بەبڕیاری دەستەی دەستپاکی عێراق لە #کەرکووک# کارکردن لە 179 پڕۆژەی خزمەگوزاری ڕاگیرا. بەپێی ئه و ڕاگەیێندراوەی کە دەستەی دەستپاکی بڵاویکردووەتەوە، پڕۆژەکان جگە لەوەی ماوەیەکی زۆرە جێبەجێکردنیان تەواو نەبووە، گەندەڵی داراییشی تێدایە و ژمارەیەک بەرپرسی لەسەر دەستگیرکراوه.
ئازاد جەباری ئەندامی ئەنجوومەنی پارێزگای کەرکووک بە تۆری میدیای ڕووداوی ڕاگەیاند: ئه و هەموو پارەیە بۆ کەرکووک دێت نەدەزانی بڕەکەی چەندە و نە لەسەری کۆدەبینەوە و نە دەزانین چۆن خەرج دەکرێ، ئەمە ئه و کێشانەیە کە گەیشتوونەتە دەستی دەستەی دەستپاکی کەرکووک، ڕاکان سەعید خۆی پڕۆژەکان هەڵدەبژێرێت و خۆشی بڕیاری لەسەر دەدات و جێبەجێی دەکات، لەم کارانەش دەستەی دەستپاکی بەغدا ئاگاداره.
هێشتا کاتی دەستپێکردنەوەی پڕۆژەکان دیاری نەکراوە، 86 پڕۆژەیان ڕێژەی کارکردن تێیدا سفرە، پرۆژە وەستێنراوەکان لە بواری ئاو و ئاوەڕۆ و قوتابخانە و دروستکردنی نەخۆشخانە و یاریگای وەرزشیە، پڕۆژەیەکی ئاو کە 140 ملیار دیناری بۆ تەرخانکراوە 18%ی جێبەجێ کراوە، نەخۆشخانەی 600 قەرەوێڵەیی 170 ملیار دیناری بۆ خەرجکراوە و چوار ساڵە جێبەجێ نەکراوە.
شەش پرۆژە له و پڕۆژانەی ڕاگیراون، سەر بە فەرمانگەی شارەوانی کەرکووکن‌ و ماوەی ساڵێک زیاترە بەردی بناغەیان دانراوە و بەشێوەی ڕاستەوخۆ بەبەڵێندەر دراون و شارەوانی کەرکووکیش لێی بێ ئاگایه.
سەردار عەلی، بەڕێوەبەری شارەوانی کەرکووک دەڵێت: ئه و بودجەیەی کە بۆ پارێزگای کەرکووک هاتووە کە هێشتا نازانین بودجەی پەرەپێدانە یان بودجەی پترۆدۆلاره،‌ ئەوە خۆیان خەرجی دەکەن و تەنانەت ئه و پڕۆژانەی کە تایبەتە بە شارەوانیش ئەوان جێبەجێی دەکەن، ئێمە هیچ بۆمان نییە تەداخوڵ بکەین و بزانین چۆن و بە چ شێوەیەک جێبەجێ دەکرێت.
راگرتنی ئەو‌ 179 پرۆژەیە لەکاتێکدایە، مانگی ئۆکتۆبەری ڕابردوو دەستەی دەستپاکی کەرکووک لەسەر دیارنەمانی 47 ملیار دیناری دیکە دۆسیەی لێکۆڵینەوەی بۆ ئیدارەی کەرکووک کردبووەوە، کەبۆ ئاوەدانکردنەوەی ناوچە تازە کۆنترۆڵکراوەکان بە ئیدارەی کەرکووک درابوو.[1]
#08-12-2018#

ماوەی چەند ڕۆژێکە جارێکی تر لە تۆڕە کۆمەڵایەتییەکان لیستێک بڵاو بووەتەوە دەربارەی ئه و کەسانەی کە کەیسی گەندەڵییان هەیە و لەلایەن دەستەی دەسپاکی هەرێمی کوردستانەوە لێکۆڵینەوەیان لەگەڵ دەکرێت، بۆیە ئێمە بە هەموو لایەکی ڕادەگەیەنین کە بڵاو کردنەوەی ئه و لیستە پێوەندی بە دەستەوە نییە و لای ئێمەوە بڵاو نەکراوەتەوە.
ئەوە چەندان جارە بەمشێوەیە لە هەندێک پەیجی تۆڕە کۆمەڵایەتییەکان لیستی هاوشێوە بڵاو دەکرێتەوە چەندان کەس تۆمەتی گەندەڵیان بەناوی دەستەی دەسپاکییەوە دەخرێتە پاڵ، بۆیە داوا دەکەین بەهیچ جۆرێک ناوی دەستەی دەسپاکی بۆ هیچ مەبەستێک بەکار نەهێنرێ.
هەروەها هەر لێدوان و قسەیەک بەناوی بەڕێز د.ئەحمەد ئەنوەر سەرۆکی دەستەی دەسپاکی لە هەر ماڵپەڕ و پەیج و ڕۆژنامەیەک بڵاو کرابێتەوە نوێ نییە، چونکە لەماوەی چەند مانگی ڕابردوو هیچ چاوپێکەوتنێکی ڕۆژنامەوانی ئەنجام نەداوە.
کاری دەستەی دەسپاکی هەرێمی کوردستان بە جۆرێکە لە قۆناغی لێکۆڵینەوە ناوی هیچ کەسێک بڵاو ناکاتەوە.
دووپات لەسەر ئەوە دەکەینەوە کە دەستەی دەسپاکی هەرێمی کوردستان دامەزراوەیەکی فەرمییە و چالاکییەکانی بەفەرمی و به ئاشکرا بڵاو دەکاتەوە و سەرچاوەی زانیارییەکانیش ماڵپەڕی فەرمی دەستەیە.
#21-02-2020#

لە ڕۆژی جیهانیی دژە گەندەڵیدا #دەستەی دەستپاکی#ی هەرێمی کوردستان ڕایگەیاند 123 کەیسی گەندەڵی ڕەوانەی دادگاکان کردوون، هەرچەندە هەوڵی چاکسازی دراوە، بەڵام هەنگاوەکان بە خاوی و لەسەرخۆ تێپەڕیون.
دەستەی دەستپاکی ئەمڕۆ (یەکشەممە، #10-12-2017#) کورتەیەکی لە چالاکییەکانی لە کۆنگرەیەکی ڕۆژنامەڤانیدا ڕایگەیاند و ئاماژەی بۆ ئەوەکرد ئەو ژمارانەی بڵاوی دەکەنەوە، تەنها ژمارەی ئەو کەیسانەیە، کە زانیاری لای دەستەی دەستپاکیە، واتە مەرج نییە ئەوە قەبارەی ڕاستەقینەی گەندەڵی لە هیچ شار و شارۆچکەیەکی کوردستان پیشان بدات.
#حاکم ئەحمەد# ئەنوەر، سەرۆکی دەستەی دەستپاکی لە کۆنگرە ڕۆژنامەڤانییەکەدا ڕایگەیاند چاکسازی لە ماوەی دوو ساڵی ڕابردوودا لە کوردستان هەوڵی بۆ دراوە، چ لە ئاستی سەرۆکایەتی هەرێمی کوردستان و چ لە ئاستی سەرۆکایەتی حکومەتی هەرێمی کوردستان، بەڵام هەنگاوەکان بە خاوی و لەسەرخۆ تێپەڕیون، دەستەی دەستپاکی هەر لە سەرەتاوە کۆمەڵێک پێشنیازی جددی هەبووە وەکو دەزگایەکی چاودێری، بۆ ئەوەی حکومەت بتوانێت کاراتر ئەرک و چالاکییەکانی خۆی وەکو ئامرازێک بۆ خزمەتکردنی هاووڵاتیان ئەنجام بدات.
سەرۆکی دەستەی دەستپاکی هەرێمی کوردستان، دەڵێ دەستەی دەستپاکی چەند فەرمانگەیەکی هەیە، هەر فەرمانگەیەک چالاکی تایبەت بەخۆی ئەنجامدەدات، یەکێک لە فەرمانگە چالاکەکانیش فەرمانگەی یاساییە، کە نوێنەرایەتی دەستە دەکات لەسەرجەم دانیشتنەکانی دادگاکان، چ ئەوانەی تایبەتن بە کەیسەکانی گەندەڵی، چ ئەو سکاڵایانە دەچنە دەستە یان دەستە تۆماریان دەکات، هاوکات کاری وردبینی و چاودێری یاسایی بوونی بڕیارەکانی حکومەت دەبن.
حاکم ئەحمەد ئەنوەر، دەشڵێ فەرمانگەی یاسایی لەماوەی ڕابردوودا زۆر کاری لەسەر کۆمەڵێک بابەتی وەکو مەسەلەی خانەنشینیی نایاسایی و بەرزکردنەوەی نایاسایی پلە کردووە، هەموو ڕاپۆرتەکانیش بەرزکراونەتەوە، ئێستاش پرۆسەیەکیان لەبەردەستە، کە وردبینیە لە بڕوانامەی دکتۆرا لە زانکۆ فەرمییەکان، تاوەکو ئێستاش دوو هەزار 372 فایلی هەڵگرانی بڕوانامەی دکتۆرا لە زانکۆ فەرمییەکان واتە حکومییەکان هاتووەتە بەردەستیان، 906 دۆسیە وردبینی تێداکراوە، دوای تەواوکردنی پرۆسەی وردبینی، ڕاسپاردە دەدەیەنەوە زانکۆکان.
حاکم ئەحمەد ئەنوەر، ئاماژە بە فەرمانگەیەکی دیکەی گرنگی سەر بە دەستی دەستپاکی دەکات، کە ئەویش فەرمانگەی شەفافیەت و خۆپارێزییە لەبارەی کاری ئەو فەرمانگەیەش گوتی ئەمساڵ کەمتر زانیاریمان لەسەر فۆرمی ئاشکراکردنی سامان بڵاوکردووەتەوە، هۆیەکەشی ئەوە نییە ئەو پرۆسەیە وەستابێت، بەڵکو پرۆسەکە بەردەوامە، وردبینیەکی زۆر لەسەرجەم فۆرمەکان کراوە، بە هاوکاری فەرمانگەکانی تۆمارەکانی خانووبەرە و ئۆتۆمبێل، جیاوازی هەیە، ئێمە خەریکی وردبینین.
سەبارەت بە کەیسەکانی گەندەڵی و ئەو کەیسانەی ئەمساڵ لەلایەن دەستەی دەستپاکییەوە کاریان لەسەر کراوە، سەرۆکی دەستەی دەستپاکی هەرێمی کوردستان، گوتی سەبارەت بە داوای هەواڵدەری لە هەرسێ پارێزگای: هەولێر، سلێمانی و دهۆک 197 داوای هەواڵدەریمان هەیە، داوای هەواڵەدەری ئەو داوایانەن کە لێکۆڵەرانی دەستەی دەستپاکی لەگەڵ یاساییەکانی خۆمان لێکۆڵینەوەی تێدا دەکەن، واتە هێشتا نەخراوەتە بەردەم دادوەری لێکۆڵینەوە.
حاکم ئەحمەد ئەنوەر، سەبارەت بە داوای سزایی گوتی ئەو داوا سزاییانە ئێستا لەژێر سەرپەرشتی دادوەری لێکۆڵینەوەدان لە هەرسێ پارێزگاکە و لە هەندێک لە قەزاکان کە لێکۆڵینەوەی تێدا دەکرێت، 178 داوای سزاییە، واتە بە هەردوو داوای سزایی و هەواڵدەری ئەوەی لای دەستەی دەستپاکی لێکۆڵینەوەی تێدا دەکرێت و ئەوەی لە لێکۆڵینەوەیە 375 کەیسی گەندەڵییە.
سەبارەت بەو کەیسانەی ڕەوانەی دادگا کراون، حاکم ئەحمەد ئەنوەر دەڵێ لەماوەی ڕابردوودا 123 کەیسی گەندەڵی ڕەوانەی دادگاکان کراون، لەنێو ئەو 123 کەیسەدا 39 کەیسیان بڕیاری کۆتاییان تێدا دراوە، لەو 39 کەیسەدا 18 فەرمانی ئیدانەی تێدایە، فەرمانیشی تێدایە کە لە چەند مانگێکەوە تاوەکو هەشت ساڵ بەندکردنە، لەو کەیسانەی حکومی کۆتاییان تێدا دراوە، ئەوەی ماوەتەوە و چاوەڕوانی حکومی دادگاکان دەکەن 57 کەیسە، کە ئێستا لە قۆناخی دادگاییکردن ماوەتەوە.
سەرۆکی دەستەی دەستپاکی هەرێمی کوردستان، دەڵێ زۆرترین ئەو داوا سزاییانەی تۆمارکراون، لە کەرتی وەزارەتی دارایی و ئابوورییە، کە نزیکەی 76 کەیس دەبێت، دوای ئەوە وەزارەتی ناوخۆ، بەدوای ئەوانیش وەزارەتی پەروەردە و وەزارەتی کارەبا دێت.[1]
10-12-2017

دەستەی دەستپاکی لێکۆڵینەوەی لە چەندین دۆسیەی گەندەڵی لە کەرتی گشتیدا کردووە و هەر دۆسیەیەکیش گەندەڵی تێدا بووبێت ڕەوانەی دادگای کردووە، دەستی بە لێکۆڵینەوە لە چەند دۆسیەیەکی دیکەش کردووە، لەوانە: بڕوانامەی مامۆستایانی زانکۆ.
$112 کەیسی گەندەڵی لە دادگان$
موشیر ڕەشید، بەڕێوەبەری گشتی فەرمانگەی یاسایی دەستەی دەستپاکی باس لەوە دەکات کە زۆرترین کەیسی گەندەڵی لە #هەولێر# نێردراون بۆ دادگا و کەسەکانیش سزادراون ساڵی ڕابردوو چەند کەیسێکمان گەیشتنە قۆناغی دادگایی کە 62 کەیس بوو، ئەمساڵیش 50 کەیسمان هەیە، واتە 112 کەیس لە دادگایە، کە هەولێر پشکی شێری لەو کەیسانە بەرکەوتووە بە 56 کەیس، #سلێمانی# 38 کەیس و #دهۆک#یش 18 کەیس.
بە گوتەی مورشید، لەو کەیسانە 32 کەیس یەکلایی بوونەتەوە، 17 کەیسیان لە هەولێر کە شەشیان حوکمدراون، دوو ئازادکراون و نۆش بەر لێبووردنی گشتی کەوتوون. لە سلێمانیش هەشت کەیس یەکلابوونەتەوە، سێ‌ کەیس حوکمدراون و سێ‌ کەیسیش ئازادکراون، دووشیان بەر لێبووردنی گشتی کەوتوون. هەروەها لە دهۆک حەوت کەیس یەکلابوونەتەوە، شەش کەیس حوکمدراون و یەکێکیشیان بێتاوان بووە و ئازاد کراوە.
لێبووردنی گشتی ئەو کەسانە ناگرێتەوە کە گەندەڵییان کردووە، بۆیە بەرپرسەکەی دەستەی دەستپاکی دەڵێت: بڕیاری ئازادکردنی ئەو 11 کەیسەمان لە دادگا تەمیز کردووەتەوە.
دۆسیەی ناردنە دەرەوەی پارەی گشتی یەکێکە لەو بابەتانەی پێشتر زۆر قسەی لەسەرکراوە، دەستەی دەستپاکیش بەدواداچوونی بۆ کرد، بەڵام بەڕێوەبەری گشتی یاسایی دەستەکە دەڵێت حکومەتی هەرێمی کوردستان لەوەدا سەرکەوتوو نەبوو ناردنە دەرەوەی پارەی گشتی لە هەرێمی کوردستان و عێراقیش هەبوو، ئێمە پڕۆژە یاسایەکمان بەناوی گەڕاندنەوەی پارە دایە پەرلەمانی کوردستان، بەڵام لەم دۆسیەیەدا سەرکەوتوو نەبووین، تەنانەت حکومەتی عێراقیش سەرکەوتوو نەبوو، چونکە بەشێکی زۆری ئەو پارانە سپی کراونەتەوە.
$فرۆشتنەوەی چەکی بەڵێندەران$
ئەو فەرمانبەرانەی مامەڵەیان بە چەکی بەڵێندەرانەوە کردبوو لەلایەن دەستەی دەستپاکییەوە درانە دادگا، بەڵام هێشتا کەیسی بەشێکیان یەکلانەکراونەتەوە. موشیر ڕەشید دەڵێت: هێشتا کەیسەکە لە دادگایە، لێکۆڵینەوە لەگەڵ هەموو بانکەکانی هەولێر و سلێمانی و دهۆک کراوە، ئیجرائات بەرامبەر ئەو خەڵکانەی تێوەگلابوون کرا، کەیسی هەندێکیان لە قۆناغی لێکۆڵینەوە و دادگاییدایە، ژمارەیەک لەوانەش دۆسیەکەیان یەکلایی بووەتەوە و بێتاوان دەرچوون، بەڵام ئەوەی گرنگ بوو توانرا سنوورێک بۆ فرۆشتنەوەی چەکی بەڵێندەران دابنرێت.
$سەدان خانەنشینی نایاسایی لە #وەزارەتی پێشمەرگە#$
پێشتر دەستەی دەستپاکی ڕایگەیاندبوو کە 464 کەس بەشێوەیەکی نایاسایی خانەنشین کراون، ئێستاش کار لەسەر خانەنشینی نایاسایی لە #وەزارەتی پێشمەرگە# دەکات. مورشید ڕەشید دەڵێت لە #08-08-2016# نووسراومان بۆ سەرۆکایەتی هەرێمی کوردستان کرد، داوامانکردووە لیژنەیەکی باڵا پێکبهێندرێ‌ بەمەبەستی وردبینیی لە دۆسیەی خانەنشینکراوان کە بەدەر لە یاسا خانەنشین کراون و بەدەم داواکارییەکەمانەوە هاتن، جگە لە خانەنشینە پلە تایبەتە نایاساییەکان، خەریکی کەیسی خانەنشینکراوانی وەزارەتی پێشمەرگەین، کە بەهەزاران کەس بە پلەی لیوا، عەمید، عەقید خانەنشین کراون. هەزاران کەسی دیکەش بە پلەی سەربازی خانەنشینکراون و ئێستا لە دەرەوەن.
$1557 پلە باڵای نایاسایی$
بەخشینی پلە بەپێی یاسای ڕاژەی شارستانی بە هەردوو پێوەری بڕوانامە و خزمەت دەبێت، بەڵام دەستەی دەستپاکی دەڵێت ژمارەیەک کەس بە بڕوانامەی نزم پلەی بەرزیان پێدراوە، موشیر ڕەشید دەڵێت پێدانی پۆست لە حکومەتدا بەپێی بڕوانامەی کەسەکە دەبێت، بەڵام 1557 کەس بە بڕوانامەی نزم، پلەی بەرزی وەزیفیان پێدراوە، دەرچووی ئامادەیی هەبووە پلەی باڵای پێدراوە، خەڵک هەیە لەگەڵ یەکەم دامەزراندن بە پلەی شارەزا دامەزرێندراوە، حکومەت بە بڕیار ئەمەی کردووە، بۆیە ئاگادارمان کردوونەتەوە کە دەبێت چارەسەر بکرێن، تەنانەت لە کابینەی هەشتیش هەندێک وەزیر ئەم کارەیان کرد، بەڵام ئێمە ڕامانگرت.
$لێکۆڵینەوە لە بڕوانامەی مامۆستایانی زانکۆ$
کۆمەڵێک زانیاری و قسە لەسەر بڕوانامەی مامۆستایانی زانکۆ هەبووە، لەوانە بڕوانامەی ساختە و کەموکوڕی لە بڕوانامەکانیان، بۆیە دەستەی دەستپاکی دەستی بە وردبینی لە بڕوانامەی مامۆستایانی زانکۆ کردووە، موشیر ڕەشید گوتی: وردبینیمان بۆ بڕوانامەی مامۆستایانی زانکۆ کردووە و گومانمان لە نزیکەی 600 بڕوانامەی مامۆستایانی زانکۆ هەیە، مامۆستای زانکۆ هەیە ساڵی 2016 لە زانکۆی مووسڵ دەرچووە کە ئەوکات مووسڵ بەدەست #داعش#ەوە بووە، ئایا ئەو مامۆستایە چۆن لەو ساڵەدا لە زانکۆی #موسڵ# دکتۆرای وەرگرتووە؟! بۆیە داوامان لە #وەزارەتی خوێندنی باڵا# کردووە وردەکاری ئەو بڕوانامانەمان بۆ ڕەوانە بکەن، کە ژمارەیان نزیکەی 600 بڕوانامەیە.
بەگوتەی بەرپرسەکەی دەستەی دەستپاکی چوار ساڵ لەمەوبەر هیچ وەزارەتێک میلاکی خۆی نەزانیوە. موشیر ڕەشید دەڵێت ساڵی 2014 ئامارێکمان لەسەر میلاک ئامادەکرد، کاتێک داوامان لە وەزارەتەکان کرد هیچ وەزارەتێک نەیدەزانی میلاکی چەندە و بەبێ پلان فەرمانبەریان دامەزراندبوو، تەنانەت لەبەر زۆری فەرمانبەر، دەوامی دامودەزگاکان کرابوو بوو بە شەفت.
بەڕێوەبەری گشتی فەرمانگەی یاسای دەستەی مافی مرۆڤ گوتیشی لە هەر گوندێک بیری ئاو، مزگەوت، قوتابخانە، بنکەی تەندروستی هەبێ‌، هەموو خەڵکی گوندەکە کراوە بە فەرمانبەر لەو شوێنانە و هەمووشیان جووتیارن، قوتابخانە هەیە 30 کارگوزاری هەیە، مزگەوت هەیە 20 خادمی هەیە، نیوەی خەڵکی گوندەکان بوونە فەرمانبەری حکومەت و کاری جوتیاریشیان دەکرد، لایەنە سیاسییەکان لە زۆنی سەوز و زەرد بۆ هەڵبژاردن و دەنگپێدانیان نیوەکەی دیکەشیان دامەزراند.
رەخنەیەکی زۆر لە دەستەی دەسپاکی دەگیرێت کە ماوەی 4 ساڵە نەیانتوانیوە وەکو پێویست بەدواداچوون بۆ کەیسەکانی گەندەڵی بکات، موشیر ڕەشید لەو بارەیەوە دەڵێت یەکلانەبوونەوەی کەیسەکان بەهۆی کەمتەرخەمی دەستەی دەستپاکی نییە، ئێستا هیچ بودجەیەکمان نییە، تەنیا نەسریەیەکی زۆر کەممان هەیە و بەشی هیچ ناکات، پێشتر 7 ملیار دیناریان پێدەداین، ئێستا 500 ملیۆن دیناریشمان وەکو نەسریە پێنادەن، هەروەها توانای مرۆییمان کەمە، کۆی کارمەندەکانمان ناگاتە 150 کەس، بە هەموو هەرێمی کوردستان 8 لێکۆڵەرمان هەیە، لەکاتێکدا دەستەی دەستپاکی عێراق نزیکەی 800 لێکۆلەری هەیە.
موشیر ڕەشید پێیوایە ئەگەر حکومەت بیەوێ‌ بەرەوڕووی گەندەڵی ببێتەوە، دەبێ‌ دادگایەکی تایبەت بۆ دادگاییکردنی گەندەڵکاران دابمەزرێنێ‌.[1]
#09-08-2018#

سەرۆکی دەستەی دەستپاکی هەرێمی کوردستان ئاماژە بەوە دەکات، لەچەند ڕۆژی داهاتوو کار‌ و چالاکی ساڵی 2014 یان ئاشکرادەکەن و باس لەوەش دەکات، لەناو وەزیرەکانی حکومەتی هەرێمی کوردستان، تائێستا وەزیرانی پێشمەرگە‌ و سامانە سرووشتییەکان و دوو بەرپرسی دیکە بە پلەی وەزیر سەروەت و سامانی خۆیان ئاشکرا نەکردووە.
هەر بەگووتەی دەستەی دەستپاکی ئێستا لە 96%ی بەرپرسەکان فۆرمەکەیان گەڕاندووەتەوە و سامانەکەیان ئاشکراکردووە و ناتوانن سەروەت و سامانی بەرپرسان ئاشکرابکەن، چونکە پەرلەمان ڕێگەی پێنەداون سەروەت‌ و سامانی بەرپرسەکان بخەنەڕوو.
دەستەی دەستپاکی هەرێمی کوردستان بەنیازە لەمساڵدا گۆڕانکاری لە فۆڕمی ئاشکراکردنی سەروەت‌ و سامانی بەرپرسان بکەن، بە شێوەی ساڵانە پرۆسەکە بەردەوامبێت بۆ ئەوەی هەر بەرپرسێک موڵک و سەروەتی زیادیکرد یا کەم بوویەوە ئاگاداربن لێی.
ماددەی پێنجی یاسای دەستەی دەستپاکی توانای لێپرسینەوەی لە سەرۆکایەتی و ئەنجوومەنی دادوەری هەیە، لەکاتێکدا پێشتر یاساکە تەنها مافی بەدواداچوونی هەبووە، بەڵام ئێستا بەپێی یاساکە دەتوانێت لێکۆڵینەوەش بکات.
- 18-03-2015

حاکم ئەحمەد ئەنوەر، سەرۆکی دەستەی دەسپاکی هەرێم ئاماژەی بەوەکرد، هەر وەزیرێک فۆرمی دەستەی دەسپاکی نەگەڕێنێتەوە دواتر، دواجار ئاگادارکردنەوەی بۆ دەردەکەن، لە ئەگەری نەگەڕاندنەوەی لەدوای ئەو دوو ئاگادارکردنەوەیە، ناوەکەی ئاشکرا دەکەن.
باسی لەوەشکرد، لە ساڵی داهاتودا فۆرمی دەستەی دەسپاکی دەدەن بە سەرۆکایەتی هەرێم و ئەو ڕاوێژکارو بریکارە نوێیانەی کە پۆستیان لە حکومەت وەرگرتوە.
ئەوەشی خستەڕو، هەر وەزیرو پەرلەمانتارێک لەکاتی وەرگرتنی بەرپرسیارێتیدا هەتا کاتی خانەنشینبونی سامانی زیادبکات، وردبینی لەگەڵ دەکرێت و لە ئەگەری تۆمەتباربونی بە دەسکەوتنی سامانی ناڕەوا، لێکۆڵینەوەی لەگەڵ دەکەن.
وتیشی، ماوەی چەند هەفتەیەکە وردبینییان لە سامانی پەرلەمانتارانی خولی پێشو دەستپێکردوە، بەوتەی سەرۆکی دەستەی دەسپاکی، چەند پەرلەمانتارێک سامانیان لە ڕادەبەدەر زیادیکردوە کە لەگەڵ داهاتیاندا یەکناگرێتەوە.
سەرۆکی دەستەی دەسپاکی هۆکاری یەکلایینەکردنەوەی دۆسییەکان و دواکەوتنیشی گەڕاندەوە بۆ نەبونی دادگایەکی تایبەت بۆ دادگایکردنی دۆسییەکانی تایبەت بە گەندەڵی.[1]