چاشتەو خاڎمی
هورئەوەگېڵنای و ئاماڎەکەردەی: #ئەسعەد ڕەشید#
بەشی دوەمە
من، ئا ڕازی ژیوایمە کە دمای شەسس و چن ساڵێ گوزەرنانم، ڕاس بییەن بە چاشتەو خاڎمی، نە دەمو قۊمیاکام ویرمەنەن، نە مەتاوۊ یۊ شۊنەو یۊیرە بە زنجیرە بگېڵنوشاوە. ئاڵۊزیێنې و پەی وېچم نمەزانو کامشان وەڵې کامیشانە بییەن، بەڵام مزانو ئانەی نویستەنم، یام دیڎەنم، یام جە وېم قۊمیان، یام دەمو ڕەفېقا هامسەفەریمەنە ئەژنیەنم و گېرتەنم، پەوکەی یاوانې ئا باوەڕەیە کە چاشتەو خاڎمی پەڕ بە پۊسو وېشەن.
سەرنام: حاڵو شاعېری
من فرە باسو شاعېرە کۊنەکام وانان و ئەژنیەن، پاسەمزانو ئەچی وەرکۆتو میانینە، یام دلې فارس و عەرەبی و کورڎینە، ڕەنگە من پېسە شاعېری حاڵم جە گرڎی وەشتەر بییەبۊن، مەوانوە کە فڵانە شاعېر تاریفې فڵانە خەلیفەیش بە شېعرێ کەردەن، دە هەزار، سەڎ هەزارې زەڕشان پەنەدان، بەڵام حاڵش چەنین بییەن! تۊ بارەش وەرچەمات، سەڎ شاعېرې هەر یۊ شەوێ وېش وادان و شېعرێ درېژەش بە قەڎ و باڵاو خەلیفەی، یا پاشایرە هوردێنە، ئارۊ خەلیفە ڕوو وەشەن، تووڕە نییەن، ئیجازە هەن بلمې خزمەتش، بەڵې فەرماودې، دەی شېعرې بواندێ، شا و خەلیفە جە هەری هەرتەر، ئەچاگەنە شېعرەو شاعېرێشاش پەسینێنە، خەڵات دریان پاڎی، ئیتر کریێنې بەرۆ. نیزامی کە پاشاو شېعرېن، ماچۊ من تووتەو ئاسانەیتەنان، چەمم ئینا پېشە گۊشتێوە پەیم فڕەدەی. فیردەوسی خاوەنو شانامەی، ئەپاسە وېش وەراوەر بە مەحمووڎ خەزنەوی بە سواڵکەر نیشانەدان، پییا بەزەییش مەی پۊرە. فرېشان ئەچا شاعېرە گۆرا بە سواڵکەری ژیوێنې، ئانې کە وېم دیېنې و فرە جە وېم شایەرتەرې بېنې، پېسە مەلا مارفی کۊکەیی، شېعرێ سەڎ بەیتییەش پەی بازرگانێ نویسە کە یاوناش عەرشو ئاسمانی، خەڵاتەکەش نیم کیلۊ گۊشتی دوە تمەن بایی بۍ پەیش کیانا، من کە تازە دەسم بە شېعر واتەی کەرڎەبې، ئەجېم منیچ مشیۊ تاریفې پیێوە گۆرەی بڎەو، تاکو خەڵات وەربگېروون، چن شېعرێم جە مەتحو ئەحمەڎ ئاغای حاجی باییز ئاغاینە واتې، خەڵاتەکەم ئانەبې کە واتش؛ ئا هەرە عال عالش واتېنې، ئانە پەی من بی بە دەرسێ گۆرە، ئیتر وازم چانەی ئارد پەی خەڵاتی شېعرە واچو، با هەر پەی عەشقو دڵو وېم بۊن، عاشقو ئازاڎی کورڎەسانی بییا، کەیفم ئۍ پەنەش، جا گەر مەتحەو قازی محەمەڎ، یام ستالین و ڕوسیای کەرېنا، چوونکوم بە ڕەمزو ئازاڎی کورڎەسانیش زانېنا، هەرگیز چەمم چانەی نەبې پووڵێ بنیا دلې باخەڵېم، پەی وېم کەسابەت کەرېنا و شېعرەکېچم خەڵاتێ بېنې پەی گەلو کورڎی، ویرمەن جارێشا شېعرێم دلې کۊنیشتێنە واناوە، قازی محەمەڎ ئافەرینش کەردا و ماچۊ؛ سەڎ تمەنې بەخششت مڎەو پەنە، هەر دلې کۊنیشتەکەینە واتم: ئا سەڎ تمەنە بڎریۊ بە دەفتەر و قەڵەم پەی وانکارە فەقیرەکا مەدرەسەی. تەنانەت کە کتېبو (هاڵەکۊکی) کە جە تەبرېز چاپ کریا، واتشان چوار هەزار تمەنېت هەقو تەئلیفی هەن، هەرچن ئانە قانونی و سواڵەیچ نەبې، گەرەکم نەبی. ئاوارەییچمەنە جە ئېراق، هەر بە ڕەنجو شاناو ئارەقو میاچەما، وېم وێ کەرېنا. شېعرەکېم بە دیاری پەی ئازاڎی کورڎەسانی بېنې، ئا بارەیچە حورمەتێ فرەش جە لاو خەڵکیۆ پەی پېڎا کەردا. نویستەی شېعرېنە فرە ئازاڎ بېنا، هەرگیز بە شېعرە سواڵە نەکەرېنا، بەڵام گەر داواو یاردی و قەرزیم جە هەر ئەشناسێ بکەردێ، بە ڕوەی وەشۆ داواکېم قبووڵە کەرۍ. بەشێ جە کتېبو (چێشتی مجێور)، نویستەی هەزار موکریانی، فاڕای پەی سەرو زوانی هۆرامی: ئەسعەد ڕەشید.[1]