جیابیەیۆ هۆرامانو لهونی جە هۆرامانو تەختی، سەردەمو جەمشیدسانینە.

دمای ئیسماعیل سانی، جەمشیدسان کە وەڵتەر کریابۍ بە سانو نیمەو هۆرامانی، شش ساڵۍ تەر دەسەڵاتش کەرد ملوو تەمامو هۆرامانیرە.
پیێوە سەخی تەبېعەت، هیچ وەخت نانو چېردەسەیی نەوەرۍ، گەر پەی سێرانی، یان ڕاوەشکار، یان یاگێتەری لوێ، نانو وېش و دەسەو دایرەکەیش چەنی وېش بەرۍ، پیێوە داڎوەر و فریاڎڕەس و هەژار پەروەر بېیەن.
ماچان: سەردەمێنە کە ئیسماعیل سان چەنی جەمشیدسانی، بە هامبەشی دەسەڵاتشان ڕاوەبەردەن، ڕوێشا چەمش گنۊ بە پیێوە چېردەسەی وماچۊ: پیاو کېنی؟، ئاڎییچ ماچۊ: دەسم گېرە، گەر نەوەشو داماگەنا، ئانە پیاو تۊنا، گەر ساق و سەلیمەنا، ئانە پیاو جەمشیدسانینا، ئیسماعیل سان ماچۊ: چی مەگەر من ستەمکارەنا؟، پیا چېردەسەکەیچ ماچۊ: بەڵۍ، مەگەر نەزانانت؟، ئیسماعیل سان ماچۊ: نەخیر، پیاکە ماچۊ: ئېمە دوۍ برێنمۍ، من پیاو تۊناو براکەم پیاو جەمشیدسانیەن.
ماڵ و موڵکەنە هامتێ بېنمۍ، بەڵام براکەم چونکم فەرمانڕەواکەش داڎپەروەرەن، خەریکا گوزەرانش خاسەن، من چونکم فەرمانڕەواکەم ستەمکارەن، هەردەم هەژارەنا.
وەختێ ئیسماعیل سان ئانەشە ئەژنی، ئیتر چڵاکیارەو لواوە وېشەرە، دەسشکەرد بە داڎپەروەری و چەنی چېردەسەکاش بە سوز و میهرەبانی ڕەفتار کەرۍ و کۊت و بەڼ و ستەمیش پڕچنا.
پاسە باسکەران جەمشیدسان خزمەتکاری تایبەتی وېش نەبیەنش، نەکای ستەم کریۊ چېردەسەکاش، هیچ وەخت زەڕش کۊنەکەردەنۆ و خەلەش دلۍ گەنجینەینە هۊرنەگېرتەن.
وەختێ ئیسماعیل سان دلېنەشی، جەمشیدسان پەی ماوەو شش ساڵا تەمامو هۆرامانیش ڕاوەبەرد. خزمەتو هیچ گۆرە پیێوەش نەکەرد، هەواڵو بەگلەرەکا سنەی نەپەرسۍ، سەرانەی کەم جە خەڵکو هۆرامانی ئەسانۍ و بڕێ کەمش پەی هەرمانوکارو وېش خەرجکەرۍ، خەڵاتۍ کەمۍ پەی فەرمانڕەوایا بابانی کیانۍ، ئانەی کە باسمان کەرد، تا دەمو بەرکۆتەی (محەمەد یوسف سان) ی کوڕو ئیسماعیل سانی، کە پېسە ناحەزێ و دژمەنێ ڕەفتار کەرۍ، ئیتر جەمشیدسان جە هۆرامانو تەختیۆ کۊچشکەرد پەی (هەیشوری) ، چاگۆ چەنی بەگلەربەگەکا سنەی دەسشکەرد بە گفتوگۊ، بەگلەربەگەکۍ (ئەردەڵانی) سنەی، چۊڵەخرتۍ محەمەد یوسف سانیشادا پەی کوشتەی جەمشیدسانی مامۊیش، ئاڎییچ ئانەش قبووڵکەرد و یەرۍ کەسېش کیاستۍ پەی کوشتەی مامۊیش، یەکەم عەلی نامێ کوڕو عەباس کێمنەی، دوەم هاجیار نامێ کە هۆرامی بۍ، یەرەم شەریف نامێ کوڕو زوراب کێمنەی، وەختێ ئا یەرەکەسە یاوێ هانەگەرمڵە (چەقو دەسەڵاتو جەمشیدسانی) ، وېشا مەڵاسدا تاکو بیۍ بە حۊت کەسۍ، گردۆ هېرششا بەرد پەی سەرو یانەکەیش و داشا وەرو گرۊڵیاو شەهیدشا کەرد.
جەمشیدسان ساڵەو (1731ز) کوشیان، بابانەکۍ (مەنوچەربەگ) ، کوڕو جەمشیدسانی کەران بە فەرمانڕەواو هۆرامانی، پەی ماوەو دوۍ مانگا فەرمانڕەواییش کەرد، دمایی مەرد.
وەختێ جەمشیدسان برێکۍ وېش (عیساسان و حسەین بەگ) ش کوشتۍ، خوڎای گۆرەی هەقە چەنەئەسا، وېش کوشیاو دمای ماوێ کوڕەکەیچش کوچی دمایېنش کەرد.
محەمەد یوسف سان دمای کوچی دمایېنو مەنوچەرسانی ، کوڕو جەمشیدسانی، یاوانە کە وېش زیاتەر کەس نېیەن شایانو دەسەڵاتی بۊن، بەرهەمو ویرەکەیش ئانەبۍ کە (مەولانا مەلا یاقوی قازی) کە سەردەمو گەنجینە بۍ، چەنی دەروېش بەگی کە ژەنبراو عیساسانی بۍ، کیاستېش پەی خزمەتو سوبحان ویردی خانی، والی سنەی، پەی وەرگېرتەی دەسەڵاتو هۆرامانی.
سەرنجە:
پەی یەکەم جاری نزیکەو (300) ساڵۍ چێوەڵی، هۆرامان ساڵەو (1722ز) سەردەمو جەمشیدسانینە کریان بە دوۍ بەشۍ، دماتەر کریان بە چوار پارچېوە:
1-هۆرامانو تەختی،
2-هۆرامانو لهونی.
3-هۆرامانو ڕەزاو و کەمەرەی.
4-هۊرامانو شامیان و دزڵیۍ.
دماجار ساڵەو (1916ز) ی سەردەمو جەنگو جەهانی یەکەمی، هۆرامانو لهونی کریان بە دوۍ بەشېوە:
1-هۆرامانو لهونی/ دیمو ئېراقی.
2-هۊرامانو لهونی/ دیمو ئېرانی.[1]