باڵە سپییەکانم
ئاکۆ کەریم مەعروف

لە دوورەوە دێت تەمێکی سپی
ئەو ڕۆژانەی پلەی گەرما نغرۆم دەکات لە عارەقەی مانگی تەمموزدا، فکر و خەیاڵم لە سوێراوێکی لینجدا بۆنێکی ناخۆشی لێوەدێت، هۆشم تووڕەیە شەپۆل دەدات و جێگە بە خۆم ناگرم. هەرکاتێک بۆنێکی سەیرم لێوەبێت، دڵنیام تووشی بەڵایەک دەبمەوە.

لە ئاسمانێکی دوورەوە دێت.
هەورێکی سپی. کاتم تەواو بووە بۆ بەڕێکردنی ڕۆژ و شەو... ئێواران بۆ من ڕەنگەکانی ئاسمان دەبنە دەریا و ڕووە و خۆرئابوون دەڕۆن، من لەناو بەلەمێکی سپیدام و بەناو تەمێکی سپیدا ڕێدەکەم کە چارەنووسم نادیارە، تەنیام و هەر چوار دەورم هەورێکی سپییە. کاتێک لەبەر ئاوێنەکەدا خۆم دەبینمەوە، خەیاڵم سپی بووە نەوەک سەروڕیشم، ئەو شەوە بێخەم نووستم، پێش نووستن بیرم لەوە کردەوە لەناو ئەم هەموو تاریکییەدا هێشتا خاڵێکی سپی ماوە.
باشە...
هات و هاواری دەرەوەم بەدڵە، چونکە نە هیچ شتێک دەبینم، نە گوێشم لە هیچ شتێکی ترە. کە شەوانی سپی هەر چوار دەورم دەتەنێت، تەمێکی سپی کەمتر خوێنی خەیاڵم کاڵ دەکاتەوە، ئەوە ژیانی منە.
من دەمەوێت شتێک لە ڕۆژانەی کەسێکی سادە بنووسم، کار بۆ ڕۆژنامەی (دڵە سپییەکان) دەکەم، مەرجەکانی ئەو ڕۆژنامەیە تەنیا ئەوەندەیە، کەسانێکی زۆر هاواریان هەیە، گوێگرتن لەم کەسانە ژیان مانایەکی تر دەبەخشێت. هەندێجار خەیاڵ بورکانێکە دەیان ساڵە ناتەقێتەوە، زۆرجاریش وەها دەتەقێتەوە ناوەکەی خۆی لە دەستدەدات، ئەمە ناوەرۆکی بابەتەکەمە.
چۆن چۆنی منی ناسییەوە، ئەوەیان نازانم، چەند ڕۆژێک بوو خۆی لە من دەشاردەوە، کارێکی ئاساییە نێچیر لە ڕاوکەر ڕابکات، کارەکەی منیش ڕاوکردنی دڵە سپییەکان بوو، بەڵام بە پێچەوانەوە دەرچوو.
کاری ڕۆژنامە ڕاکە ڕاکەیە، منیش هەر ڕادەکەم بەشوێن دڵە سپییەکاندا، بەڵام هەست بەوە دەکەم کەسێک لەدەرەوەوەی خۆم بەشوێنمدا ڕادەکات. لەوە دەچێت بۆ کاری ڕۆژنامە ئەمە تازە بێت. هیچ کەسێکم لەم دۆخە ئاگادار نەکردەوە، تەنانەت سەرنووسەریش، لە و ماوەیەدا بەهەموو شێوەیەک خۆم لە هەموو چاوێک بەدوور دەگرت. یارییەکە لەنێوان ڕاوکەر و نێچیردابوو، داوی ڕووداوەکان کە چنرابوون چەند ڕۆژێکی خایاند. دواتر داوەکە لە تەنافی ڕووناکی و باران درووستکرابوو پێیەکانی گرتم. لەبەر خۆمەوە وتم: مادەم دەستەکانم ئازادن، پێیەکانم هیچ گرنگییەکی ئەوتۆی نییە، دەستەکان ئاسمان دەگرنە باوەش. ڕۆژنامە بەهەردوو دەست دەکرێنەوە و لاپەڕەکانی تریش بە هەمانشێوە. بە نیازی چایەک بووم، چایچییەکە لەوێ‌ نەبوو، کەسێک پێی وتم، چایەک بۆ خۆت تێ بکە، من دەستەکانم بە بەبێدەستییەوە دەناڵێنن، کەس ئەمە دەبینێ‌. کابرای دڵ سپی لەبەرانبەرم دانیشتبوو، ئەو من ناناسێتەوە، یەک وشەی پێ ناڵێم، گەرچی دوام کەوتووە، وەک ئەوەی لە دوورەوە بێت تەمێکی سپی... کە ئێستا دەیبینم ڕەش داگەڕاوە. خەریکی هەڵدانەوەی ڕۆژنامەکە بووم، بە دوو قۆڵی دەستکردەوە، چاوی لەسەر ئەوەبوو بە چ لاپەڕەیەکدا دەنووسێمەوە، یان مەستی چ هەواڵێکم، ئەمانە هیچ بەڵامەوە گرنگ نەبوو، هەروەک کەسێکی ئاسایی چایخانەکەم بەجێهێشت، مەراقم بوو ڕیپۆرتاژێک لەسەر دەرگا دێرینەکانی شار بنووسم، ئەو بەدوامەوە بوو. یان باشتر لەسەر ئەو دڵ و تیرانە بنووسم کە لەسەر دیواری ماڵە هاوسێکان بە ڕەنگی ڕەش نووسراون و هیچ کەسێک نایانناسێتەوە. هەڵبژاردن لای خۆمە، سەرنووسەریش ئەو ڕێگەیەی پێداوم، دەوروبەری ئێوارە نزیک ڕۆژنامەکە بوومەوە، گوێم لە دەنگێک بوو بانگی کردم. من کاری خۆم تەواو کردبوو، پیشەم ئیشی ئەمڕۆ، مەخەرە بەیانی، بۆ من سبەینێ‌ ڕۆژێکی تازەیە. دووبارە بانگی کردمەوە، هیچ شتێک نابینم، نابیستم، ئەو کەوتۆتە دوای خەیاڵ و خەوبینیمەکانمەوە هەر بۆیە بێخەوی ڕەنگی ڕەش هەڵگەڕاندووە. ماندوو بوو، ئەوەی دەیزانم ئەو بە و شێوەیە بوو، ترسی پرسیارکردن سپی کردبوو، بانگم دەکات و دەنگی لێوە نایەت، لەبەرخۆمەوە وتم (ئەم بوونەوەرە کێیە هەر دەم دەکاتەوە؟) زمانی کردەوە، پێیوتم، هەردوو باڵە سپییەکانت لەسەر مێزی چایخانەکە بەجێهێشتووە.[1]