باخچێوە بېگەرد
نویستەی: میرزا ئۆلقاڎرو پاوەی
بەشۍ: پەنجا و چوارەمە
میرزا ئۆلقاڎرو پاوەی، جە تۊمارکەردەی گوزەرو ڕۊحیانەتو پاکو حەزرەتو ئاڎەمی (د.خ) بەردەوامەن، تاکو یاوایش بە حەزرەتو نووحی، چاگەیچ وەستەنەرە تاکو یاوان بە زاروڵەکاش، دماتەر نەوە بە نەوە ئامان تاکو لاو حەزرەتو ئیسماعیلی، بابا گۆرەو پېخامئاوەرو وېمان، جە ئیسماعیلیچۆ وەستەرە پەی بنەماڵەو حەزرەتی تاکو یاوا بە عەبدوڵڵای تاتەیش، ئا نوورە پاکە جە (محەمەڎ) ینە گیسیاوە.
ئاخر، جە لای (نووح) ، عەلەیی سەلام
جە، دمای چندی، تا، یاوا، بە (سام)
جە گردین، یەکسەر، تاکو جیل، کەرد، گوزەر
نەکەرد، مدارا، تا، وەلای (ئازەر)
جە (ئازەر) ، وېیەرد، چوون دوڕدانەی فیل
تا، شیی، وە جەبهەی، (ئیبراهیم خەلیل)
بەرشېی، جە سینەی، خەزېنەی (خەلیل)
کەفت، ئەو پیشانی، پاکی (ئیسماعیل)
جە لای (ئیسماعیل) ، دیسان کەرد، گوزەر
فڕ، قدووم بەرد، وە جەبهەی (قیزەر)
ئەو، جە هەمیەسەع بن حەمل، وېیەرد
جە (قیزەر) ، تەشریف، وە لای بەینەت بەرد
(عەدنان) ، وە موعید، تاکو وە لای، (نەزار)
جە هیچ مەنزڵێ، نەکەردش قەرار
موزەڕ وە ئەلیاس، موورک، دیی بە چەم
مەنزڵان، تەی کەرد، پەی جەبهەی خاتەم
کەعب، هەم لوەی، کیلاب، بۍ خیلاف
قوسەیی یاوا، بە عەبدولمەناف
جە مەناف وېیەرد چوون بەرقی ئەنجەم
مەنزڵ، بەرد، وە تۊی، پیشانی هاشم
هەم، جە لای هاشم، غەرەز، موحیبەت
تا، یاوا، جەبین، عەبدولموتەلیب
ئاخر مەنزڵش، بە ئەمری ئەڵڵاﮪ
بەرد، وە جامی پاک، جەبهەی عەبدوڵڵاﮪ
بەڵام، عەبدوڵڵا، نووری دیڎەش، بۍ
فەرزەندی عەزیز. بەر گوزیدەش، بۍ
عەبدولموتەلیب، تەمام خۆش عەیش، بۍ
بوزورگ، ئەوەڵی، قەومی، قوڕەیش، بۍ
سەرداری سوپای، مەککەی شەریف، بۍ
ئەسڵی مەند، پاک، حەقق، پێدادە، بۍ
دینی حەنەفی، خەلیلەڵڵا، بۍ
ئایین و مەزەب، زەبیحەڵڵا بۍ
بابۊی دە کەس، چوون ئەبوتالېب، بۍ
عەبدوڵڵا و عەباس، حەمزە، غالېب، بۍ
بەڵام، عەبدوڵڵا، نووری دیڎەش، بۍ
ئەرشەدی ئۆ لاڎ، بەرگوزیدەش، بۍ
بە حوسن و جەمال، بوڵند، ئاواز، بۍ
جە ئەهلی عەرەب، خەیلێ، مومتاز، بۍ
نووری موحەمەد، شای خەیرولبەشەر
جە ڕووی پیشانیش، مەدرەخشا، چوون خوەر
هەر کەسېو، مەدیش، دیداری پاکش
پېش حەرام مەبیی، خورد و خوراکش
[1]