شارەزایەکی بواری خۆراک دەڵێت: هەندێک خۆراک بە ناوی دایت (Diet) لە بازاڕ و ماڕکێتەکان دەفرۆشرێن کە مادەی ئەسپارتامیان تێدایە و بەپێی نوێترین سەرچاوە زانستییەکان ئەم ماددەیە مەترسیی تووشبوون بە شێرپەنجە زیاد دەکات.
یاسین گەڵاڵی، پڕۆفیسۆری یاریدەدەر و مامۆستای بەشی زانستە خۆراکییەکانی کۆلێژی ئەندازیاریی کشتوکاڵی لە زانکۆی سەڵاحەددین-هەولێر ڕایگەیاند: ''بەشێکی زۆری ئەو بەرهەمانەی وەکوو بنێشت، خواردنەوەکان و ئایسکرێم، کە ئێستا بە ناوی دایت (Diet) لە بازاڕ و ماڕکێتەکان دەفرۆشرێن و گوایا کەم شەکرن، یان کالۆرییان کەمە، مادەی ئەسپارتامیان تێدایە کە بەپێی نوێترین سەرچاوە زانستییەکان ئەم مادەیە مەترسیی تووشبوون بە شێرپەنجە زیاد دەکات.''
ئەو مامۆستایەی زانکۆ وتیشی: ''بەپێی لێدوانی هەندێ لە سەرچاوە ڕۆژنامەوانییەکان و ڕێکخراوی تەندرووستیی جیهانی WHO و International Agency for Research on Cancer کە سەر بە ڕێکخراوی تەندرووستیی جیهانییە و لەسەر شیرپەنجە کار دەکات، پێ دەچێت مانگی داهاتوو بەفەرمی ڕابگەیەنرێت کە ئەسپارتام مەترسیی تووشبوون بە شیرپەنچە زیاد دەکات.''
دەشڵێت: (ئەسپارتام مادەیەکی شیرینە کە بە شێوازی کیمیایی درووست کراوە و وەکوو بەدیلی شەکر بە شێوەی حەب و لەناو خۆراکدا لەلایەن نەخۆشانی شەکرە و ئەو کەسانەوە کە ڕێژیم دەکەن، بەکار دێت). [1]