=KTML_Bold=Ji bo jiyana azad û demokratîk, em li hember rêxistinên sûc û dagirkeriyê bibin yek=KTML_End=
Halîl CEMAL
QSD’ê di 27-09-2023’an de, di serî de herêma Dêrazorê, li rojhilatê Firatê “Li dijî şaneyên DAIŞ’ê, kolberên hişbirê û rêxistinên çete yên zilmê li gel dikin”, “Operasyona Bihêzkirina Ewlehiyê” da destpêkirin. Operasyon berfireh dibe û didome. Navenda Ragihandina QSD’ê rojane agahiyên derbarê operasyonê de parve dike.
Operasyon li ser bingehê daxuyaniyên QSD’ê didome. Derdorên cuda bi fermî yan jî li ser medyaya dijîtal daxuyaniyên dijî operasyonê parve dikin, an jî nûçeyên nerast belav dikin. Hinek hêzên çekdarên ku bermayên DAIŞ’ê jî di nav de hene, ji qadên girêdayî rêveberiya Şamê tên û destwerdana herêma operasyonê dikin.
Dewleta Tirk û çeteyên girêdayî wê li derdora Minbicê dest bi êrişên dagirkirinê kirine. Bi berxwedana hêzên Meclîsa Leşkerî ya Minbicê û gel Minbicê ev êriş heta astek girîng hatin şikandin. Lê dewleta Tirk a dagiker û çeteyên girêdayî wî hêzên xwe li derdora Minbicê kom dikin. Dewleta Tirk a faşîst-dagirker Operasyona Dêrazorê û pevçûnên bi DAIŞ û rêxistinên sûc re weke derfetekê dîtin, li ser xeta Til Temirê jî êriş û zêdetkirina hêza xwe didomîne.
Ev êrişên bi DAIŞ, Komara Tirk a faşîst û rêxistinên sûcê re girêdayî ne, di rastiyê de derdixe holê ku kî li pey hesabên çawa ne.
Polîtîkayên dewleta Tirk a faşîst ên li dijî Kurdan û Rêveberiya Xweser vekirî û zelal in. Armanc ew e ku Kurdan bi temamî qir bike yan jî ji vê erdnîgariyê paqij bike. Di serî de li Efrînê, li tevahî herêmên dagir kirine, vê polîtîkayê li ber çavê tevahî cîhanê dimeşîne. Vê polîtîkayên ne tenê li ser bingehê êrişên leşkerî pêk tîne. Rêbazên herî qirêj ên şerê taybet dixe dewrê û pêk tîne. Torên hişbirê, kolberiya mirovan, sîxwirtî, laşfiroşî, qetilkirin û hwd dixe dewrê. Ji derveyî vê jî, ji bo jiyana demokratîk û azad a li Bakur û Rojhilatê Sûriyê ava bûye ji holê rake, di her derfetê de hewl dide gelê Kurd û Ereb bîne beranberî hev. Di vê mijarê de rêbazên şerê taybet bi bandor bikar tîne. Ji ber vê jî hewl dide operasyona li Dêrazorê weke ku li dijî Eşîrên Ereb e nîşan bide, Rêveberiya Xweser û QSD’ê ku cîhan bi heskirinek mezin lê dinêre bê îtibar bike.
Rêveberiya Şamê jî heman polîtîkayê dide meşandin. Ew jî hewl polîtîkaya bê îtibarkirinê dimeşîne, hewl dide derfetê ji rewşa heyî ya pevçûnan bigire. Taybet jî hewl dide operasyona heyî weke ku li dijî Eşîrên Ereb e nîşan bide, di serî gelê Ereb li dijî Rêveberiya Xweser rabike. Her çendî neyê gotin ku çiqas bi rêveberiya Şamê ve girêdayî ye jî, komên çeteyan ên girêdayî rêveberiya Şamê bi rihetî Firat derbas kirin, hem êrişî QSD’ê hem jî êrişî gelê Dêrazorê dikin. Ev çete saziyên xizmeta gel dikin û amûrên gel didizin. Zextê li gel dikin ku li dijî Rêveberiya Xweser û QSD’ê derbikevin.
Hêzên Koalîsyonê weke ku rewşa heyî nizanin bang li QSD’ê dikin da pevçûnên bi DAIŞ û çeteyên dijminê gelin re rawestînin.
Nêzîkatiyên hêzên koalîsyonê yên beriya operasyonê û piştî operasyonê jî polîtîkayên pragmatîk in. Hêzên koalîsyonê têkiliyên ku bi eşîrên Ereban re çêdikirin, ev eşîr anîn rewşa hêzek leşkerî yê xweser. Ev nêzîkatiyên koalîsyonê bû sedem ku îro rewşek wiha derkeve holê. DAIŞ û çeteyên sûcê jî li ser bingehê van têkiliyan givrikî bûn. Çawa ku ji ber nakokiyên di navbera hêzên herêmê de dibe sedema li Dêrazorê sûcên bêpewre li dijî gel bên kirin, heman demê de ev nêzîkatiya koalîsyonê jî zemîn ji van sûcan re ava dike.
Taybet jî piştî serdana hovê faşîst Hakan Fîdan, beriya serdana dîkratorê faşîst RT. Erdogan a ji bo Rûsyayê, Wezîrê Karê Derve yê Rûsyayê Lavrov bang li Komara Tirk û Şamê kir ku Lihevkirina Edeneyê nû bikin û zindî bikin. Ev nîşan dide ku Rûsyayê êrişên li ser Rêveberiya Xweser erê kiriye. Lihevkirina Edeneyê ne tenê li dijî Kurdan, li dijî tevahî gelê Sûriyê ye. Di rastiyê de bi vê lihevkirinê rêveberiya Şamê ya dixwaze desthilata xwe biparêze jî radest bûye. Heta îro bi milyonan mirovên Sûriyê êşên mezin kişandine, ev lihevkirin sedemê van êşan e. Ji ber wê jî ev banga Rûsyayê ne di berjewendiyên rêveberiya Şamê û gelê Sûriyê de ye. Ji ber vê sedemê banga Lavrov tenê berjewendiyên dijminên gelan û dewleta Rûsyayê esas digire.
Ji ber van sedeman jî pêwîste “Operasyona Bihêzkirina Ewlehiyê” ku QSD’ê li Dêrazor û rojhilatê Firatê daye destpêkirin rast bê fêmkirin. Ev operasyon li dijî her cûr hêzên antîdemokratîk û dijminên gelan in, qasî wê jî banga xurtkirina yekîtiya azad-wekhev a di navbera gelan de ye. Ev operasyon ne tenê li dijî hêza çalakiyê ya DAIŞ’ê ye, hema demê de ji bo ziwakirina çavkaniyên têrkirina DAIŞ’ê û avakerên zemînê wê ye. Ji ber ku DAIŞ qetilkirin e, tecawiz e, bazirganiya hişbirê ye, zilma li dijî gel e, bazirganiya jinê ye, koçberî ye. Îro herkesê van sûcan dikin xizmetkarên DAIŞ’ê ne. Dema Sûriye girtin nava Yekîtiya Ereban, yekane mercê danîn pêşiya rêveberiya Şamê tunekirina van sûcdaran bû. Lê îro ne rêveberiya Şamê, gelê Bakur û Rojhilatê Sûriyê û hêzên wê yên parastinê vî erkî tînin cih. Eger Yekîtiya Ereban di çareserkirina van pirsgirêkan de rastgo be, divê operasyona Dêrazorê bi vî çavî bixwîne û bi Rêveberiya Xweser re bikeve têkiliyan. Qasî DAIŞ û rêxistinên sûcê, dijminê gel dîktatorê faşîst Erdogan jî li herêmên dagirkirî heman sûcan pêk tîne.
Operasyona ku niha li Dêrazor û rojhilatê Firatê didome, operasyona qadên azad û parastina jiyana demokratîk e. Kurd- Ereb, em ji kîjan berî û nîjadî dibin bila bibin, pêwîste em weke welatiyên Rêveberiya Xweser û tevahî gelê Sûriyê yekîtiya xwe bihêz bikin û tevahî lîstikên dijminê xwe xirab bikin. Dijminên gel ji bo qezenç bikin hewl didin yekîtiya me xirab bikin û me bînin beranberî hev. Dewleta Tirk a faşîst jî dixwaze ji vê rewşê sûd bigire û hinek beşên qadên welatê me yê azad dagir bike. Ji ber wê jî qasî em li dijî DAIŞ û rêxistinên sûcê têdikoşin, em li dijî dagirkeriyê jî jiyana demokratîk û azad diparêz in. Dê Sûriye tenê bi vî awayî demokratîk bibe.[1]