(بەناوی خوای گەوره و میهرەبان)

مامۆستایانی سەربەرزی کوردستان.. بەرپرسانی پەروەردە لە هەرێمی کوردستان.. وەک ئاشکرایە لە ئەنجامی بێ پلانی حکومەتی هەرێم و ئه و قەیرانەی لە نێوان هەرێمی کوردستان و بەغدا دروست بووە، ماوەی چەند مانگێکە موچەی فەرمانبەرانی هەرێمی کوردستان زۆر لە وادەی دیاریکراوی خۆی دوا دەکەوێت، ئەمەش بە ئاشکرا کاریگەری نەرێنی لەسەر ژیانی هاوڵاتیان بە گشتی دروست کردووە، بۆ ئه و مەبەستەش هێشتا بەرپرسانی حکومەت و دەسەڵاتدارانی هەرێم نەیانتوانیوە چارەسەرێک بۆ قەیرانەکە بدۆزنەوه و فەرمانبەران و موچەخۆران له و تەنگژه و بارگرانیە دەرباز بکەن.

لە ئێستاشدا کە وەرزی ئەمساڵی خوێندن بەره و کۆتایی دەچێت و تەنها تاقیکردنەوەکان لەبەردەم مامۆستایاندا ماوە، دواکەوتنی موچە خۆی لە مانگی دووەم نزیک دەکاتەوە، ئەم حاڵەتەش جیاواز لە مانگەکانی ڕابردوو زیاتر تەنگی بە فەرمانبەران و مامۆستایان بە گشتی هەڵچنیوە، چونکە لەگەڵ دواکەوتنی موچەدا ئەنجامدانی ئەزمونەکانی کۆتایی وەرزی دووەم ئەرکێکی تری گرانی سەرشانی مامۆستایانە، بەرهەمی ئەمساڵی ڕەنجی مامۆستایان و قوتابی و خوێندکارانیش ماوەتەوە سەر ئەم چەند ڕۆژەی داهاتوو، هەر بۆیە نیگەرانییەکان پەرەیان سەندووه و ناکرێت لەوە زیاتر هاوڵاتیانی موچەخۆری کوردستان ببنە قوربانی.

مامۆستایانی بەڕێز.. ئێمە لە لیستی هاوبەشی مامۆستایان کە هەرچوار لایەنی مامۆستایانی (سەردەم، یەکگرتوو، پێشەنگ، سەربەخۆ) لەخۆ دەگرێت، لەکاتێکدا چاوەڕێ بووین لە سکرتاریەتی یەکێتی مامۆستایانی کوردستان کە هەفتەی ڕابردوو کۆبوونەوەی مەکتەبی تەنفیزی ئەنجامدا، هەڵوێستێکی شیاو و گونجاو لە بەرامبەر ئه و حاڵەتەدا وەربگرێت، بەڵام بەداخەوە هیچمان لێیان نەبینی، بۆیە ئێمە وەک لیژنەی باڵای هاوبەش و بەشدار لە یەکێتی مامۆستایان ئه و بەرپرسیارێتییە ئەخەینە ئەستۆی سکرتاریەت و پشتیوانی هەر هەڵوێستێکی شیاوی ناڕەزایی مامۆستایان دەکەین تایبەت به و بوارە، ئەمە لەکاتێکیشدایە کە تازە هەڵبژاردنەکانی هەرێم کۆتاییان هاتووه و بوجەیەکی گەورە له و بوارەدا خەرج کراوە، کەواتە بۆچی حکومەتی هەرێم بەدوای چارەسەری بێ موچەییدا ناگەڕێت، کە تا ئێستا هیچ ئاسۆیەکی دیار نییه و بە کۆتایی هاتنی تاقیکردنەوەکانیش دوو مانگی تەواو بەسەر پێ نەدانی موچەدا تێپەڕ دەبێت.

لەم ساتە هەستیارەشدا ئێمە چارەنوسی قوتابیانمان لە پێشچاو گرتووە، بۆیە وێڕای ئەوەی هیوای سەرکەوتنی تاقیکردنەوەکان دەخوازین، داواکارین بەرپرسانی پەروەرده و حکومەتی هەرێم ئەم قوربانیدانەی مامۆستایانیان لەپێشچاو بێت و چیتر بەرژەوەندی گشتی موچەخۆران و مامۆستایانیان بەتایبەتی بیر نەچێت و بە زووترین کات موچەی هەردوو مانگەکە دابین بکەن، چونکە وەک ئەوەی مامۆستایان گەورەترین توێژی موچەخۆری کوردستان پێکدێنن، گەورەترین کاریگەریی نەرێنیش بەسەر هاوڵاتیانەوە بەجێدەهێڵێت، هەروەها داوا لە مامۆستایانی خۆشەویستیش دەکەین پشتیوانمان بن بۆ گرتنی هەر هەڵوێستێک کە لە داهاتوودا دەیگرینە بەر، ئێمەش لە لیستی هاوبەشی مامۆستایان لە خزمەتی هەر خواست و داوایەکی مامۆستایانداین بۆ بەدیهێنانی ئامانج و داخوازییەکانیان.

لیژنەی باڵای لیستی هاوبەشی مامۆستایان

یەک شەممە 11-05-2014

بۆ بەڕێزان/ سەرۆک کۆماری‌ عێراق و پەرلەمانتار و وەزیرە کوردەکانی‌ حکومەتی‌ فیدراڵ
سەرۆکایەتی‌ هەرێمی‌ کوردستان
سەرۆکایەتی‌ پەرلەمانی‌ کوردستان
سەرۆکایەتی‌ حکومەتی‌ هەرێمی‌ کوردستان
وەزارەتی‌ دارایی‌ وئابووری‌
وەزارەتی‌ پەروەردە
وەزارەتی‌ خوێندنی‌ باڵا
سڵاوی‌ پەروەرده و زانست.. (هەموتان دەزانن ئەگەر هۆیەکانی‌ ژیاندن نەبوو داهێنانیش نابێت..)
بەڕێزان..
لاتان ئاشکرایە زیاتر لە ساڵێکە کێشەی‌ دواکەوتنی‌ موچە وبینە وبەردەی‌ هەبوون ونەبوونی‌ بەرۆکی‌ مامۆستایان و فەرمانبەرانی‌ هەرێمی‌ کوردستانی‌ گرتووە، تائێستاش چارەسەرەکەی‌ بەڵێڵی‌ ماوەتەوە بەڕاستی‌ خەڵکی‌ کوردستانی‌ ماندووکردووە، وای‌ لێهاتوە لەبری‌ بیرکردنەوە لەداهێنان تەنها بیر لەچۆنیەتی‌ گوزەران و بژێوی‌ ژیان بکرێتەوە چونکە هەمومان دەزانین کە هۆکاری‌ ژیاندن نەبوو داهێنانیش نابێت.
بەڕێزان..
ئێستا لەبەرئەوەی‌ ئاسۆکە ڕون نیە بەیەکجارەکی‌ خەڵک وەڕس و بێزار بووە، هەموو لایەکیش دەزانن بارودۆخەکە زۆر هەستیارە بۆیە ئارامیان گرتوە لەسەرخۆ هەڵسوکەوتیان کردووە، بەڵام دەبێ‌ بزانین ئەمەش سنوری‌ هەیە بۆیە ناکرێت لەنیوە ڕێگەدا بەجێبهێڵرێن. کێشەکەش تەنها مانگێک نیە بەلکو دەبێ‌ چارەسەرێکی‌ یەکجارەکی‌ بۆ بدۆزرێتەوە، بۆیە داواکارین:
1.لە سەرۆک کۆماری‌ عێراق و پەرلەمانتاران و وەزیرەکان تەنها لەمەراسیمی‌ تەشریفات وێنەکانمان نیشان نەدەن یان لەسەر شاشەی‌ تیڤیەکان هەرکەس و بەئارەزوی‌ خۆی‌ خەڵکی‌ کوردستان ماندوو بکات، دەبێت بەرهەمتان هەبێت ئەم خەڵکە ئێوەی‌ ناردووە بۆ بەدەستهێنانی‌ مافەکانیان نەک دروشم و وتاردان دەبێ‌ بەتوندی‌ ڕەخنە لە حکومەت و بەڕێز عەبادی‌ بگرن بۆجێبەجێکردنی‌ داخوازی‌ و داواکانمان و ئەگەری‌ قسەکردنیتر ببڕێتەوە.
2. لەبەڕێز سەرۆکی‌ هەرێم و سەرۆکایەتی‌ حکومەتی‌ هەرێم دانانی‌ سنورێک بۆ ئه و هەموو نیگەرانییەی‌ مامۆستایان و فەرمانبەران بۆ ئەوەی‌ ژیانمان تەئمین بکرێت، ڕاستە ئێمە لەشەرێکی‌ بێ‌ ئامانداین لەگەڵ تیرۆریستان و بارودۆخەکە زۆر هەستیارە بەڵام دەشبێ‌ ڕیزەکانی‌ دواوەی‌ هێزی‌ پێشمەرگە و ڕۆڵە قارەمانەکانمان قایمتر بکەین، بۆیە زۆر پێویستە بەرونی‌ بەکۆمەڵانی‌ خەڵک بڵێن هەروەها نەخشە ڕێگەی‌ چارەسەرکردنی‌ گرفتەکان دابڕێژرێت بۆ ئەوەی‌ چیتر لەبەرامبەر ئه و پرسە گرنگە سەرگەردان نەبین هەر ڕۆژه و بەشێوەیەک مامەڵە نەکرێت.
3. لەسەرۆکایەتی‌ پەرلەمان و ئەندامانی‌ پەرلەمان دەکەین بێدەنگی‌ بشکێنن و قسەی‌ خۆیان بکەن، چونکە ئێوە نوێنەری‌ گەلن و نمایندەن ناکرێ‌ لەبەرامبەر ئه و پرسە گرنگە و چارەسەرەکان قسەتان نەبێت، هەموشمان دەزانین پێویستیمان بە موزایەدەی‌ سیاسی‌ نییە بەلکو پێویستیمان بە کردارە.
مامۆستایانی‌ بەڕێز وخۆڕاگر..
ئەوەی‌ ئێستا دەگوزەرێت هەموو لایەکی‌ بێزارکردووە، نیگەرانیەکەشی‌ لەوەوە سەرچاوەی‌ گرتوە ئاسۆکانی‌ چارەسەرییەکان ڕون و دیارنین، زۆرتان ئارام گرتوە چونکە دەزانین بارودۆخی‌ هەرێم ناسکە و ڕۆڵەکانمان هەر ڕۆژە لەبەرەکانی‌ جەنگ خوێن دەکەنە سور خەڵات بۆ پاراستنی‌ خەڵکی‌ کوردستان، لەمبارەیەوە یەکێتی‌ مامۆستایانی‌ کوردستان خۆی‌ بەداکۆکیکاری‌ سەرسەختی‌ مامۆستایان دەزانێت بەهەموو شێوەیەکیش هەوڵ لەبەرجەستەکردنی‌ مافەکان وچارەسەرکردنی‌ کێشەکان دەدات، هەربۆ ئه و مەبەستە بەنامەی‌ فەرمی‌ داوا لە یەکێتی‌ مامۆستایانی‌ جیهانی‌(EI) و ڕێکخراوی‌ مامۆستایانی‌ بەریتانی‌(NASUWT) و فیدراسیۆنی‌ مامۆستایانی‌ ئەمریکی‌(AFT)، مەکتەبی‌ ئاسیا باسفیک دەکەین هاودەنگمان بن بۆ بەرجەستەکردنی‌ مافەکانمان..
لەکۆتاییدا جارێکیتر داواکاری‌ لەهەموو لایەک دووپات دەکەینەوە بەدەم داخوازییەکانمانەوە بێن چیتر ئه و کێشانە بە چارەسەر نەکراوی‌ نەهێڵدرێنەوە.. لەگەڵ ڕێز
کۆبوونەوەی‌ ئەنجومەنی‌ تەنفیزی‌
یەکێتی‌ مامۆستایانی‌ کوردستان
19-02-2015

لە هەندێ لە دەزگاکانی ڕاگەیاندن وا بڵاوکراوەتەوە کە گوایە وەزارەتی دارایی و ئابووری تەنیا نیوەی مووچەی مووچەخۆرانی هەرێمی کوردستان دابەش دەکات، لێرەدا دووپاتی دەکەینەوە ئەم‌ ئیدیعایە هیچ ڕاستی و بنەمایەکی نییە و بە هیچ شێوەیەک حکوومەت بڕیاری وای نەداوە کە تەنیا نیو مووچە دابەش بکات، بەڵکوو ئەم هەفتەیە تەنیا هێندەی نیوەی پارەی پێویست بۆ مووچەی وەزارەتی پەروەردە بە کاش لای وەزارتی دارایی و ئابووری هەبووە، بۆیە دەستیان بە دابەشکردنی ئەو نیوەیە کردووە و لە ماوەیەکی داهاتووشدا کە باری دارایی ڕێگەی دا، نیوەی دووەمی ئەو مووچەیە دابەش دەکرێت و بە هیچ شێوەیەک مووچەی هیچ فەرمانبەرێکی حکوومەت ناوفەوتێت.
19-01-2016

لە ساڵی 2006-2007ەوە، بنەماڵە و خێزانە نەجیب و سەنگینەکەی دکتۆر #کازم فاروق# دەناسم، هاتوچۆمان هەبووە و تێکەڵ بوین، خێزانی د.کازم (ماڵی باوکیان) موسڵمان، لە خواترس و خێرخوازن، خێزانێکی ڕوو لە خودا موسڵمانێکی زۆر پابەندن بە دینەوە، دوورن لە هەر هێز و حزبێکی سیاسی...
کوڕ و کچی ئەو بنەماڵە نەجیبە، بە گشتی پزیشک و ئەندازیارن، لە ڕووی داراییەوە، بە بنەماڵە خودای گەورە پێی بەخشیوون و ئەوانیش دەبەخشن، هاوکاری خەلکی بێ باوک و دایک و دروستکرنی مزگەوت و خوێندکارانی زانکۆ دەکەن...
لەڕووی سیاسیەوە، ئەو کاتەشی د. کازم کاندید بوو خێزانەکەی پێیان خۆش نەبوو، بەڵام د. کازم گوێی لێنەگرتن و سوور بوو لەسەر ئەوڕێگەیەی هەڵیبژارد، لە ڕابردوو و ئێستاشدا د.کازم و خێزانەکەی نە پێویستیان بە پلەی پەڕڵەمانتاری، نە بە موچە و نە پارەکەی هەبوە..
بابەتی موچە و بەستنەوەی بە د. کازم و خێزانەکەی زۆر ئازاربەخشە و بێ ویژدانیەکی گەورەیە..
خودای گەورە شیفای د. کازم بدات، هیوای تەندروستی باش بۆ دایکە نەجیبەکەی و خێزانە سەنگین و خێرخوازەکەیان دەخوازم. [1]

#03-03-2018#

دواڕۆژ، عەلی حەمە سەعید
بەڕێوەبەری گشتی چاودێری و گەشەپێدانی کۆمەڵایەتی هەڵەبجە ئاشکرایدەکات، زیاتر لە دوو هەزار مامەڵەی نوێی کەمئەندامانمان ڕەتکردوەتەوە کە شایستەی ئەوەن موچە وەربگرن و مەرجەکانیشیان تێدایە.
سالار فەتاح، بەڕێوەبەری گشتی چاودێری و گەشەپێدانی کۆمەڵایەتی هەڵەبجە، بە دواڕۆژی ڕاگەیاند، بەهۆی قەیرانی دارایی و نەبونی بودجە و موچەوە مامەڵەی زیاتر لە دوو هەزار خاوەن پێداویستی سنورەکەمان ڕەتکردوەتەوە و وەرمان نەگرتووە لەکاتێکدا هەموو مەرجەکانی خاوەن پێداویستی تایبەتیان هەبوە و لیژنەی پزیشکیش پشتگیری کردوون چونکە دەزانین حکومەت موچەیان بۆدابین ناکات و ئێمەش نامانەوێت خەڵکی بخەینە چاوەڕوانییەوە.
ئاماژەی بەوەشکرد، لە سنوری بەڕێوەبەرایەتی گشتی چاودێری و گەشەپێانی کۆمەڵایەتی هەڵەبجە، حەوت هەزار و 40 خاوەن پێداویستی تایبەتی تۆمارکراون و موچەیان بۆ بڕاوەتەوە بەڵام ماوەی زیاتر لە سێ‌ ساڵە هیچ خاوەن پێداویستیەکی تایبەتی دیکە ناوی نەخراوەتە ناو لیستی موچەوە و موچەی بۆ نەبڕاوەتەوە ئەوەش بەهۆی بەردەوامی قەیرانی دراییەوە.
بەڕێوەبەری گشتی چاودێری و گەشەپێدانی کۆمەڵایەتی هەڵەبجە، وتیشی"هۆکاری دەستبەکارنەبونی لیژنەی تایبەت بە دوبارە پشکنینەوەی خاوەنپێداویستیەتایبەتەکان بۆ ئەوە دەگەڕێتەوە کە لە سنوری بەڕێوەبەرایەتی گشتی تەندروستی هەڵەبجەدا ناتوانرێت ئەو لیژنە تەندروستیە دروستبکرێت کە وەزارتی کاروباری کۆمەڵایەتی پەسەندی دەکات بەڵام لەلایەن وەزیری تەندروستی و بەرپرسانی هەڵەبجەوە بەڵێنمان پێدراوە کە ئەو لیژنەپزیشکیەی لە ئێستادا لەسلێمانی کار دەکات دوای تەواوبوونی کارەکانیان بگوازرێنەوە بۆ هەڵەبجەو دەست بە دوبارە پشکنینەوەی خاوەن پێداویستییە تایبەتییەکانی سنورەکە بکەن".
- 07-10-2016

ناونیشانی بابەت: عەلی وەردی: دواکەوتنی مووچە هۆکارە بۆ دزی و گەندەڵی
ئامادەکردن و نووسین: #بارام سوبحی#

دەوڵەتی عوسمانی لەکاتی خۆیدا مووچەی فەرمانبەرانی نەدەدا، بۆیە هەندێجار سەربازەکان پەلاماری بازاڕەکانیان دەدا. فەرمانبەرانیش بەبێ‌ بەرتیل کاری هاووڵاتییانیان نەدەکرد. کۆمەڵناسی بەناوبانگی ئێراقی د.عەلی وەردی لەیاداشتەکانیدا وادەڵێت.
پەڕتووکی وانەکانی ژیانم لە نووسینی د.عەلی وەردی و وەرگێڕانی نەوزاد ئەحمەد ئەسوەدە، لەبڵاوکراوەکانی دەزگای ڕۆشنبیری جەمال عیرفانە و (158) لاپەڕەیە. لەبارەی ئەم بەرهەمەوە، وەرگێڕ دەڵێت: وەردی بیرەوەرییەکانی خۆی بەشێوەی تەقلیدی نەنووسیوەتەوە، بەڵکوو هەوڵیداوە جارێکیتر لەمیانی باسکردنی بیرەوەرییەکانی منداڵی و گەنجی، نەریت و دیاردە کۆمەڵایەتییەکان کەشف بکات و شیکردنەوەیان بۆ بکات و هۆکارەکانیان بخاتەڕو ڕەخنەیان لێبگرێت.
لەم بیرەوەرییانەدا وەردی باس لە قۆناغی منداڵی و مێردمنداڵی و تاساڵانی (1935) دەکات، ئەو ساڵانەی کە قۆناغی ئامادەیی بەپلەی یەکەم لەسەر ئاستی هەموو ئێراقدا تەواو دەکات و دەنێردرێت بۆ زانکۆی ئەمریکی لەبەیرووت. لەبارەی نووسینەوەی یاداشتەکانی، وەردی دەڵێت: من هەروەک کەسانی دی حەز دەکەم ستایشی خۆم بکەم، بەڵام لەگەڵ ئەوەشدا هەست بەوە دەکەم کە ئیرادەی ئەوەم نەبو خۆم خۆم درووست بکەم، تەنیا لەچوارچێوەیەکی زۆر دیاریکراودا نەبێت. ئێستاش کاتێک لەروداوەکانی ژیانم ورد دەبمەوە هەر لەمنداڵیمەوە تاپیریم، واهەست دەکەم زۆر جار من وەک ئەو پەڕە وام کە بادەیبات و خۆم هیچم نییە.
سەرکەوتن بەرهەمی مرۆڤ نییە
وانەی یەکەم لەژیانی عەلی وەردی بریتییە لەوەی کە سەرکەوتن و درووستبوونی کەسایەتی مرۆڤ بەتەنیا دەستکردی مرۆڤ نییە، بەڵکوو پێکهاتەی کەسایەتی مرۆڤ دەرەنجامی کارلێکی نێوان فاکتەری بۆماوە و ژینگە یان دەوروبەرە. بۆیە لەمڕوەوە ڕەخنە لە کۆمەڵگەی ئێراقی دەگرێت و دەڵێت: خەڵکی وا ڕاهاتون ڕێز لەکەسی سەرکەوتو بگرن و ڕقیان لەکەسی ژێرکەتو بێتەوە، لەو باوەڕەی گوایە هەریەک لەوانە خۆیان خۆیانیان درووستکردووە، ئەمەش بووەتە مایەی سەرهەڵدانی ستەمێکی زۆری کۆمەڵایەتی لەنێو خەڵکیدا. ئەوان کاتێک ڕێز لەکەسی سەرکەوتو دەگرن لەڕاستیدا زیاد لەشایستەی خۆی دەدەنێ‌. کاتێکیش ڕقیان لەکەسی ژێرکەوتو دەبێتەوە ئەوا ستەمی لێدەکەن و پێیانوایە تەنیا خۆی بەرپرسیارە لەفەشەلی خۆی.
لێکدانەوەی تازە بەکۆن
لەمیانی باسکردنی ژیانی خۆیدا، وەردی کاتێک باس لەهاتنی فڕۆکە و ئاشنابوونی خەڵکی بەکارەبا دەکات، وانەیەکی دیکە دەخاتەڕو، ئەویش ئەوەیە مرۆڤ ناتوانێت لەشتی تازە تێبگات تەنیا لەمیانی چەمکە کۆنەکانییەوە لێکدانەوەیان بۆ دەکات. بۆیە دەڵێت: سرووشتی ئەقڵی بەشەری بەگشتی بەو شێوەیە ناتوانێت بەڕەهایی لەحەقیقەتی شتەکان تێبگات، بەڵکوو بەپێی زانیاری و تێگەیشتنەکانی خۆی لێیان تێدەگات، ئەمە تەنیا لای خەڵکی عەوام وانییە، بەڵکوو لەلای زانا و فەیلەسوفەکانیش هەیە.
ململانێی دین و دونیا
بەشێکی زۆری بیرەوەرییەکانی وەردی تەرخانکراوە بۆ باسکردن لەململانێی نێوان دین و دنیا، ئەمەشمان لە چەند ڕووداوێکی جیاوازەوە بۆ شرۆڤە دەکات. بەنموونە کاتێک باس لەباوکی دەکات دەڵێت: باوکم لەبەرئەوەی پیاوێکی ئایینی بو لایەنگری عوسمانییەکان بو، بەڵام بەهۆی ستەمکارییەوە ڕقی لەعوسمانییەکان بو، چونکە جەورو ستەم لە سەردەمی عوسمانیدا گەیشتبوە پلەیەک بەدەگمەن ستەمی والەهیچ سەردەمێکی تردا هەبوە.
بابەتێکی دیکە کە وەردی باسیدەکات زۆربوونی تاوانە کۆمەڵایەتییەکانە، هۆکارەکەشی بەپلەی یەکەم دەخاتە ئەستۆی دەسەڵات. لەوبارەیەوە دەڵێت: دەوڵەتی عوسمانی لەکاتی خۆیدا مووچەی فەرمانبەرانی نەدەدا، بۆیە هەندێجار سەربازەکان پەلاماری بازاڕەکانیان دەدا. هەروەها فەرمانبەرانیش بەبێ‌ بەرتیل کاری هاووڵاتییانیان نەدەکرد.
وەردی لەمیانی باسکردنی ململانێی دین و دونیادا باس لەحاڵەتێکی تر ئەویش هەڵچونی خەڵکییە لەکاتی بۆنە ئایینییەکاندا، لەوبارەیەوە دەڵێت: خەڵکی لەکاتی کۆبوونەوە ئایینییەکاندا هەست بەئازایەتی دەکەن و کەمتر هەست بەترس دەکەن، بۆیە لەحاڵەتی وادا مەیلی غەوغاو گێرەشێوێنیان تیادا گەش دەبێتەوە... هەروەها زۆرجار هەستی خێڵەکی و شارچێتی بەسەر ئایینداریدا زاڵ دەبێت و ئەوەش گرفتی لێدەکەوێتەوە.
ماستاوکردن بۆ دەسەڵات
وانەیەکی دیکە لەژیانی وەردی گێڕانەوەی چیرۆکی ئەو کەسایەتییانەیە کە لە ڕێگەی ماستاوکردنەوە خۆیان لەدەسەڵات نزیک دەکەنەوە، دەیانەوێت لەو ڕێگەیەوە پارێزگاری لەپێگە و ناوبانگی خۆیان بکەن و خۆیان بەسەر خەڵکیدا بابدەن. ئەمەشمان لەچیرۆکی سەید جەعفەرەوە بۆ دەگێڕێتەوە. لەوبارەیەوە دەڵێت: ئەو کەسانە خۆیان بەگەورە دەزانی و سڵاویان لەکەس نەدەکرد، لەئاستی دەسەڵاتدارانیش خۆیان بەبچوک دەزانی.
ئەگەر نزیکبوونەوە لەدەسەڵات بۆ هەندێک کەس ببێتە مایەی دەسکەوت، ئەوا بۆ هەندێکی دیکە بوەتە گرفت. بەنموونە پیاوانی ئایینی لە سەردەمی عوسمانیدا خەڵکیان هانداوە بچن بۆ جیهاد و بەرگری لەدەسەڵاتی عوسمانی بکەن، بەڵام کوڕەکانی خۆیان لەو کارە بەخشراون. کەچی لە سەردەمی حوکمڕانی پاشایەتی و باڵادەستی ئینگلیزدا نزیکبوونەوە لەدەسەڵات بوەتە کێشە بۆ پیاوانی ئایینی و مایەی لۆمەکردنی خەڵکی، ئەمەشمان لەبەسەرهاتی سەیید حەسەن سەدرو مەهدی خاڵسی دا بۆ ڕوندەکاتەوە.
شار بەتامی گوند
کاتێک عەلی وەردی باس لەژیانی خۆی لە بەغدای ئەو کات و جیاوازی نێوان گەڕەکەکان دەکات، دو وانەمان پێدەڵێت یەکەمیان ئەوەیە بەشێک لەخەڵکی هەرچەندە لەشاردا ژیاون، بەڵام بەهەمان داب و نەریت و دەستووری ژیانی گوندەکانەوە، ئەمەش لەمامەڵەکردن لەگەڵ پرسەکانی ژناندا دەردەکەوێت.
وانەی دوەمیش ئەوەیە هەرچەندە خەڵکی دەیانەوێت لەسەر داب و نەریتەکانیان بەردەوام بن، بەڵام بەتێپەڕبوونی کات ناچاردەبن تەڤلی تازەگەری ببن و دەستبەرداری ڕەفتارو داب و نەریتی باب و باپیرانیان بن. لەمبارەیەوە دەڵێت: ئێمە نابێ‌ بەردەوام گلەیی لەخەڵکی بکەین لەسەر ئەو کردەوانەی پێی ڕاهاتون و ئەو باوەڕو نەریتانەی لەسەری پێگەیشتون، ئەمە لەڕاستیدا لەخواست و ئیرادەی خۆیاندا نییە. سائەگەر ئێمەش لە هەمان ژینگە و هەمان بارودۆخدا پێبگەیشتینایە ئەوا وەک ئەوان دەبوین. هەروەها دەڵێت: هەرچەندە کۆمەڵگە داخراو بێت ئەوا بەرەنگاربوونەوە و بەرهەڵستکاری تیایدا توندتر دەبێت.
بۆچی هەموو خەڵکی دەبنە سیاسی؟
لەدرێژەی گێڕانەوەی ژیانی خۆیاندا وەردی هۆکاری ئەوەمان بۆ ڕوندەکاتەوە بۆچی زۆرینەی خەڵکی ئێراق باسی سیاسەت دەکەن و خۆیان لێبوەتە سیاسی و ڕەخنە دەگرن. سەرەتای سەرهەڵدانی ئەم دیاردەیە دەگێڕێتەوە بۆ دەورانی حوکمی مەلیک فەیسەڵ و ڕایدەگەیەنێت خەڵکی لە سەردەمی عوسمانیدا پێیانوابو سیاسەت و حوکمڕانی پەیوەندی بەوانەوە نییە.
وەردی ئاشکرای دەکات لە ئێراقدا خەڵکی تەنیا ئەوکاتە لەبارەی سیاسەتەوە دەدوێن کە دڵنیابن لەوەی دورن لەمەترسی. هەر ئەوەندەی بزانن حکومەت شمشێری لێ‌ بەرزکردونەتەوە ئەوا دەمودەست دەگەڕێنەوە بۆ بیرۆکە کۆنەکەیان کە دەڵێت: من هەقم چییە بەسەرەوە و پەیوەندی بەمنەوە نییە. هەروەها دەڵێت: خەڵکی لەسرووشتی ئەو بەربەست و ئاستەنگانە تێنەدەگەیشتن کە دوچاری مەلیک ببو، هەموو کەسێک ببو بەڕەخنەگری سیاسی عەیار بیست و چوار و باوەڕیان وابو کە خاوەنی ڕاوبۆچونێکی ڕاستن.
مزگەوت و گەندەڵی
وانەیەکی گرنگ کە وەردی فێرمان ئەوەدەکات مەرج نییە زۆربوونی مزگەوت و مەزارگەکان مانای ئەوەبێت خەڵکی زۆر ئاییندارن. چونکە وەکوو دەڵێت: لە سەردەمی عوسمانییەکاندا فەرمانڕەوایان لەهەرە فەرمانڕەوا گەندەڵ و بەرتیلخۆرو ستەمکارەکانی جیهان بوون، بەڵام لەخەڵکی زیاتر خۆیان واپیشاندەدا کە خەریکی دیندارین و سەرقاڵی بنیاتنانی مزگەوت و مەزارگە و شتی لەو چەشنە بوون. بەغدا لەو دەمانەدا بەقۆناغێکی زەمەنی وادا تێپەڕی هەرچەندە مزگەوت و مەزارگەی پتر بنیات بنرایە، پتر وێرانەیی و گەندەڵی بڵاودەبوەوە. [1]
=KTML_Bold=ئەم بابەتە بە ڕینووسی سەرچاوەی ئاماژەپێکراو نووسراوە کوردیپێدیا دەستکاری ڕێنووسی نەکردووە=KTML_End=

بەڕێزان لە حکومەتی هەرێمی کوردستان
پڕۆژەی فراکسیۆنی گۆڕان بۆ دابینکردنی موچە و دەربازبون لەم دۆخە.
هەرکاتێک قەیرانێک دروستببێت، دەرگایەک بۆ دەربازبون هەیە، بەڵام کردنەوەی ئەم دەرگا ئیرادەی پێویستە.
بۆ دابینکردنی موچە لە ئێستاداو بوژانەوەی ئابوری لە ئایندەدا، ئەم پرۆژەیە دەخینە بەردەستی بەڕێزتتان.
یەکەم: خاڵە سنورییەکان
1. چاکسازی لە کاری ئەو کۆمپانیایانەی لە خاڵە سنورییەکاندا دەکرێن و دراوە بە ژمارەیەک کۆمپانیا، لە هەر خالێکی سنوری بە (دە) ڕێگا پارە وەردەگیرێت و داهاتی مانگانەیان نزیکەی 50 ملیۆن دۆلارە (وردەکاری ئەمەمان دیاریکردوەو ڕادەستی جەنابتانمان کردوە).
2. ڕێگریکردن لە قاچاخچێتی لەسەرجەم خاڵە سنورییەکاندا، هەندێک مانگ زیاتر لە 25 ملیۆن دۆلار قەبارەی ئەم قاچاخچێتیە بوە (وەردەکاری ئەو دەرگاو ڕێگایانەمان دیارکردوە کە قاچاخی پێدا دەکرێت و بەجەنابتانمان ڕاگەیاندوە).
3. کۆنترۆَڵکردنی عەفوی گومرگی و ترانزێت کە لە ڕابردودا زیانی گەورەی داوە.
شەفافانە مانگانە لە ڕاپۆرتێکدا داهاتی سەرجەم خاڵە سنورییەکان بخرێتە بەردەست پەرلەمانی کوردستان
دوەم: دۆسیەی باج
1. وەرگرتنی باج لەسەرجەم کۆمپانیاکان لە کوردستان، بەتایبەت ئەو کۆمپانیایانەی تاوەکو ئێستا باجیان نەداوە، لەوانە: کۆمپانیا جیهانی و ناوخۆییەکانی نەوت، پێداچونەوە بە باجی کۆمپانیاکانی ئەنتەرنێت و پرۆژە نیشتەجێبونەکان و خزمەتگوزارییەکانیان و سکویریتی......هتد.
2. پێداچونەوە بە هەمو ئەو لێخۆشبون و داواخستانەی باج، کە لە پێشوتردا بەدەر لە یاسا کراون.
3. وەرگرتنەوەی 190 ملیار دینار قەرز لە کۆمپانیای پەیوەندی مۆبایل، کە لە زیادەی فرۆشتنی کارتی مۆبایل دەستی کەوتوەو دەبو ڕاستەخۆ بیداتە حکومەتی هەرێم و بە نایاسایی بۆی کراوە بە قیستی 200 مانگ!
سێیەم: ڕسومات و کرێیی خزمەتگوزاری
پێداچونەوە بە هەمو ئەو ڕسوماتانەی کە بۆ خزمەتگوزاری گشتین و لە دەرەوەی بنەماکانی کێبڕکێ و پێویستی دراوە بە ژمارەیەک کۆمپانیا، لەوانە: خزمەتگوزاری عەریزە نوسەکانی دادنوس و فەرمانگەکانی هاتوچۆو و وەرگتنی کرێی تابلۆی بازرگانی و کۆکردنەوەی پارەی ئاو و پارەی خشاک، ئەمانە ئەرکی حکومەتن نەک کۆمپانیاو پێویستە وەربگیرێتەوە.......هتد.
چوارەم: دۆسیەی نەوت
1. کۆی ئەو پارانەی لە ڕابردودا داهاتی نەوت بون و چونەتە بانکی ئەهلی وردبینی بکرێت و ئەوەی خەرحنەکراوە بگەڕێندرێتەوە بانکی چ پارەکانی بەخشینی کۆمپانیاکانی نەوت (شیرینی).
ئەو پارانەی نەوت کە بەناوی پرۆژەوە تەرخانکراون و پرۆژەکان جێبەجێنەکراون.(لیستی پرۆژەکانمان ڕەوانەی ئەنجومەنی هەرێمی نەوت و غازکردوە کە بەهای دو ملیار دۆلار بۆ پرۆژە تەرخانکراوەو پرۆژەکان خەرحنەکراوە.(لە ڕاپۆرتێکدا وەردەکاری ئەم پارانەمان بۆ ئەنجومەنی هەرێمی نەوت و گاز ڕەوانە کردوە).
2. پرۆژەی پاڵاوتنی نەوت لە ناوخۆدا دەستپێبکات و لە ئێستادا دەتواندرێت نزیکەی 150 هەزار بەرمیل لە ناوخۆدا بپاڵێورێت، ئەو داهاتەی لە فرۆشتنی بەرهەمە نەوتییەکان دەستدەکەوێت بەتایبەت (بەنزین و گازوایل و نەوتی سپی) زۆر زیاترە لە فرۆشتنی نەوتی خاوی هەرێم بەم نرخەی ئێستا، ئەمە جگە لەوەی هاوڵاتیان لە ڕوی نرخ و کوالێتیەوە سودمەند دەبن. هیچ گرفتێکیش بۆ ڕێککەوتن لەگەڵ عێراق دروستناکات، عێراق ئێستا ڕۆژانە زیاتر لە یەک ملیۆن بەرمیل نەوت دەپاڵێوێت و بۆیە دەکرێت هەرێمی کوردستانیش نزیکەی 150 هەزار بپاڵێوێت.
3. ڕێککەوتن لەگەڵ عێراق، حکومەتی هەرێم کۆی ئەو نەوتەی جگە لە پاڵاوتنی ناوخۆ دەمێنێتەوە لە بەندەری جیهان ڕادەستی سۆمۆی بکات، لە بەرامبەر شاسیتە داراییەکانی هەرێمی کوردستان.
4. پێداچونەوە بە کۆی خەرجییەکانی نەوت، کە بە فیڕۆدان و قۆرخکاری و نادادی زۆری تێدایە.
پێنجەم: دۆسیەی قەرزەکان
حکومەت 800 ملیار دیناری قەرزی لای بازرگانەکانە، وەرگرتنەوەی ئەم قەرزانە لە ئێستادا کارێکی پێویستە، بەپێی بڕیاری حکومەت دەبێت تاوەکو 21/5/2020 ئەم قەرزانە وەربگیرایتەوە.
شەشەم: دۆسیەی کۆمپانیاکانی سکویریتی:
سەرباری ئەو ژمارە زۆری هێزی پێشمەرگەو ئەمنی هەرێمی کوردستان، 64 کۆمپانیای سکویریتی لە هەرێمی کوردستاندا هەیە، تەنانەت پاسەوانی کێڵگەکانی نەوت و غازی هەرێمی کوردستانیش دراون بە کۆمپانیای سوکیوریتی و ئەمەش مانگانە چەندین ملیۆن دۆلار لە داهاتی نەوت دەبات.
حکومەتی هەرێمی دەتوانێت خۆی ئەم ئەرکە بەڕێوەببات.
حەوتەم: دروستکردنی کۆمپانیای گشتی.
لە عێراقدا حکومەت دەتوانێت بەیاسا کۆمپانیای کەرتی گشتی دروستبکات و لە چەندین بواری جیاوازدا کاربکات و سود لە میلاکی زیادەی فەرمانبەرانی هەرێم ببێنێت، ئەمەش دەبێتە هۆکاری سەرچاوەیەکی گەورەی داهات.
هەشتەم: جێبەجێکردنی یاسای چاکسازی لە موچەی خانەنشینی
هەوڵبدرێت لە زوترین کاتدا ئەو ماددانەی یاساکە کە چارەسەری نادادی گەوەری تێدایەو پەیوەستە بە چاکسازی لە لیستی خانەشینانی ئەمنی و سەربازی و پلە باڵاکان و لیستی شەهیدان و کەمئەندامی سەنگەر... هتد بچێتە بواری جێبەجێکردن.
کۆی ئەم خاڵانە پێشنیاری واقعین، لە ڕابردودا بەدواداچونی وردمان بۆ سەرجەم ئەم خاڵانە کردوە، باوەڕمان وایە، بەجێبەجێکردنی ئەم پرۆژەیە هەرێمی کوردستان لەم دۆخە دەربازی دەبێت، بۆ ئایندەش چەندین پایەی بەهێزی ئابوری دروستدەبێت و دەتوانین ژێرخانی ئابوری ببوژێنینەوە.
فراکسیۆنی گۆڕان
#26-04-2020#

[1]

بێدەربەستی حکومەتی بنکەفراونی شکستخواردوی (5) حیزبی، لەوەڵامدانەوەیان بە سەرەتاییترین خواستەکانی خەڵکی کوردستان، لەدانی موچەو دابینکردنی خزمەتگوزاریەکان توڕەیی پەنگخواردوی خەڵکی کوردستان بەرامبەر بە دەسەڵاتی نایەکسان‌و گەندەڵ و تاڵانچی، کۆبونەوەو مانگرتن و خۆپیشاندانی بەشیکی زۆری شاروشارۆچکەکانی کوردستانی بەدوایی خۆیدا هێناوە.
ناڕەزایەتی و خۆپیشاندان‌و کۆبونەوەو مانگرتن، نەک هەر سەرەتاییترین و ڕەواترین مافی کرێکاران و کارمەند و فەرمانبەران و خەڵکی کوردستانە، بەڵکو تەنها ڕێگایەکە کە لەژێر سایەی ئەم دەسەڵاتەدا بۆ خەڵکی کرێکارو کەمدەرامەتی کوردستان ماوەتەوە تا دریژەدان بە ژیان و گوزەرانیان بدەن.
گرانی و بێکاری وبرسێتی جەماوەری خەڵک، دزی و گەندەڵی بەرپرسان و سەرمایەدارانی نزیک بەخۆیان، نەبوونی موچەی کرێکاران و کارمەندان و فەرمانبەران، نەبوونی خزمەتگوزاریەکان، سەرکوت و هێرشی بێپسانەوە بۆ سەر ئازادی و مافە فەردی و مەدەنیەکان، نایەکسانیەکی قوڵی ئابوری...تاد، هیچ ڕێگایەکی بۆ زۆربەی هەرەزۆری خەڵکی کوردستان نەهێشتۆتەوە جگە لەوەی کە بێنە مەیدان و بە هێزی سەراسەری سەربەخۆیی خۆیان، بە ڕێکخراوکردنی ڕیزەکانیان، گوشار بخەنە دەسەڵاتی سیاسی و حکومەتە بنکە فراوانەکەیان، تا ناچاری بکەن مل بەخواست و داوا ڕەواکانیانیان بدەن.
خۆپیشاندان و نارەزیەتیەکانی خەڵکی کوردستان، نەفرەتە لە دەسەڵاتیک کە دوای 24 ساڵ لە دەسەڵاتدارێتی، ناتوانێ ئاو کارەبا و سوتەمەنی، موچەی کرێکاران و کارمەندان، سەرەتاییترین خزمەتگوزاری، تا دەگات بە ئاسایش و ئارامی بۆ خەڵکی کوردستان دابین بکات، کەچی ژمارەی ملیاردیر و ملیۆنیرەکانی بردۆتە سەر، ژیانی شاهانەی بۆ بەرپرسە حزبیەکان، وەزیرو ئەندام پەرلەمان و بەرێوەبەرەو گشتیەکان، خولقاندووە. خۆپیشاندانەکانی خەڵکی کورستان، بەدژی ئەم دۆخ و هەڵ و مەرجە نەخوازاوەیە.
جەماوەری نارازی کوردستان!
ململانێی سیاسی نێوان ئەم حزبانە، دوورو نزیک پەیوەندی بە خواستە ڕەواکانی ئێوەوە نییە. هیچ کام لەم حزب و لایەنە سیاسیانە کە حەوسەڵەی گوێگرتن و وەڵامدانەوە بەخواستی ڕەوای خەڵکیان نییە، یان دەست بۆ چەک و سەرکوت و خوێن ڕشتن دەبەن یان دەیانەوێت ناڕەزایەتی و خواستە ڕەواکانی خەڵکی کوردستان بکەنە دەستمایەی بەدەستهێنانی پۆست و بەشی سیاسی زۆرتر. دەیانەوێ ناڕەزایەتی و نەفرەتی ئێوە لە دەسەڵات و حکومەتی بنکە فراونی شکستخواردوو، بکەنە ڕێگایەک بۆ سات و سەودای نێوانیان. دەیانەوێ خوێنی بە ناڕەوا ڕژاویی ڕۆڵەکانی ئێوە ببەنە سەر میزی سازانیان بۆ پۆست و بەشی سیاسی خۆیان. بۆیە ئێوە هەڵسوراوانی کریکاری و جەماوەری و خەمخۆرانی ماف و ئازادیەکانی خەڵک نابێ ڕێگە بدەن ئەم حزبانە، داوا ڕەوکانتان بە لاریدا ببەن. نابێ ڕێگا بدەن خواستی مووچە و ئاوی پاکی خواردنەوەو کارەباو سوتەمەنی‌و خزمەتگوزاریەکان بەشێوەیەکی گشتی بپێچرێتە شەرو ململانێی سیاسی نێوان ئەم حزبە گەندەڵ و بەرژەوەندخوازانە!
دابین کردنی کار بۆ بیکاران یان بیمەی بیکاری، دابین کردنی مووچەی شیاو، گیڕانەوەی دەست بەجێی موچەی 3 مانگ دواخراوی کارمەندان و فەرمانبەران، دابین کردنی ئاوو کارەباو سوتەمەنی و خزمەتگوزارییە تەندروستی و پەروەردەییەکان و زامن کردنی ئازادی و مافە فەردی و مەدەنیەکان، سزادانی ئەوانەی دەستیان لە سەرکوتی خۆپێشاندانەکان و ڕشتنی خوێنی ڕۆڵەکانی ئیوە بووە، دوور خستنەوەی بارەگای چەکداری حزبەکان لە شوێنی ژیان وکاری خەڵکی، سەرەتاییترین و ڕەواترین خواستی ئێوەیە کە دەبێ دابین بکرێن. دابینکردنی ئەم خواستانە بەبێ ڕێکخراوبوون و لەدەوری یەکتر کۆبونەوە، بەبێ جیاکردنەوەی ڕیزی خەباتکارانەتان لەم حزب و لایەنە سیاسیانەی بۆرژوازی کورد و بەشدار لە حکومەتی دزو گەندەڵیدا، مەیسەر نابێت. هێزی ئێوە و سەرکەوتنی ئێوە لە ڕێکخراوبوون و سەربەخۆبونتان دایە، لە دەوری خواستە ڕەواکانتان. کە دابین کردنی موچە و خزمەتگوازی و ئازادی و ئارامی و ئاسایشە.
حزبی کۆمۆنیستی کریکاریی کوردستان
10-10-2015