=KTML_Bold=Em Li Deskeftiyên Şehîdan Xwedî Derkevin=KTML_End=
Kurdiyar Direyî
Nakokiyên Partiyên Siyasî li #Rojavayê kurdistanê# , di kirîza sûriyê de û hewildanên avakirina helwesteke kurdî li hember geşedan û bûyeran de , du alîtî bi xwe re aniye , di milekî de partiyên siyasî di Rojavayê Kurdistanê de ku hemcêwiyên hevdû, û ji yek partiyê zêdebûne , xwe dibin sîwana encûmena niştimanî a kurd li Sûriyê ENKS de komî ser hev kirine , her weha Partiya Yekîtiya demokratîk û hin partiyên din jî , tev li kesayetên serbixwe û rêxistinên civaka sivîl , dibin sîwana Tevgera Civaka Demokratîk TEVDEM’ê de xwe birêxistin kirin..
Hemû hewildanên yek-kirina helwestên herdû aliyan , ji ber sedemên hundirîn û herêmî û nakokiyên partiyên kurdistanî ve badî hewa çûne û bi demê re asta nakokiyan derbaskirin û ketin asta dijminatiyê û hevdu tunekirinê..
Tevgera Civaka Demokratîk TEVDEM ,projeya fedraliya demokratîk dibin navê fedraliya Rojava-Bakurê Sûriyê de weke armanc bilind kiriye her weha ENKS projeya fedraliya Kurdistana Sûriyê weke armanc îlan kiriye…
Pêşketinên TEV-DEM’ê di hundirê Rojava de û roj bi roj lawazketina ENKS , hişt ku ENKS têkeve gav-avêtinên dûrî berjewendiyên xwe weke tevgereke siyasî beriya ku dûrî berjewendiyên Rojava û xewnên kurdan bikeve , ta gihişte asta ku destê xwe têxe destê hovtirîn dijminên kurdan , mîna Turkiyê û mûxalefta Sûriyê ku ixwan elmuslimîn pêşengtiya wê dike…
Hem jî ji neçarî , bêgavî , xwendina siyasî a şaş û hem jî ji ber berjewendiyên kesayetî ve , ta ku roja îro herkes dizane bi taybet miletê kurd ku êdî ENKS gihiştiye asta mirîzindî bûnê…..
Lê belê raste ENKS tu encam ji kurdan re bi dest nexistiye û her weha projeya wê a fedraliya Kurdistana Sûriyê bi tenê weke durişmekê maye û ji rastiya xwe valabûye , Ema dijminên kurdan dikarîbûn pir sûdê jê bigrin , bi taybet dewleta Turkiyê ku herdem wan weke kurdên baş bi nav dike, TEVDEM û Xweseriya Demokratîk weke projeyeke teroristan bi navdike û eşkere li tunekirina wan digere…
Ji xwe dagîrkirina Efrînê û helwestên ENKS li hember vê dagerkiriyê ku jêre li def û zirnê xistiye , û weke serkeftinê bi navkirine,paşê têgihiştine ku êdî bi tenê ew destekbûn , bûye mîna guleya dawî di rastteqîneya netewperwerî û kurdayetiya ENKS de .
Lewra jî di vê demê de ku êdî Rojavayê Kurdistanê û projeya Xweseriya demokratîk û hewildanên avakirina Rêveberiyeke giştî ji bo bakûr û Rojhilatî Sûriyê re û gelemşeya siyasetên navnetewî û herêm, her weha Rêjîm û alîgirên wê li ser deverên rizgarbûyî ji hêla QSD ve, pêwist dike ku em li hundirê xwe vegerin û di hemû warên ku lawazî û ne zelalî û nerastî heye em sererast bikin,bi taybet di milê siyasî,Aborî,Civakî û Leşkerî de.
Di milê siyasî de; yekkirina helwestên tevgera siyasî a kurd û avakirina sîwaneke siyasî a kurd di Rojavayê Kurdistanê de ,temamkar be ji rêveberiya Bakûr û Rojhilatî Sûriyê re û vekirina derfetan li ber partiyên siyasî û dayîna roleke berbiçav ji wan re ku bi erkê xwe li hember Rojavayê Kurdistanê ve rabin, lewra pêwîste ku danûstandinên rasteqîne ENKS jî di nav de bi hemû aliyan re bibe,lê ne bi Rêveberên xwe yên ku destên wan di xerakirin û dagîrkirina Efrînê û piştgiriya Turkiye û çeteyên Îtîlafa Sûrî kirine û dikin re .
Di milê Aborî de ; xwedî-derketina li malbatên şehîdan û başkirina Rewşa wan a Aborî , her weha rê girtina li ber perçemokên şevê ku deskeftiyên Rojava di xizmeta xwe û berjewendiyên xwe yên malbatî û kesayetî de bikartînin..ji xwe gal-gal û gazincên ji niştecihên Rojava bilind dibin ku êdî bêhna fesadê ji gelek sazî û dezgehên xweseriya demoqratîk difûre , her weha vekirina derfetên kar ji ciwan û perîşan û kedkaran re..
Di milê civakî de ; guhdayîna li rêbazên pêşxestin û têgihiştina civakê de û xurtkirina beşdarkirina civakê di hemû pirojeyên ku pêşeroja wan xêz dike de , rê girtina li ber keyseperestiyê û bermahiyên Rêjîmê ku li ser navê Xweseriya Demokratîk û tevgerê rewşkirin,nakokî û tengasiyan derdixin , her weha ji holê rakirina bendî tî û hev-reşkirin,nebawerî û ne zelaliya rewşa heyî ango lêvegera li civakê û ji nava civakê gav avêtin ..
Di milê leşkerî de ; xwedî derketina li şervanên YPG,YPJ û QSD û parastina mafên wan di hemû beşên jiyanê de her weha xurtkirina rêxistin û rêbazên berxwedanê û amadebûn ji hemû geşedanan re.
Di dawiyê de dema em weha diyardikin , mebest ewe ku êdî em rê nedin ENKS ke din ku bi şêwazekî din bi rengekî din bi navekî din ava bibe…
Em li deskeftiyên şehîdan xwedî derkevin ,di dema ku Rojava –Bakurê Sûriyê ber bi serkeftinê ve diçe..
[1]