باخچێوە بېگەرد
نویستەی: میرزا ئۆلقاڎرو پاوەی
بەشۍ سەڎ و چل و پەنجەمە
میزا ئۆلقاڎرو پاوەی درېژە مڎۊ بە باسەکەی، چا سەردەمیە هەکە پېخامئاوەرو ئیسلامی بە ئاشکرا دەسشکەرد بە یاونای پېخامەکەیش.
ئەسنامانی چۊب گرد نگوون سار کەن
بە وەحدانییەتی خوڎا ئیقرار کەن
شەخسێ جە شۊنش هەر وە عەزمی جەنگ
پەی پەی جە غەرەز پەرېش مەوست سەنگ
ئاخر هەوادا پارچە سەنگی سەرد
پاشنەی موبارەک حەزرەت مەجرووح کەرد
با وجوود نەقڵی کوفر خۊ کوفر نېیەن
کوفر هەر شامڵ نەو گومڕا بېیەن
وات: یانەی وېتان، هیچ خراپ مەکەن
هەرگیز گۊش وە قەول ئەو گومڕا مەکەن
واتش: ئانە کېن ئی کارە کەردش
ئیسمی محەمەد، بۍ ئەدەب بەردش
واتشان: ئەبو لەهەبەن، وەیتەور
برازادەشەن، مەڎۊ جەفا و جەور
مەکەرۊ وەیتەور، دایېم تەکزیبش
شېونان جەلای مەردم تەرغیبش
نەقڵەن هەم یەک ڕۊ، قوڕەیش جەم وەردەن
جە بەحسی حەزرەت مەشوورەت کەردەن
ئەوەڵجار هەرئېد مەسڵەحەت زانان
پەی ئەبوتالیب پېخام کیانان
بوزورگانی قەوم خاتر پەڕ خارەن
ئارەزووی دیڎەی تۊ ئینتیزارەن
تا ئەبوتالیب ڕوخسەتدا پېشان
تەوازوعش کەرد، یەکیەک چەنیشان
واتەن: تۊ بوزورگ، نەجابەت داراییی
تۊ سەیدی قوڕەیش بوزورگەواریی
بەڵۍ، چوون نەقڵەن جە ئیبنی ئیسحاق
قەبیلەی قوڕەیش گرد بە ئیتیفاق
مەعلوومەن لېشان کە ئەبوتالیب
دەرحەقق بە حەزرەت کومەکەن غالیب
مەشغووڵەن دایېم بە ڕیعایەتش
تاغییەن تەمام جە حیمایەتش
عەمارە نامێ نەجیب نەبیرە
شوخی بن وەلید ئیبنی موغەیرە
پەسەندی مەجلیس خاس پەسەندان بۍ
باش باڵادەس هونەرمەدان بۍ
عەمارەشان پەی ئەبوتالیب بەرد
بە هەزار ئەنواع هەر هەم عەرزشان کەرد
واتەن: ئەی جەوان نادان نادانەن
قەومی قوڕەیش پەی تۊشان کیانانەن
تەنخوای محەمەد خزمەت کەرۊ پېت
تەواو بکەرە بە فەرزەندی وېت
محەمەد تەنخوای ئەو بدەر پېمان
تا قەتڵش بکەین بە دەستی وېمان
چوون خیلافی کیش دینی توش کەردەن
نامی خوداهان وە باتڵ بەردەن
عوقەلای قوڕەیش، سیغار و دانا
ئەحیا و ئەموات گرد، جە دوزەخ زانا
لېڵ کەردەن مینای جامی ژینمان
نە فەرقش وستەن، نەما بەینمان
عەوەزیی مەردیی هەر مەردیی بېیەن
کەس جە عامارە مەعقوولتەر نېیەن
ئەبو تالیب وات: هەر بەندە مەردەن
بەڎ خەیاڵیەوەن پەی وېشان کەردەن
فەرزەندی غەیرە وە من بسپاران
پەروەردەش کەرووم پەی ڕوژگاران
من فەرزەندی وېم بدوم وە پېشان
قەتڵش بکەران وە دەستی وېشان
حەرف ئی خەیاڵ ناوەردەن نە دل
موشکیلی وەی سەخت کەس نەکەردەن حەل
هیچ کەس ئەی خەیاڵ نە دڵ ناوەردەن
دېوانە سەودای وەیتەور نەکەردەن
جگەری وېت بدەر بکەراش پارە
وېت جەرگی مەردووم نیگا بدارە
عەجیب سەلاحەت، عەجیب ئیلتیام
عەجیب گفتوگۊی ئیزهاری پەیخام
وات: واچە بە قەوم ئەی خەیاڵ خامەن
ئەجزای ئەقڵشان گرد ناتەمامەن
محەمەد ڕیشەی جگەر گوشەی من
................[1]