باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و پەنجا و چوارەمە
ئەسعەد ئیبنی زەرارە، گوشش دارا پەی قسەکا عەباسی مامۊ پېخامئاوەری، دڵگران بی، ماچۊ: ئېمە وەڵۍ قەوم و قیلەکەیش بە ڕاسما زانان و ئیمانمان پەنە ئاوەردەن، ماچۊ: ئېمە وەختێ ئیمانمان ئاوەرد بە دینو محەمەدی هیج زورێما سەر نەبۍ، ئیسەیچ گیانو ماڵما کەرمۍ قوربانەو حەزرەتی.
بشنەو جە ئەسعەد ئیبنی زارارە
جە قیسسەی عەباس جەرگش بیی پارە
ڕوو کەرد وە حەزرەت شای بوراق سوار
چوون تووشی ناتیق ئامانە گوفتار
واتش: یا ڕەسوول ڕۊحم فیدات بۊ
سەرم وە سەرگەرد خاشاکی پات بۊ
چوون هەر دەعوەتی سیفەتی دارۊ
خوازشت خوا زیبا بویارۊ
تۊ ئېمەت دەعوەت کەردەن وەی کارە
ئەی کار جە مەخلووق خەیلێ دشوارە
کەردیم تەرکی دین جەدد و ئابامان
قەیدی مەزڵوومی نریا وە پامان
جە بەینی ئېمە و عەرەب عەشایېر
سیلەی ڕەحم بییەن یەکیەک وە زاهیر
تا ئیشارەی قەتع ئەویچ هەم کەردی
ڕیشەی موخالیف جە بېخ ئاوەردی
ئەی کارە کارێ خەیلێ زەحمەتەن
ئەرسەد پەی ئیسلام کۊکۊ ڕەحمەتەن
ئېمە وە ئیخلاس ئیرادەتمەندی
وە سیدق و یەقین دانا و پەسەندی
گرد بە حەزی نەفس قبووڵ کەردمان
سوجدە بەخودای واحید بەردمان
ئەو وەقت زوری کەس نەبیمان جە سەر
وېمان کەرد فیدای دینی پېغەممەر
ئېوە ئەی عەبباس گرد عەموی حەزرەت
قەتعەن جە لاتان ئاموشۊی حەزرەت
نەبیەن جە ئەقوام کەس و ئوممەتش
نەکەردەن باوەڕ بە نبووەتش
ئېمە یەک نەزەر یاواین خاک و پاش
سەر و ماڵمان گرد کەردەن بە فیداش
یا ڕەسوولەڵڵا چېشەن تەمەڼات
تاکە گیان و ماڵ بکەین بە فیدات
شەرت وعەهد بەو چوون قەدیم پەیمان
قەزای تۊ بوزین وە گیانی وېمان
جە بەچەو عەیاڵ وېمان بوویەرین
حەرەم سەرای تۊ حیمایەت کەرین
دایېم وەفا کەین وە عەهدی وېمان
حەقق شەرمەندەگیی ناوەرو پېمان
ئەر عەهد و پەیمان بشکینین جە نۊ
شەریک بین چەنی دوشمنانی تۊ
جە لای خوداوەند هەم ڕووسیا بین
بەشەر کونە قەوم گرد ئەشقیابین
مەتڵەب جەی پېمان، چەی خاستەر چېشەن
باقی وەڵڵاهی ئەلموتەعال وېشەن.[1]