ناو: سەید عەبدولڕەحمان
نازناو: موسەنیفزادە
ناوی باوک: سەید محەمەد ساڵح
ساڵی لەدایکبوون: 1972
شوێنی لەدایکبوون: زارین-#دەربەندیخان#
$ژیاننامە$
شێخ عەبدولڕەحمان موسەنیفزادە
عەبدولڕەحمان کوڕى سەید محەمەد ساڵح کوڕى سەید محەمەد کوڕى سەید عەبدولڕەحمان کوڕى سەید محەمەد کوڕى سەید ئەحمەد (لەقەب سەید) کوڕی سەید عەبدولڕەحیم کوڕى سەید مەحمود کوڕى سەید محەمەد کوڕى سەید مەحمود (لەقەب ڕەجب) کوڕى سەید محەمەد کوڕى سەید جەمالەدین کوڕى سەید یوسفجان کوڕى سەید حەسەنى چۆڕى (لەقەب ئەبوبەکرى موسەنیف).
نازناوم سەید عەبدولڕەحمان موسەنیفزادەیە، هۆکارى ناونانم بە (موسەنیفزادە) بۆ زیندوو ڕاگرتنى ناوى باپیرە گەورەمە (سەید حەسەنى چۆڕى) کەبە (ئەبوبەکرى موسەنیف) ناسراوە.
لە ساڵی 1972ز. لە گوندی زارێن لە بنەماڵەی (سەید) لە هۆزی تاوگۆزی باشوور چاوم بەژین هەڵهێناوە.
لە ساڵى 1978ز لە قوتابخانەى زارێن پۆلى یەکەمى سەرەتایم تەواوکردووە، یەکەم مامۆستام ناوى (حسێن حەمەمراد) بووە، دانیشتوى شارۆچکەى #کەلار# بووە.
زارێن کۆنترین گوندى تاوگۆزى باشوورە مێژووى ئاوەدانییەکەى پتر لە (400) ساڵ دەبێت، گوندی زارێن بیناى (قوتابخانە، نەخۆشانە، مزگەوت، ئاشى مەکینە، شوێنى نیشتنەوەى فڕۆکە)ى تێدابووە.
لە #15-08-1978#ز. ناوچەی تاوگۆزى بەر شاڵاوى ڕاگواستنی ڕژێمى #بەعس# دەکەوێت، ئێمە نزیکەی 25 ماڵ بوین لە هۆزەکەمان دابڕاین و لە ئوردوگای زۆرەملێی #عەنەب# لە #هەڵەبجە# نیشتەجێ کراین، من سەرەتای ژیانم لە شاری هەڵەبجەدا دەستی پێ کرد.
لە ساڵى (1982-1983ز.) پۆلی شەشەمى سەرەتایم لە قوتابخانەی شەپۆلى سەرەتاى تێکەڵاو تەواوکردووە.
لە ساڵى (1985-1986ز) پۆلى سێیەمی ناوەندیم لە قوتابخانەی ناوەندى گۆرانی کوڕان تەواوکردووە.
لە ساڵى (1986-1987ز) بەشدارى ڕاپەڕینە جەماوەرییەکەى شارى هەڵەبجەم کردووە، ئەو ساڵە لە پۆلى چوارەمى گشتیدا بووم.
لە ساڵی (1987- 1988ز) لە پۆلی پێنجەمى زانستیدا بووم ئاوارەی وڵاتی ئیران بووم بە هۆکارى کیمیابارانی شارى هەڵەبجە لەلایەن ڕژێمى بەعسەوە.
لە ڕێکەوتی #16-03-1988#ز، سێ شەو و سێ ڕۆژ لە ژێر زەمیندا لە شارى هەڵەبجەدا ماینەوە، پاشان ڕۆشتین بۆ وڵاتى ئێران، لە ئاوارەیدا لە ئۆردوگاکانی وڵاتى ئێران لە شارى (کرمان و #جوانڕۆ#) ژیانم بەسەر بردووە.
لە ڕێکەوتی #01-10-1988#ز. گەڕامەوە بۆ ئێراق و بردییانین بۆ شارەدێى باینجان لە دەشتی #بازیان#، لە پاش سێ ڕۆژ هەموو هەڵەبجەییەکانى بازیانیان برد بۆ ئۆردوگاى #گردەچاڵ# لە دەشتی #هەولێر#، کاتێک لە ئێران گەڕاینەوە ماڵى ئێمە سەربازێکى عەرەبى شیعە ئۆتۆمۆبێلکەى لێ دەخوڕى لە ڕێگادا زۆر جنێوى بە کورد دەدا، دەیوت ئێوە ڕزگارتان بوو بوو لە ستەم و زۆرى دەوڵەتى ئێراق بۆچى هاتنەوە بۆ ئێراق، دەیوت وەڵا هەمووتان دەکوژن و زیندەبەچاڵتان دەکەن و ئەنفالتان دەکەن، ئێمە تێگەشتین کە ئەم سەربازە عەرەبە دڵسۆزى ئێمە بوو، بەڵام کار لە کار ترازا بوو، ئێمە هاتبووینەوە ژێر دەسەڵاتى ئێراق و تواناى گەڕانەوەمان نەبوو، زۆر دەگریا بۆ کورد بۆ ئەنفالى کورد، بەڵام ڕژێم زۆر زاڵم و ستەمکار بوو، کەس نەیدەتوانى بێ فەرمانى بکات، ئێمە بە سەربازەکەمان وت یارمەتیمان بدە، بە (100) دینارى ئەو زەمانە کە زۆرزۆر بوو بۆ ئەو کاتە، کاتژمێر سێى شەو ماڵەکەى لە باینجانەوە بۆ هێناینەوە بۆ شارەدێى زەڕایەن.
من زۆربەی قوتابخانەکانی #سلێمانی# و شارەزوور گەڕام بەڵام کەسیان نەیان دەتوانی وەرمان بگرن، بە ناچارى ڕۆشتم بۆ هەولێر، لەوێ پێیان وتین بچن بۆ شارەدێى بەحرکە، ماوەی 20 ڕۆژ لە سانەوی بەحرکەى تێکەڵاو وەرگیراین، بەڕێوەبەرەکەمان ناوی (م. فەرەج) بوو، ڕەفیق حیزبی بوو، لیپرسراوى منەزەمەى حیزبى بەعسى شارەدێى بەحرکە هەمووى بوو، هەرچەند لەگەڵ ئێمەدا هەڵسوکەوتى نەرم و نیان و باشبوو، بەڵام لە دوایدا دەریان کردین، بە بیانوی ئەوەی مێشکی قوتابییەکانی ئەوان تێک دەدەین، چونکە ئێمە بە وتەی ئەوان بە پێشمەرگە لە قەڵەم درابوین و مۆری پێشمەرگە بە فۆرمەکانمانەوە بوو، لەبەر ئەوە بردییانین بۆ گردەچاڵ کە زۆربەى هەڵەبجەییەکان لەم ئۆردوگایەدا بوون، هەندێکیشیان لە ئۆردوگاى بەرحوشتردا بوون، لەوێ دەواریان بۆ هەڵداین و ناویان لێنا قوتابخانەى گردەچاڵى تێکەڵاو کە بەئێواران و بەیانیان دەوامى تێدا بوو، دەوامێکیان ناوەندى بوو، دەوامەکەی تریان دواناوەندى بوو، لە ساڵى (1988-1989ز) پۆلی پێنجەمی زانستیم لە دواناوەندی گردەچاڵى تێکەڵاو تەواوکرد، ئەو ساڵە لەژێر خەیمەدا بووین، ژیانمان زۆر ناڕەحەت بوو، لە هەمان کاتدا کۆلێژە بەرزەکانی وەک کۆلیژى (پزیشکی، ئەندازیار) لە قوتابخانەکەماندا بەدەست هێنرا، قوتابخانەکەمان سەری زۆر بەرز بوو، پلەیەکی زۆر باشمان بە دەست هێنا، لە هەولێردا دەنگماندایەوە، هەڵەبجەییەکان زۆر بەعیزەت و نەفس بەرز بوون، خاوەن شەهامەت و نەجابەت و کەرامەت بوون، سەری بڵندیان نەوی نەکرد نە بۆ ستەمکارانی ڕۆژگار و نە بۆ کاسەلێسی بەردەم ماڵان، لە هەمانکاتدا هەولێرییەکان زۆر بەغیرەت و خاوەن پیاوەتی بوون بە لۆری (ئارد، خەیمە، پێداویستییان) بۆ دەهێناین، کاتێک ئەم ڕووداوانە دەنووسمەوە فرمێسک بە چاوەکانمدا دێتە خوارەوە، چونکە نەهامەتى و چەرمەسەرى و ئەنفال و کیمیاباران و کوردقڕانم بیر دەکەوێتەوە، زۆرکات دڵی خۆم بە نووسینەکان و خوێندنەوەى هۆنراوەکانم خۆش دەکەم، کە زۆربەى گەڕانەوەى مێژووى ئەو ڕووداوە ڕاستییە تاڵانەن.
لە ڕێکەوتی #06-03-1989#ز. وانەمان نەخوێند و مانمانگرت.
لە ڕێکەوتی #22-03-1989#ز. لەگەڵ پۆلەکانی (چوارەم، پێنجەم، شەشەم) بە ئامادەبوونی (م. بەلقیس، م. خوناو) کۆڕێکی شیعریمان گرت من هۆنراوەی نەورۆزم خوێندەوە.
لە ساڵى (1989- 1990ز) لە پۆلى شەشەمی زانستیدا بووم لەسەر هۆنراوەی نەورۆز گیرام.
بە شدارى ڕاپەڕینە جەماوەریەکەى ساڵی (1990-1991ز.) کوردستانم کرد، هەر لەم ساڵەدا دووبارە ئاوارەى وڵاتى ئێران بوومەوە.
لە ساڵى (1991-1992ز.) پۆلى شە شەمى زانستیم لە دواناوەندى زەڕاینى کوڕان تەواوکردووە.
لە ساڵى (1993-1994ز) پەیمانگاى مامۆستایانى مەڵبەندی سلێمانیم تەواوکردووە، بە فەرمانى وەزارى ژمارە (6324) لە (#21-12-1994#) فەرمانى دامەزراندنم لە هەرێمى نیمچە سەربەخۆى کوردستانەوە بۆ دەرچوو.
لە (#15-01-1995#ز) بە فەرمانی کارگێرى ژمارە (155) گرام بە بەڕێوەبەرى قوتابخانەی (کانی پاشاى سەرەتای تێکەڵاو) لە بنارى بەمۆى ناوچەى تاوگۆزى، قوتابییەکانی لە گوندەکانی (کانی پاشا، کانی وەیسکە، تووە وشکێ، حاجی ئاوا) پێک هاتبوو.
هەتا ئێستا لە خزمەتکردن بەردەوامم لە قوتابخانەى هەوارانى سەرەتای لە شارەدێى (وارماوا، زەڕایەن)، خاوەنی دیوانێکى شیعری چاپکراوم بەناوى (دیوانی تاوگۆز)، کە لە ساڵى 2013ز. بڵاوم کردەوە، پەرتووکی (#ساداتی تاوگۆز#)م لە ساڵی 2023ز. بڵاو کردەوە.
چەند پەرتووکێکی ترم نووسیووە کە ئێستا ئامادەى چاپکردنن بەناوەکانى: (لە کامێرای بینینەوە بۆ لاپەڕەکانی مێژوو، پوختەى عەرووز، هۆنراوەى منداڵان، ڕووناکى دڵان، دیاری پەیامبەر، دیارى نیشتمان).
لە ساڵى 2017-2018ز. بەڕێز پڕۆفیسۆر دکتۆر فاروق نەقشبەندى کە جێگرى سەرۆکى زانکۆى هەڵەبجە بوو تەلەفۆنى بۆ کردم و داواى لێکردم کە بچم بۆ لاى بۆ زانکۆ، کاتێک ڕۆشتم پێى وتم کە دەبێت بخوێنیتەوە چونکە تۆ دەبێت شارەزایت لە زمان و ئەدەب و مێژووى کوردیدا هەبێت، من پاش بیست و سێ ساڵ خزمەتکردن لە بوارى زانستی بیرکاریدا دووبارە لەسەر داواکارى بەڕێز پڕۆفیسۆر دکتۆر فاروف نەقشبەندى بوومەوە بە خوێندکارى زانکۆ، قۆناغەکانى (یەکەم، دووەم، سێیەم، چوارم)ى زانکۆم بە سەرکەوتویى لە ڕیزەکانى پێشەوەى زانکۆ (عەشرە ئەوائیل) تەواوکرد.
لە ساڵى (2020-2021ز.) بڕوانامەى بەکالۆریۆسم لە زمان و ئەدەبى کوردیدا لە کۆلیژى پەروەردەى #شارەزوور# کە سەر بە زانکۆى هەڵەبجە بوو بە دەستهێنا.
لە ساڵى (2000- 2005ز.) جێگرى بەڕیوەبەرى (خوێندنگەى ئایینی شێخ مەعروفی نێرگسەجاڕ) بووم لە هەڵەبجەى تازە.
لە ساڵى2000ز. خێزانم پێکەوەنا لەگەڵ (نیان حەمەعەبدوڵڵا حەمەڕەشید) کە لە بنەماڵەیەکى پیرخدرییە لە گوندى ئەحمەدبڕندەى ناوچەى وارماوا لە شارەزوور، باوکی چوار منداڵم بە ناوەکانى: (سەید کۆشیار، سەید دانیار، سیماخان، نماخان). [1]
=KTML_Link_Facebook_Begin=https://www.facebook.com/musanifzada=KTML_Link_Facebook_Between=فەیسبووکی: سەید عەبدولڕەحمان موسەنیفزادە=KTML_Link_Facebook_End=