پارەی ئیعانەی زەلزەلەی پێنجوین
نازانم ڕەنگی سپی بوو یا شین
کام دەردی ئێمەی پێ هاتە سامان
یا بۆ کام فەقیر بوو بە بەرگ و نان
هەر وەکوو دەهۆڵ هەر بیستم لە دوور
هەر وەکوو هۆهۆی دەشتی شارەزوور
ئەم ئیعانەیە تەنها دەنگی بوو
ئیتر کەی شێوە و شکڵ و ڕەنگی بوو
هەر وەکوو جەژنی مانگی ڕەمەزان
لەو مانگی تردا ئەکرێ بە سەیران
ئەمیش بە ناوی پێنجوین کۆ کرا
نازانم ئیتر بۆ لای کێ برا
چاوەڕوانی نان بۆ پیاوی برسی
مردنی خۆشە ئەگەر بپرسی
مارانگاز ئەگەر تریاکی بوو بێ
زوو فریای نەخەن لەت و پەت ئەبێ
گیای کەما ئەکرێ بۆ وەختی زستان
لە سەرما و بەفرا بدرێ بە حەیوان
بەڵام کە حەیوان لە برسا بمرێ
هەزار بار کەما کەڵکی کێ ئەگرێ
من دەستم بڕوا هەتاکوو بەهار
بەهار بێ منەت ئەڕۆمە سەر کار
لەجیاتی خانوو کەپرێ ئەبەستم
بە تەور و تەوراس بە شان و دەستم
یا لە شارەزوور ئەبم بە وەرزێر
جووتی خۆم ئەکەم پۆشتە و تۆخ و تێر
هەر بنکەگیایێ نانێکی تیایە
پەلامار ئەدەم ئەیکەم بە مایە
نە ترسی بەفر و نە ئاوی باران
هەتاکوو پاییز منیش وەک یاران
ئەبووژێمەوە و خۆم ئەکەم بە پیاو
هەر وەکوو جاران دێمەوە ناو ناو [1]

#موفتی پێنجوێنی#
#دیوانی موفتی پێنجوێنی 2#

قائیمقامی شارۆچکەی #پێنجوێن#، ئاماژە بەوە دەدات کە بەمەبەستی کۆنتڕۆڵکردن و کوژاندنەوەی حاڵەتەکانی ئاگرەکەوتنەوە بۆ چوار مانگی وەرزەکانی هاوین و پایز، بۆ ناوەندی شارۆچکەکە، بڕی یەک ملیۆن دینار و بۆ شارەدێیەکانیش، بڕی 500 هەزار دینار تەرخانکراوە، دەڵێت ئەمەش زۆر کەمە و بەشی پێداویستیبەکانمان ناکات.
#زانا ڕەحمان#، قائیمقامی شارۆچکەی پێنجوێن، بە (باسنیوز)ی ڕاگەیاند: ئەمساڵ کە هاوکاتە لەگەڵ وەرزی هاویندا و حاڵەتەکانی ئاگرکەوتنەوە ناو بەناو بوونیان هەیە، بۆیە تیمەکانی بەرگری شارستانی، پۆلیسی دارستان و ژینگەی پێنجوێن، بەهاوکاری هاووڵاتییان، ئەوەندەی بتوانن هاوکارن بۆ کوژاندنەوەی ئەو ئاگرانەی لەسنوورەکەدا دەکەونەوە.
قایمقامی پێنجوین، ئەوەشی خستە ڕوو: بۆ ئەمساڵ بەمەبەستی کۆنتڕۆڵکردن و کوژاندنەوەی حاڵەتەکانی ئاگرکەوتنەوە، بۆ چوار مانگی وەرزەکانی هاوین و پایز، بۆ ناوەندی پێنجوێن بڕی یەک ملیۆن دینار و بۆ هەردوو شارەدێی #گەرمک# و #ناڵپارێز#یش، پێکەوە ملیۆنێک دیناریان بۆ تەرخانکراوە، کە ئەوەش کەمە و لەئاستی دابینکردنی پێداویستییەکانی ئاگرکەوتنەوە نییە.
جەختی لەوەش کردەوە: ئەوەی لای ئێمە گرنگە، بەدواداچوونە بۆ ئەو ئاگرانەی دەکەونەوە و دواتریش لێپرسینەوە لەگەڵ کەسانی تۆمەتبار و ئەنجامدەری ئاگرەکە دەکەین، بەڵام بەشێک لەشوێنی ئاگرکەوتنەوەکان مین ڕێژکراون و کەس ناتوانێت بیکوژێنێتەوە.
هاوکات بەپێی ئامارێکی بەڕێوەبەرایەتی بەرگری شارستانی پێنجوێن، کە وێنەیەکی دەست (باسنیوز) کەوتووە، لەسەرەتای وەرزی هاوین تاوەکو ئەمڕۆ 8ی ئابی 2017، نزیکەی 15 حاڵەتی ئاگرکەوتنەوە تۆمارکراون و بەو هۆیەشەوە بەهەزارەها دۆنم زەوی دارستان و پوش و پاوان سوتاون.[1]
ماڵپەڕی باسنیوز: 08-08-2017

عەبدولسەلام عارف لە #پێنجوین# ساڵی 1964.[1]