بەشێک لە کەناڵەکانی ڕاگەیاندن هەواڵێکی چەواشەکارانەیان بڵاو کردۆتەوە کە گوایە لە دوایین دیداری سەرۆک بارزانی و بەڕێز ئەیاد عەللاوی، باس لە دەستکاریکردنی مادەی 140ی دەستووری عێراق و ئەگەرەکانی گۆڕینی دەستوور کراوە و گوایە سەرۆک بارزانی ڕەزامەندیی لەسەر ئەوە دەربڕیوە کە مادەی 140 دەستکاری بکرێت.
لەکاتێکدا سەرلەبەری ئەو هەواڵە چەواشەکارییە ڕەت دەکەینەوە، ئەوەش ڕوون دەکەینەوە کە خەڵکی کوردستان دەزانن سەرۆک بارزانی داکۆکیکار و خەمخۆری ڕاستەقینەی خاک و گەلی کوردستان و مافە ڕەواکانییەتی هەرگیز سازش لەسەر ئەو ماف و دەستکەوتانە ناکات.
سەرۆک بارزانی لە چەندین بۆنەدا بەڕوونی ئەوەی ڕاگەیاندووە کە هەر گۆڕانکارییەک لە دەستووردا بکریت، نابێ لە مافە ڕەواکانی گەلەکەمان و تایبەتمەندیی هەرێمی کوردستان کەم بکاتەوە. هەموو خەڵکی کوردستانیش زۆر چاک دەزانێ کێن ئەوانەی سازش دەکەن.
نووسینگەی ڕاگەیاندنی بارەگای بارزانی
#03-11-2019#

سەرۆکی #بەرەی تورکمانی# ڕایگەیاند، کورد ناتوانێت ماددەی 140ی دەستووری ئێڕاق وەکو ئەوەی لە دەستووردا هاتووە جێبەجێ بکات؛ دەشڵێت، ئێستا نۆرەی تورکمانە پۆستی پارێزگاری #کەرکووک# وەربگرێت. ئەو پێیوایە، هیچ پێکهاتەیەک بە تەنیا ناتوانێت کەرکووک بەڕێوەببات و بڕیار لە چارەنووسی پارێزگاکە بدات.

رۆژی یەکشەممە 23-10-2022، حەسەن تۆران، سەرۆکی بەرەی تورکمانی ئێڕاق سەبارەت بە جێبەجێکردنی ماددەی 140ی دەستوور کە تایبەتە بە چارەسەرکردنی کێشەی ناوچە ناکۆکی لەسەرەکان لە ئێڕاق، لەنێویاندا ناوچە کوردستانییەکانی دەرەوەی ئیدارەی هەرێمی کوردستان، بە ئەنمار غازی، پەیامنێری تۆڕی میدیایی ڕووداوی ڕاگەیاند، ماددەی 140 پێویستی بە سازانی سیاسییە. کورد ناتوانێت ماددەکە وەکو ئەوەی لە دەستووردا هاتووە جێبەجێ بکات، چونکە تەنانەت نەتەوە یەکگرتووەکانیش لە ڕاپۆرتەکەیدا کە لە ساڵی 2018 بڵاویکردەوە، داوای سازانی سیاسیی کرد پێش جێبەجێکردنی ماددەکە.

لەبارەی هەڵوێستی تورکمان و لە بەشێکی دیکەی قسەکانیدا سەرۆکی بەرەی تورکمانی ئێڕاق ئەوەی خستەڕوو، تورکمان هەڵوێستی ڕوونە و دەبێت سازانی سیاسی لەنێوان تورکمان و کورد و عەرەب لە پارێزگای کەرکووک هەبێت لەبارەی بەڕێوەبردنی پارێزگاکە، دۆسیەی ئەمنی، ئاییندەی پارێزگاکە. ئەوکات دەتوانرێت لەسەر شێوازێک ڕێککەوتن بکرێت و بە سازان لەگەڵ هەموواندا جێبەجێ بکرێت.

حەسەن تۆرانی پێیوایە، سەپاندنی ویست لەلایەن هەر پێکهاتەیەک لە پێکهاتەکانەوە سەردەمی بەسەرچووە. یەک پێکهاتەش بە تەنیا ناتوانێت پارێزگاکە بەڕێوەببات و بڕیار لەبارەی چارەنووسی پارێزگای کەرکووکەوە بدات.

لە وەڵامی پرسیارێکی دیکەی پەیامنێری ڕووداو لەبارەی دۆخی ئەمنیی کەرکووک، سەرۆکی بەرەی تورکمانی بە نایاب ناویهێنا و داواکاریی تورکمانەکانیشی ئاشکرا کرد و گوتی، پێم وایە دۆسیەی ئەمنی ئەمڕۆ لەبەرئەوەی لەلایەن ناوەندەوە سەرپەرشتی دەکرێت، نایابە؛ پێویستە بەڕێوەبردنی کەرکووک بدرێتە پێکهاتەی تورکمان. پێکهاتەی کورد دەرفەتی خۆی وەرگرت و پێکهاتەی عەرەبیش دەرفەتی خۆی وەرگرت. ئێستا نۆرەی ڕۆڵی تورکمانە بۆئەوەی پۆستی پارێزگاری کەرکووکی پێ بدرێت.[1]

#قوباد تاڵەبانی# لە شاری #کەرکووک# لەگەڵ لیژنەی جێبەجێ کردنی ماددەی 140ی دەستور کۆبووەوە و چۆنیەتی کاراکردنەوەی لیژنەکە و چارەسەرکردنی کێشەکانی بەردەم کارەکانیان تاوتوێ کرا.لە کۆبوونەوەکەدا کە ڕۆژی پێنج شەممە #09-02-2023# لە کەرکووک بەڕێوەچوو، و سەرۆکی دەستەی گشتی ناوچە کوردستانییەکانی دەرەوەی ئیدارەی هەرێم ئامادە بوو، تاوتوێی کێشەی جووتیارانی کەرکووک و گرێبەستە کشتوکاڵییەکان و چۆنییەتی کار کردن لەسەر جێبەجێ کردنی ماددەی 140 کرا. قوباد تاڵەبانی بەوردی گوێی لە داواکارییەکان و کێشەکانی پەیوەست بەم دۆسیەیە گرت و پشتگیری خۆی بۆ چارەسەرکردنی کێشەی گرێبەستە کشتوکاڵییەکان دەربڕی و بیروبۆچوونی خۆی لەو بارەیەوە بۆ لیژنەکە خستەڕوو. هەروەها ڕایگەیاند؛ کار بۆ ئەوە دەکەین لە #بەغدا# جدیتر کارەکان سەرپێ بخرێن بۆ کاراکردنەوەی لیژنەی باڵای ماددەی 140 و دابینکردنی بودجە بۆ جێبەجێکردنی بۆ ڕاپەڕاندنی کارەکانیان. هەروەها جەختی کردەوە: مادەی 140 بابەتێکی دەستووریی یەکلاکراوەیە و تایبەتە بە گەڕاندنەوەی مافە بۆ مافخوراوان و ئەوانەی لە سیاسەتەکانی ڕژێمی پێشوو زەرەرمەند بوون، بۆیە نابێت بکرێتە بابەتی ململانێی سیاسی. لە کۆبوونەوەکەدا لیژنەکە داوای پشتگیری هەر دوو حکومەتی فیدراڵ و حکومەتی هەرێمیان کرد بۆ جێبەجێ کردنی کارەکانیان، لەلای خۆشییەوە قوباد تاڵەبانی پشتگیری خۆی بۆ دەربڕین. [1]

نووسینی : د. ئازاد عوسمان
خانەی موکریانی بۆ چاپ و بڵاوکردنەوە
چاپی یەکەم 2013

$ماددەی 140 و هۆشداریی پلاسخارت؛ ئەنجوومەنی ئاساییش دژی بە نێودەوڵەتیکردنی دایەلۆگی #هەولێر# و بەغدا نییە$
#مەجید نیزامەدین گلی#
#03-02-2023#
لە نەتەوە یەکگرتووەکان ئێراق چیرۆکی سەرکەوتنە، چونکە کەس لێرە چاوەڕوانیی زۆری لەو وڵاتە نییە؛ لە قۆناخی شەڕی #داعش# و ڕووخانی دەوڵەت بۆ ئێستا کە حکومەتێکی نوێی هەیە و هەوڵی ڕیفۆرمی ئابووری و سیاسی دەدات؛ لەبەرئەوە، وتاری هەر 15 ئەندامەکەی ئەنجوومەنەکە پڕ بوو لە پیرۆزبایی و ئافەرین و دەست خۆشی لە ئێراقییەکان کە شەڕی ناوخۆیان لەسەر پۆستی سەرۆکوەزیران ئەنجام نەدا و حکومەتیان پێکهێنا.
ڕچەرد میڵز، جێگری نوێنەری ئەمریکا لە نەتەوە یەکگرتووەکان وتارەکەی بە پیرۆزبایی ئەمریکا بۆ ئێراق و محەمەد شیاع سوودانی دەستپێکرد کە حکومەتی لە مانگی تشرینی یەکەم پێکهێنا. وتی، ئێمە حکومەتی نوێ هاندەدەین کە بەپەلە کاربکات بۆ چارەسەرکردنی ئەو کێشە زۆرانەی وڵاتەکە هەیەتی... ئێمە پێشوازی لەو ڕاپۆرتانە دەکەین دەربارەی پێشڤەچوون بەرەو ڕێککەوتن لەنێوان حکومەتی ئێراق و حکومەتی هەرێمی کوردستان لەسەر ڕێوشوێنەکانی بودجە و بەڕێوەبردنی سامانەکانی نەوت و غازی ئێراق.
لە یەکەم وتاری حکومەتی نوێی ئێراق لە ئەنجوومەنی ئاساییشی نێودەوڵەتی، ئێراق ئاماژەی بە ماددەی 140 کرد وەکوو کێشەیەک لەنێوان هەولێر و بەغدا. ئەمەش یەکەم جارە لە دوای گشتپرسیی باشووری کوردستان لە ساڵی 2017 و داگیرکردنی #کەرکووک#، ئێراق بە فەرمی دان بەوەدا بنێت کە کەرکووک و ماددەی 140 هێشتا کێشەیە و هەڵکوتانە سەربازییەکەی ئۆکتۆبەری 2017 بابەتەکەی یەکلایی نەکردووەتەوە.
سەرحەد سەردار، جێگری نوێنەری ئێراق لە نەتەوە یەکگرتووەکان لە وتارەکەیدا ڕایگەیاند، لەبارەی پەیوەندییەکان لەنێوان حکومەتی فیدراڵی لە بەغدا و حکومەتی هەرێمی کوردستان لە هەولێر. کۆبوونەوە و لێکتێگەشتن و دایەلۆگ لەنێوان بەغدا و هەولێر بەردەوامن بۆ چارەسەری کێشە گرنگە هەڵپەسێردراوەکان لەوانە دەرکردنی یاسای نەوت و گاز و دابەشکردنی داهاتە نەوتییەکان و داهاتە گومرکییەکان و هەروەها دەستنیشانکردنی سەرۆکی لیژنەی تایبەت بە ماددەی 140ی دەستوور.
نەک تەنیا باسی گرنگیی پەیوەندییەکانی نێوان هەولێر و بەغدا، بەڵکوو ئەم جارە ڕاپۆرتی سکرتێری گشتیی نەتەوە یەکگرتووەکان و وتاری نێردەکەی لە ئێراق هۆشداری تووندی تێدابوو لە مەترسیی بەردەوامیی ناکۆکییەکان لەنێو پارتە سیاسییەکانی هەرێمی کوردستان.
لەوانەیە تۆی بینەر و بیسەر بپرسیت، گرنگیدان و هۆشداریی نێودەوڵەتی چ سوودێکی هەیە لە کاتێکدا گەورەترین هۆکاری شکستی هەموو دانووستاندنەکانی نێوان هەولێر و بەغدا پەشیمانبوونەوەیە لە پەیمانەکان و ئەنجام نەدانی هەنگاوی کۆنکرێتییە بۆ چارەسەر؟ لەم دۆخەدا بۆ ئەوەی ئەم گرنگیدانە نێودەوڵەتییە سوودی هەبێت، پێویستە نەتەوە یەکگرتووەکان و لایەنە نێودەوڵەتییەکان بە فەرمی چوارچێوەیەکی نێودەوڵەتی بۆ دایەلۆگ درووستبکەن لەنێوان بەغدا و هەولێر.
بە نێودەوڵەتیکردنی ئەم کێشەیە بەتایبەتی لە بەرژەوەندیی لایەنی بێهێزە، ئەمەش بۆ ئەوەی هیچ نەبێت ڕێککەوتن و پەیمانەکانی دوێنێی بەغدا بە ئاسانی و میزاجی سیاسییەک و دادوەرێک لەبیر نەکرێت و بەدواداچوونی نێودەوڵەتی لە دواوە بێت. ئەنجوومەنی ئاساییش لە دژی بە نێودەوڵەتیکردنی پڕۆسەی دایەلۆگی نێوان هەولێر و بەغدا نییە. هەر 15 ئەندامەکەی ئەنجوومەنی ئاساییش پێشتر ئەمەیان بە ڕووداو ڕاگەیاندووە و پشتڕاستیان کردووەتەوە.
یەکێک لە هەنگاوە دیپلۆماسییەکان بۆ زیاتر بەنێودەوڵەتیکردنی پەیوەندییەکانی نێوان هەولێر و بەغدا، دەکرێت مامەڵەی ڕاستەوخۆی حکومەتی هەرێمی کوردستان بێت لەگەڵ ئەنجوومەنی ئاساییش کە ڕەزامەندیی بەغدا و سەرۆکایەتیی ئەنجوومەنەکەی پێویستە.
پرسیارم لە سەرۆکی ئەنجوومەنی ئاساییشی نێودەوڵەتی کرد کە یەکێک لە کێشە سەرەکییەکان لە ئێراق ئەو قەیرانەیە کە لەنێوان هەرێمی کوردستان و حکومەتی ئێراقی هەیە و ئێستا لەگەڵ بڕینی بودجە، ئەو پەیوەندییانە لە قۆناخێکی خراپترە وەکوو چۆن لە ڕاپۆرتی سکرتێری گشتیش ئاماژەی پێکراوە؛ پێشتر باسی ئەوە هەبوو کە جارێک نوێنەرێکی حکومەتی هەرێمی کوردستان بانگهێشتی ئەنجوومەنی ئاساییش بکرێت بۆ ئەوەی قسە لەسەر ئەو بابەتانە بکات. ئایا هیچ گفتوگۆیەکتان ئەنجامداوە لەسەر ئەوە لە کاتی کۆبوونەوەکانتان بۆ ڕێکخستنی کۆبوونەوە دەربارەی ئێراق؟
ڤانیسا فرەیژەر، سەرۆکی ئەنجوومەنی ئاساییشی نێودەوڵەتی لە وەڵامدا ڕایگەیاند: ڕوونە کە دۆخی ئێراق هەمووی باش نییە، بەڵام ئێمە دەبێت دان بەوەشدا بنێین کە پێشڤەچوونی پۆزەتیڤ ڕوویداوە. بۆ نموونە ئێمە پێشوازی لەوە دەکەین کە سێ لە وەزیرانی حکومەتە نوێیەکەی ئێراق ئافرەتن و هەروەها ڕیفۆرمی ئابووری و سیاسیش ئەنجامدراوە.
ئێراق تەنیا یەکێکە لە 51 بابەت لە ئەجێندای جیهانی کە ئەنجوومەنی ئاساییش مامەڵەی لەگەڵ دەکات و سەرۆکایەتیی ئەنجوومەنەکە دەڵێت: ئێمە بودجە و دەسەڵاتی تەواومان داوەتە یۆنامی و نێردەی نەتەوە یەکگرتووەکان بۆ ئەوەی یارمەتیدەر بن لە ڕێگەگرتن لە دووبارە تێکچوونەوەی سەقامگیریی ئێراق. [1]

ناوی نووسەر/ پشتیوان ئەحمەد
بابەت/ سیاسیی، دەستووری
چاپ/ 2012
تیراژ/ 1000 دانە

پەیامێک لە سەرۆک بارزانییەوە بۆ ڕای گشتی
بەناوی خودای بەخشندە و میهرەبان
سووتاندنی دەغل و دانی هاووڵاتیانی کورد لە ناوچەکانی ماددەی 140 و هەروەها کوشتن و ئازاردان و بریندارکردنی خەڵکی کورد لەو ناوچانەدا کە ماوەیەکە بووەتە دیاردە و ڕۆژانە ئەنجام دەدرێت، تاوانێکی گەورە و زوڵمێکی ئاشکرایە لە هاووڵاتیانی بێتاوانی کورد دەکرێت.
ئەوەی لەو ناوچانە دەگوزەرێت پێشێلکردنی یاسا و دەستوور و بەهاکانی مرۆڤایەتیە و زەنگی مەترسیشە بۆ ژیانی خەڵک و داهاتووی ئەو ناوچانە. ئەم زوڵمەی کە ڕۆژانە دەکرێت، سزادان و هەڵتەکاندنی خەڵکە لەسەر ناسنامەی نەتەوەیی.
سەپاندنی ئەو دۆخە بەسەر جووتیاران و خەڵکی سڤیلی ئەو ناوچانە بە هیچ شێوەیەک جێگەی قبوڵکردن نییە و پێویستە کۆمەڵگەی نێودەوڵەتی و لایەنە پەیوەندیدارەکان لەسەر ئەو بارودۆخە نالەبارە بێنە دەنگ و حکوومەتی عێراقیش دەبێ بەرپرسیارێتی هەڵبگرێت و کۆتایی بەو ستەم و یاساشکێنیە بهێنێت کە لە ناوچە کوردستانییەکانی دەرەوەی ئیداری هەرێم لەدژی هاووڵاتیانی کورد ئەنجام دەدرێت.
#مەسعود بارزانی#
#30-05-2019#

19-11-2017

دووبارەبوونەوە و فراوانبوونی بەردەوامی هێرشە تيرۆرستييەکان لە عێراق، بەتايبەتيش لە ناوچەکانی مادەی (140)ی دەستوور دۆخێکی زۆر مەترسيدار و ئاڵۆزی بۆ دانيشتوانی ئه و ناوچانە لە تەواوی پێکهاتە ئايينی و نەتەوەييەکان هێناوەتە ئاراوە کە ماوەيەکی درێژە هەڕەشەی کوشتن و ڕفاندن و دەرکردنيان لەسەرە و ئەم دواييانەش بەردەوام بەرهەمە کشتوکاڵييەکانيان دەسووتێنرێن و ڕۆژانە دەکرێنە ئامانجی هێرشی دڕندانەی تيرۆرستی و شەهيد دەکرێن.
وەک چەندين جار پێشتريش هۆشداريمان لە ترسناکيی دۆخەکە داوە، دووپاتی دەکەينەوە کە بەردەواميی ئەم دۆخە هەڕەشە لە ئاسايش و سەقامگيری و پێکەوەژيان دەکات و بۆ ڕووبەڕووبونەوەی مەترسييەکان و پاراستنی سەر و ماڵی هاووڵاتيان و پێکهاتەکانی ئه و ناوچانه، ميکانيزمێکی کاراتری هەماهەنگيی حکوومەتی فيدراڵ و هەرێمی کوردستان و هاوکاريی پێشمەرگە و هێزە عێراقييەکان و بەردەواميی پشتيوانيی هاوپەيمانيی نێودەوڵەتيی دژی #داعش# پێويستە، چونکە تيرۆرستان بۆشاييی ئەمنيی ئه و ناوچانەيان قۆستووەتەوە، سەرۆکايەتيی هەرێمی کوردستانيش لەم پێناوەدا هەموو هەوڵ و تواناکانی دەخاتە گەڕ.
دوايين هێرشی تيرۆرستی بۆ سەر دوو دێی کاکەيی لە ناوچەی خانەقين کە لە ئەنجامدا ژمارەک هاووڵاتی شەهيد و بريندار بوون، نموونەيەکی بەرچاوی پەرەسەندنی ترسناکی و ئاڵۆزيی دۆخەکەن کە دەبێ هەنگاوی خێرا بۆ ڕێگری لە دووبارەبوونەوەيان بگيرێتە بەر. وێڕای بە توندی سەرکۆنەکردنی ئه و تاوانکارييە، پرسە و سەرەخۆشی ئاراستەی خانەوادە و کەسوکاريان دەکەم و هاوبەشی خەميانم، خوای مەزن دڵنەوايی و سەبوورييان بداتەوە و هيوای زووچاکبوونەوە بۆ برينداران دەخوازم.
#نێچيرڤان بارزانی#
سەرۆکی هەرێمی کوردستان
#15-06-2020#

ماددەی (140) زیاتر لە (9) ساڵ بەسەر وادەی جێبەجێکردنیدا تێپەڕیوە، بەڕێز دەوڵەتمەداری عیراقیش، لەخولی دووەمی سەرۆک وەزیریدا، پەیمانیدا لەماوەی ساڵێکدا، بڕگەکانی ماددەکە جێبەجێ‌ بکات، بەداخەوە، ئەم پەیمانەش نەبرایەسەر.

ئێستاش کە عیراق دووچاری دۆخێکی مەترسیداری نەخوازراو بووەو دوژمنانی دیموکراسی ‌و فیدراڵ، دەیانەوێ‌ پرۆسەی سیاسی عیراق هەڵگێڕنەوەو سیستمی سیاسی بگێڕێنەوە بۆ دۆخی (شۆڤێنی- سەلەفی جیهادی) سوپای عیراق ‌و دەزگا ئەمنییەکانیش لەماوەیەکی زۆر کورتتدا، داڕوخێنراون، ئا لەم دۆخەدا، بۆ وڵاتانی جیهان ‌و ناوچەکەو هێزە سیاسییەکانی عیراقیش دەرکەوت، کە هەرێمی کوردستان ‌و هێزی پێشمەرگە، سەرەڕای بڕینی بودجەو مووچەو چەک ‌و سوتەمەنی ‌و هەڵبەستنی تۆمەتی سەیرو سەمەرەش بۆ کوردو پێشمەرگە، بەڵام هەر پێشمەرگە توانی بەعسی ‌و داعشییەکان لەهەندێک ناوچەی ستراتیجی نەینەواو لەسەراپای کەرکووک ‌و خانەقین ‌و دووز خورماتوو، ڕۆڵێکی مێژوویی لەپاراستنی ناوچە دابڕێنراوەکانی دەرەوەی هەرێم بگێڕێ‌ ‌و سەرو سامانی خەڵک بپارێزێت، ئەمە جگە لەوەی هەرێمی کوردستان بۆتە پەناگەی ئارامی سەدان هەزار دەربەدەرکراوی عەرەب ‌و تورکمان ‌و مەسیحی ‌و خەڵکی تریش. بۆیە:

مەکتەبی سیاسی یەکێتیی نیشتمانیی کوردستان جەخت دەکاتەوە کە:
یەکەم: بەڕاشکاوی ئەمساڵ، پێش ڕووداوەکانی ئێستاش وتومانە، ئەوپەڕەکەی هەتا بەهاری ساڵی ئاییندە، کورد پشووی هەیە، ئەگەر مادەی (140) بەتەواوی جێبەجێ‌ نەکرا، بەبڕیاری سەرکردایەتی کوردایەتی، کێشەکە یەکلایی دەکەینەوە.

دووەم: هێزی پێشمەرگە گەڕاوەتەوە سەر زێدی باوو باپیری خۆی. یەک بست ئەرزی هیچ پێکهاتەیەکی ترمان زەوت نەکردووە. بەڵکو پێکهاتەکانی تریش پارێزراوی هێزی پێشمەرگەو ئاسایش‌و پۆلیسن. بۆیە، بێگومان چاوەڕوانین حکومەتی تەوافوقی ڕاستەقینەی عیراق، کە هەقوایە بەم زووانە دابمەزرێ‌، یەکێک لەئەرکەکانی حکومەتە چاوەڕوان کراوەکە، ئەوەیە کە هەڵەی حکومەتەکانی لەمەوبەر سەبارەت بەناوچەکانی مادەی (140) دووبارە نەکاتەوە.

سێیەم: هەموو لایەک دەبێ‌ باش بزانن کە هێزی پێشمەرگە، هێزی بەدیهێنانی ئامانجە سیاسی ‌و دەستورییەکانی عیراق ‌و کوردستان ‌و پارێزەری پرۆسەی دیموکراسیشە، پێشمەرگە حەس حەس" نییە هەتا بەبڕیاری مەرکەزی، ناوچە پارێزراوەکان جێبهێڵێ‌، ئەو لایەنەی شکستی خواردووە لەپاراستنی عیراق‌و جێبەجێکردنی دەستورو مادەی (140) دەبێ‌ بخرێتە ژێر بەرپرسیارێتی، نەک تازە تازە کورد چاوەڕوان بکات بەپاساوی یەکێتیی خاکی عیراق ‌و ئەو دەستورەی جێبەجێیان نەکرد، دەستی بەدەستی پێ‌ بکرێتەوە.

چوارەم: یەکێتیی نیشتمانیی کوردستان، سیاسەتی یەکگرتوی کوردستانی پەسەند کردووە. تاقە نوێنەری ڕەسمی یەکێتی لەوەفدی هاوبەشی هێزە سیاسییەکانی کوردستاندا، هەڤاڵ فریاد ڕەواندوزی یە، سیاسەتی یەکێتیش سەبارەت بەعیراق، حکومەتی تەوافقی‌و ئیئتیلافی نیشتمانی ڕاستەقینە‌و پۆستە سیادییەکانیش ئاشکرایە. حکومەتی پەراوێزخستنی لایەنەکان ڕەتدەکەینەوە. لایەنەکانی شیعە سەرپشکن لەهەڵبژاردنی کاندیدی سەرۆک وەزیران، پۆستی سیادی سەرۆک کۆماریش بۆ کوردەو لەناو کوردیشدا سورین لەسەر ئەوەی بۆ یەکێتیی نیشتمانیی کوردستانە. سەرۆکی پەرلەمانیش جارێکی تر پیرۆزی هێزەکانی سوننەیە.

بەم لێدوانە ڕایدەگەیەنین، کە سیاسەتی یەکێتیی ڕۆشنە، لەدروشمی مەرکەزی هەڵبژاردنی نیسانی ئەمساڵیشدا ئەو سیاسەتە بەرجەستە کراوە کە (یان جێبەجێکردنی مادەی 140، یاخود ڕاپرسی) مەکتەبی سیاسی‌و ئەنجومەنی سەرکردایەتیش، داڕێژەرو بڕیاردەرو پابەندی ئەو سیاسەت‌و دروشمەن. هەر ئەم سیاسەتەش دەستەبەری یەکهەڵوێستی کوردو کوردایەتی هێزە سیاسییەکانە، نەک لێدوانی لابەلا کە زیان بەم سیاسەتە یەکگرتووەی کوردستان دەدات.

راگەیاندنی مەکتەبی سیاسی
یەکێتیی نیشتمانیی کوردستان
29-06-2014