دوا نیوەڕۆی ئەمڕۆ، #05-06-2023# لە دوو شوێنی شاری #سلێمانی# شەڕ لەنێوان ژمارەیەک هاووڵاتی ڕویدا و ژمارەیەک برینداری لێکەوتەوە.
شەڕەکە لەنێوان ئەو دەستگێڕ و هاووڵاتییانەدا بووە کە ترافیک لایتەکانی سلێمانی بەکار دەهێنن بۆ سواڵکردن و فرۆشتنی هەندێک کەلوپەل. شەڕەکە لەسەر کۆنترۆڵکردنی ترافیک لایتەکانە و دوو گرووپ کە ناکۆکی لەنێوانیان هەیە لەسەر دەست بەسەرداگرتنی ترافیک لایتەکان بە شەڕ هاتوون.
ئەمڕۆ 05-06-2023 کۆمەڵێک لەو کەسانەی لە ترافیکەکان کار دەکەن لە شاری #هەولێر#ەوە هاتوون بۆ سلێمانی و پشتگیری گرووپێک لەو دەستگێڕانە. شەڕەکە لە گەڕەکی شارەوانی سلێمانی لەنێوان هەردوو گرووپەکە ڕویداوە و دواتر جارێکی تر لە پشت پەڕتووکخانەی گشتی سلێمانی لە نزیک شەقامی سالم دووبارە شەڕ درووست بووەتەوە لەنێوانیان. لە شەڕەکان چەک و دەمانچە و چەقۆ بەکارهاتووە و لە ئەنجامدا 12 کەس بە چەقۆ و فیشەک بریندار بوون و لەناو بریندارەکان ژن و منداڵ هەن. سەرجەمیان ڕەوانەی نەخۆشخانەی شار لە سلێمانی کراون. پۆلیس و ئاساییشی سلێمانی گەیشتونەتە هەردوو شوێنی شەڕەکان و 18 کەسیان لە شەڕکەرەکان دەستگیر کردووە و لە هەوڵی دەستگیرکردنی چەند کەسێکی تردان کە هەڵهاتوون.
ئەو کەسانەی لە ترافیک لایتەکان سواڵ دەکەن یان کەلوپەل دەفرۆشن پێک هاتوون لە عەرەب و خەڵکی ڕۆژاوای کوردستان و هەندێک کەسی تر کە هاووڵاتییان بە قەرەج ناویان دەهێنن. [1]