردی دەرکردبوو و وانەی کوردی لە پۆلی دوازدەی ئامادەیی کردبووە وانەیەکی ئارەزوومەندانە، ئەم کارەی وەزارەتی خوێندنی باڵا لەناوبردنی زمانی کوردییە و دژی زمانی کوردی و نەتەوەی کوردە، بۆیە گەرەکە داواکاری گشتی بێتە سەر خەت و ڕێگری لەم کارە بکات و بەهای زمانی کوردی بگەڕێنێتەوە‌.
دەبێ ئەوەش بوترێت، کە ئەم بڕیارە دژی هەردوو یاسای زمانە فەرمییەکانی هەرێم و عێراقه،‌ بەمشێوەیەی خوارەوە‌:
1 یاسای زمانە فەرمییەکان لە هەرێمی کوردستان عێراق، ژمارە(16)ی ساڵی 2014، کە لە دانیشتنی ژمارە(9) لە 29-10-2014 پەسندکرا و سەرۆکی هەرێم ڕێکەوتی 03-12-2014 واژووی پەسندکردنی لەسەر کرد و دواتر لە ڕۆژنامەی وەقایعی کوردستان بڵاوکرایەوە، ئەم یاسایە لە (27) ماددە پێکدێت، کە هەر هەموو ماددە و بڕگەکانی جەخت لەسەر ڕۆڵی زمانی کوردی و بەهای زمانی کوردییه لە هەموو ناوەندەکاندا‌.
2 یاسای زمانە فەرمییەکان، ژمارە(7)ی ساڵی 2014، کە لە لایەن ئەنجوومەنی نوێنەرانی عێراق پەسندکرا و لەلایەن سەرۆکی کۆمار پەسندکرا و لە ڕۆژنامەی وەقایعی عێراقی ژمارە(4311) لە 24ی شوباتی 2014 بڵاوکرایەوە، کە لە (18) ماددە پێکدێت، لە هەموو ماددەکاندا گرنگی زمانی کوردی و عەرەبی خراوەتەڕوو و بەها و ڕۆڵی هەروو زمانەکەی بە یاسا ڕێکخستووە.
کەواتە خەریکە بە دەستی خۆمان زمانی کوردی لەناو ببەین، بۆیە خوازیارین لە هەموو کەس و لایەنێک دژی ئەم کارە بوەستنەوە و ڕێگری لەم کارەی وەزارەتی خوێندنی باڵا بکەن....
لە کۆتایشدا بڕیارەکەی وەزارەتی خوێندنی باڵاتان بۆ دەخەمەڕوو:
وەزارەت خوێندنی باڵا و توێژینەوەی زانستی لە کۆبوونەوەی ئەنجوومەنی وەزارەتی ڕۆژی چوارشەممە ڕێکەوتی (08-03-2017) بەڕێوەچوو، یەکێ له و بڕیارانه: ئەژمارکردنی نمرەی وانەکانی زمانی کوردی و عەرەبی ئارەزومەندانە دەبێت: بڕیاردرا لەمساڵەوە ئەژمارکردنی نمرەی وانەکانی (زمانی کوردی و عەرەبی) بۆ دەرچوانی پۆلی دوانزە لە کاتی پێشکەشکردن بۆ کۆلێژە پزشکی و ئەندازیاری و زانستیەکان ئارەزوومەندانە دەبێت.
واتا دەرچوانی پۆلی دوانزەی ئامادەیی کاتێک داواکاری پێشکەش دەکەن بۆ کۆلێژە پزشکی و ئەندازیاری و زانستییەکان، سەرپشک دەکرێن لەوەی ئایا دەیانەوێت نمرەی تاقیکردنەوەکانی زمانی کوردی و عەرەبییان بۆ ئەژمار بکرێت، بەڵام لە هەموو حاڵەتێکدا دەبێت بەشداری تاقیکردنەوەی هەردوو وانەی زمانی کوردی و عەرەبیان کردبێت و لە تاقیکردنەوەکە دەرچووبن، جێگەی ئاماژەپێکردنە ئەم بڕیارە لەمساڵەوە جێبەجێ دەکرێت.
11-03-2017