ناو: #سۆران# ئیسماعیل حەمەوەیس ڕەسوڵ
نازناو: مامۆستا سۆران
ناوی باوک: ئیسماعیل حەمەوەیس ڕەسوڵ
ساڵی لەدایکبوون: 1957
ساڵی شەهیدبوون: 1991
شوێنی لەدایکبوون: #تەوێڵە#
شوێنی شەهیدبوون: #هەڵەبجە#
$ژیاننامە$
سۆران ئیسماعیل حەمەوەیس ڕەسوڵ کە ناسراوە بە مامۆستا سۆران لە ساڵی 1957 لە شارەدێی تەوێڵەی دەڤەری هەورامان لە دایکبووە، خوێندنی سەرەتایی و ناوەندی و ئامادەیی لە تەوێڵە خوێندووە.
ساڵی 1981 بڕوانامەی ئەندازیاری کشتوکاڵی لە زانکۆی موسڵ وەرگرتووە.
شەهید سۆران لە کاتی خوێندنی قۆناغی ناوەندی لە تەوێڵە پەیوەندی بە ڕێکخستنەکانی #پارتی دیموکراتی کوردستان# و یەکێتی قوتابییانی کوردستان کردووە، دوای چوونی بۆ شاری موسڵ دوو شانەی ڕێکخستنی لەناو زانکۆی موسڵ درووستکردووە، لە هەمانکاتدا لەناو شاری #سلێمانی# کادری شانە نهێنییەکان بووە و دوو خوشکی بە ناوەکانی نەرمین و کەژاڵ یارمەتیدەری بوونە بۆ گەیاندنی نامە و پەیامەکانی بۆ شانە نهێنییەکانی ناو سلێمانی.
شەهید سۆران دوای تەواوکردنی زانکۆ و لە ساڵی 1982 بووەتە پێشمەرگە لە ڕێکخراوی تەوێڵەی سەربە لێژنە ناوچەی هەڵەبجەی لقی چواری پارتی دیموکراتی کوردستان، کە لەو کاتەدا شەهید کامیل بەرپرسی ڕێکخراو بووە، بەهۆی چاو کراوەیی و ئاست بەرزی لە کاری ڕێکخستندا هەر زوو نادر هەورامی بەرپرسی لقی چوار دەیگوازێتەوە نزیک خۆی لە بارەگای لق.
ساڵی 1983 بووەتە ئەندامی لێژنە ناوچەی هەڵەبجەی سەربە لقی چواری پارتی دیموکراتی کوردستان.
ساڵی 1985 لەگەڵ هەریەک لە دیاری حسێن و حەمە تەقێ دووبارە دەگوازرێنەوە بارەگای لقی چوار، لە هەمانکاتدا لە ساڵانی هەشتایەکان ئەو کاتەی کە نادر هەورامی گوازراوەتەوە بۆ لقی دووی پارتی و بووە بەرپرسی لق، شەهید سۆران بووە بە هاوەڵی نادر هەورامی لە سنووری لقی دوو تا ساڵی 1987.
ساڵی 1987 لە داستانی ئەحمەد ئاوا بەشداری کردووە و بە پارچەی گوللە (ئار-پی-جی) سەری بریندار بووە.
ساڵی 1988 بووەتە کارگێڕی لێژنەی ناوچەی #دەربەندیخان#ی سەربە لقی چواری پارتی دیموکراتی کوردستان، دواتر بووەتە بەرپرسی خاڵەسنووری قاسمە ڕەش.
ساڵی 1991 لە کاتی هێرشبردن بۆ گرتنەوەی ڕەبایەی سەرتەکی بەمۆی سەربازانی ڕژێمی #بەعس#، لە نزیک ڕەباییەکە مینی چێندراوەیان پێدا تەقیوەتەوە و شەهید سۆران و هاوسەنگەرێکی بەناوی سەید نەسرەدین حامید شەهید بوونە و عەباسی هاوسەنگەریان بەسەختی بریندار بووە. زمانی عەرەبی و فارسی بەباشی زانییوە.[1]