باخچێوە بېگەرد
ئاماڎەکەرڎەی: ئەسعەد ڕەشید
بەشەی سەڎ و هەشتا و ششەمە
ئەبوتالیب، شمشېرش هۊرکېشت، تا سەباحو ساڵحانی چواردۆرو یانەو پېخامئاوەرینە پاسەبانیش مەکەرد، تا یەرێ ساڵې ئەپا حاڵە ژیوایشان گوزەرنا:
هەر جە ئان حەج کەعبەی موعەززەم
مامان وە بەیروون یاران گرڎ وە هەم
سەودا گەرمەنیشت نە ڕاگەی حەجاج
هەر کام جینسی وېش مەکەردش هەراج
فېشتەر جە قوڕەیش حەسەد مەبەردەن
دایېم مەزڵوومان ئازار مەکەرڎەن
چوون ئەبوتالیب دانای خورەدمەند
دیش ڕاگەی ئیسلام یەکسەر شیی وە بەند
یەکسەر شمشېرش کەرد وە حامیڵ
لاڎێ جە حەزرەت نمەبی غافڵ
شەوگەردی مەکەرد نە دەوری یانەش
وە ڕۊ سەر منیا وە پې ئاسانەش
ساتێش نمەکەرد حەزرەت فەرامۊش
دیکی دەروونش جە خەم مەدا جۊش
تا سوبحی سادق نە دەوری مەنزڵ
خزمەتش مەکەرد بە دیڎە و بە دڵ
بە ڕۊ مەواتش ئەولادانی وېش
نەبیرەی فەرزەند دامادانی وېش
نە دەوری حەزرەت پاسەبانی کەن
چوون خواجەی غوڵام، جان ئەفشانی کەن
غەرەز تا سێ ساڵ وەیتەورە وېیەرد
ئەبوتالیب ڕەنج چەنی حەزرەت بەرد
تا ئەوقاتشان گېڵا بە تاڵی
یەکسەر حاڵشان بیی بە بەڎحاڵی
گرڎ وە عەتش و جووع زۊر ئاوەردەن
بېزاربین جە گیان ڕازی وە مەردەن
جە دمای سێ ساڵ یارانی یەک دڵ
خەریک بین چەنی ماجەرای موشکڵ.[1]