باخچێوە بېگەرد
نویستەی: میرزا ئۆلقاڎر و پاوەی
بەشۍ: شەسهەمە

(فاتمە) شازادۍ شامی، دمای یاوایش بە شارو مەککەی، چەنی عەبدوڵڵای نیشتەرەو دەسش بە گفتوگۊ کەرد، ماچۊ من جە شامۆ ئامێنا، عەزمو تۊم کەردەن، ئاواتمەن بیاوۊ بە تۊ، هامسەرگیریت چەنی بکەروون، بەڵام عەبدوڵڵا یەکسەر ملش نەڎا، ماچۊ مەشۊم پەرس کەروو بەتاتەیم.
واتش: من جە شام، عەزمی تۊم کەردەم
پەی، تۊ، جە شاهی، حیجاز، ویەردەم
ئەی گرد، بارخانە، مەتای گرانبار
قوماشی بېعەیب، دوڕڕی شاهەوار
تەمامی یەکسەر، پەی تۊم ئاوەردەن
ئەموالم بە تۊ، گرد، توفەیل کەردەن
وېم، خۊ، هەم مەعرووف، مەلیکەی، شامم
مەحبووبە ئافاق، مەوانا، نامم
پەی تۊ، بەرشېیەن، جە حەد خەلاسم
علووم تۊ پەی من، من پەی تۊ خاسم
جفتی من بە تۊ، نییەن، هەر جە کۊن
کاڵای من لایېق، هەر وە باڵای تۊن
وە ئامین وېت، تۊ من دیاریی کەر
عەلعان، نیکاحم، پەی وېت، جاریی کەر
عەبدوڵڵا، واتش: بەڵێ مەلیحەن
گوفتارت، سەحیح، قەولت سەحیحەن
بەڵام، بۍ ڕوخسەت، ئیجازەی پدەر
نە مەبۊ، پەی من، هەرگیز، موسەییەر
عەبدولموتەلیب، هەر نەوع ڕېشەن
سەرداری سەنگین، مەککە و قوڕەیشەن
ئەم شەو نە خزمەت، ئەو بوزرگەدار
مەزموونی، مەتڵەب، مەکەردم، ئیزهار
هەرچی قەرار دا، فەردا، هەم جە نۊ
فەرموودە، ئەمرش، ماوەردم، پەی تۊ
[1]