ئەنجوومەنا نشتمانی یا کوردی ل سووریێ ژ بۆ شەرمەزارکرنا شەهیدکرنا 4 وەلاتیێن کورد ل جندرێسێ ژ ئالیێ گرووپێن چەکدار ڤە خوەپێشاندانەک ل پێش بارەگەها نەتەوێن یەکگرتی ل #هەولێر#ێ برێک خست.
شەڤا 20ێ ئادارێ ل باژارۆکێ جندرێسێ یێ سەر ب هەرێما عەفرینێ ڤە، هەژمارەک ژ گرووپا جەیش ئەل-شەرقیە ژ بەر ڤێخستنا ئاگرێ نەورۆزێ، گوللە ل مالباتەکا کورد رەشاندن و د ئەنجامێ دا 4 کەس شەهید بوون و 2 کەس ژی بریندار بوون. ڤێ تاوانا هۆڤانە ژی کارڤەدانێن توند و نەرازیبوون ل سەر ئاستا ناڤخوەیا و دەرڤە ل پشتی خوە ئانین.
د ڤێ چارچۆڤەیێ دا، نوونەرتیا ئەنەکەسێ ژ بۆ شەرمەزارکرنا شەهیدکرنا 4 وەلاتیێن کورد ل جندرێسێ د شەڤا نەورۆزێ دا ژ ئالیێ گرووپێن چەکدارێن سەر ب ترکیێ و ژ بۆ پشتەڤانیا خەلکێ جندرێسێ خوەپێشاندانەک ل پێش بارەگەها نەتەوەیێن یەکگرتی ل هەولێرێ ل دار خست و نامەیەک خوەند و چاپەک ژێ رادەستی بارەگەها نەتەوێن یەکگرتی ل هەولێرێ کر.
ئەنەکەسێ د نامەیا خوە دە داخواز کر:
– تاوانبارێن ژ گرووپا «جەیش ئەل-شەرقیە» ل دادگەهەکا هەرێمی یان ناڤدەولەتی بێن دارزاندن.
– هەموو گرووپێن چەکدار ژ گوند و باژاران بێن دەرخستن و نابە چەکدار ب چەکێن خوە دەرباسی وان ببن.
– هەموو مال و ملکێن دەستەسەرکری ژ بۆ خوەدیێن وان یێن رەسەن بێن ڤەگەراندن.
– هەموو گرتی بۆ دادگەهێن سڤیل یێن دادوەرانە بێنە ڤەگوهاستن.
– برینا دارێن زەیتوونان و دزی و تالانکرنا شوونواران بێن راوەستاندن، دەست ژ تێکدانا ژینگەﮪ، چاند و دیرۆکا عەفرینێ بێ بەردان.
– رێڤەبەریا عەفرین و گوندێن وێ بۆ ئەنجوومەنێن خوەجهی و خەلکێ هەرێمێ یێ رەسەن بێ رادەستکرن.
– ئاسانکرنا ڤەگەرا خەلکێ کوردێن دەربدەر بۆ مالێن خوە و ڤەگەرا کۆچبەران بۆ جهێن خوە.
– ئاکتیڤکرنا ئەنجوومەنێن خوەجهی و دایینا هێزێن راستەقینە.
– ئەرکێ پۆلیسا سڤیلە باژار و باژارۆکان بپارێزن، ئەرکێ پۆلیسێ لەشکەرییە کو چاڤدێریا کەتنا لەشکەران و رێگرتنا ل کەتنا چەکان بۆ ناڤا باژارۆکانە.
– ئاشکەرەکرنا چارەنڤیسا ب هەزاران گرتیێن کوردێن ب ئاوایەکی نەیاسایی د گرتیگەهێن گرووپێن چەکداران دەنە و دملدەست بێنە بەردان. [1]