ئازیزم ئېشان..
میرزا ئۆلقاڎر، هاوارو ناڵەشەن، ئیجار پەی دووری یارۍ نېیەن، هاوارو ئی جارەیشە پەی نەوەش مەعشووقېن، نەوەشیێ کە جە گردو نەوەشیەکا گولتەرو خرابتەرەن، نەوەشی چەم ئېشەی.
گەر مەعشووقەش چەمېش بېشا دیارەن میرزا ئیتر بېبەشەن جە نیگایا، خەدەنگو پرژانگا، ئیتر زامۍ دڵیش تازۍ نمەباوە، پېسە مەولەوی واتەن:
ئازیزم گەردەن سوراحی بۍ گەرد
ئامانەتی تۊ دڵەی پەڕ جە دەرد
چوون جە زېدی وېش بېیەن ئاوارە
غەریبەن قەدرش نیگا بدارە
فەرامۊش نەبۊ لاڎێ درەنگێ
سوبحێ وە تیرێ، شامێ خەدەنگێ.
بەڵام میرزا چانەیە تەرسۊن، کە ئیتر مەعشووقەکېش بە مەڵامەتو چەم ئېشەیشۆ بېبەش بۊن جە (سوبحێ وە تیرێ شامێ خەدەنگێ) ، هەر پەوکەی ئاوات مەوازۊ کە چەم ئېشەکە بەیو پەی میرزای.
ئازیزم ئېشان ئازیزم ئېشان
دووربای دیارەن دیدەکەت ئېشان
سەوگەند وە بارگەی مەولای دەروېشان
شیم نە واڎەی وەخت نەزع گیان کېشان
خەفەت خەم مەینەت سەردا نە جەرگم
گرد مدرا تا بەی ئەجەل پەی مەرگم
هەی هاوار هەی داد هەی هانا هەی ڕۊ
پەی چېش ئېش ئامان نە تۊی دیڎەی تۊ
هەر ئېشێ ئامان ئامان نە دیڎەت
با بەی پەی دیڎەی قەیس خەم دیڎەت
سەرتا پای باڵام پەر ئېش و نېشەن
ئەو ئېش تېش نەشۊ مەسرەفش چېشەن
سا جە دیڎەی وېت تووخوڎا لاش دەرە
پەی لای دیڎةی من ڕەوانەش کەرە
دیڎةی تۊ نەیشۊ مەستوو خومارەن
دیڎەی من ئېشۊ سۊمایش تارەن
قبووڵ بۊ جە لای شای کەرەم بۍ شۊ
وە دیڎەی من شۊ ئېشی دیڎەی تۊ
ئازیز سەودای بەین دڵداران پاسەن
ئېش دیڎەی دۊس پەی دوسان خاسەن
نەک ڕەقیب شاڎ بۊ وە ئېشی دیڎەت
مەست بۊ جەو بادەی کەس نەچەشیدەت
خەیر با غەیرمەحرەم هەر نامراڎ بۊ
دۊس بە وەسڵی ئېش دیڎەی دۊس شاڎبۊ
یا شا جە دیڎەی تۊ ڕەوانە بۊ
جە بانی دیڎەی من با تانە بۊ
شاڎی مەویاروون هەی بەرگوزیدەم
ئېش دیڎەی تۊ بگنۊ وە دیڎەم
قاڎر چوون دیڎەی لەیلش پەڕ ئېشەن
نوور بینایی دیڎەش پەی چېشەن.[1]