دەقی وتارەکەی مستەفا کازمی:
بەناوی خوای گەورەی میهرەبان
خوش و برایانی ئامادەبوی بەرێز
سڵاوی خوای گەورەتان لێبێت
لەرۆژێکی وەک ئەمڕۆدا هاوڕێی گەورەو ئازیزمان سەرۆک #مام جەلال# کۆچی دواییکرد، هەموان لێرەین تاوەکو یادی ئەو کەسایەتییە نیشتمانییە گەورەیە بکەینەوە کە خاوەن ڕۆحێکی تێکۆشانی بێسنوور بوو.
لەکاتێکدا ئەم یادە دەکەینەوە کە پێویستی زۆرمان بە هێمنی و دانایی و توانای سەرۆک مام جەلالە بۆ چارەسەرکردنی کێشەکان و لێکنزنزیکردنەوەی بۆچوونە جیاوازەکان و گێڕانەوەی متمانەی لەدەستچووی نێوان براکانی یەک نیشتمان، کە قوربانی و خوێنی بەنرخیان لەسەرجەم قۆناغەکانی تێکۆشان لەپێناو دیموکراسی و ئازادی نیشتماندا پێشکەشکردووە.
ئەم یادە لەکاتێکدا دەکەینەوە، لەسەردەمی نەبوونی بەها و ئاکاری جیهانی سیاسەتدا دەژین، کە زمانی تۆمەت بەخشینەوە و خیانەتکردن زاڵە بەسەر زمانی ئارامی و گفتوگۆ لەپێناو چارەسەردا.
بەتایبەت خۆم یادی مام جەلال دەکەمەوە لەهەموو قۆناغەکانی ژیانم لە سەردەمی ئۆپۆزسیۆنی نیشتمانی دژی سیستمی دیکتاتۆری، بۆ سەردەمی کاری ڕاگەیاندن و چالاکییەکانم لەبواری یاسا بۆ کاتی گرتنەدەستی بەرپرسیارێتی، مام جەلال بەدرێژایی کاتەکان بایەخی بە ماف و شکۆمەندی مرۆڤ و کڕۆکی دادپەروەری دەدا.
یادی هەمیشە ئامادەیی سەرۆک مام جەلال دەکەمەوە، لەباسی دەیان ساڵ تێکۆشان لەپێناو ئازادی و دیموکراسی، تێکۆشانێک کە جیاوازی چینایەتی یان نەتەوەیی یان مەزهەبی تێیدا ڕەنگی نەدایەوە بەڵکو تێکۆشانێک بوو لەپێناو مرۆڤ و نیشتمان و دادپەروەری، کە بانگەشەی بۆ دەکەین و کاری لەپێناودا دەکەین، پێکەوە ڕووبەڕووی دیکتاتۆری بووینەوە لەپێناو ئازادی و دیموکراسی، بۆیە پێویستە پارێزگاری لەو پرەنسیپانە بکەین لەپێناو عیراق و عیراقییەکان و لەپێناو داهاتوویەک کە شایستەی ئەو قوربانیدانەبێت بە ڕاستگۆیی و دڵسۆزی پێشکەشکرا.
ئەمڕۆ لەنێو هەموو ئەم دۆخە چەقبەستوییە سیاسییەی عیراقدا، ئامادەنەبوونی کەسایەتی مام جەلال کاریگەری و واتای گەورەیان هەیە، سەرۆک مام جەلال دەیتوانی بەئاسانی سەرکردە سیاسییەکان لە لەسەر مێزی گفتوگۆ کۆبکاتەوە لەپێناو گفتوگۆیەکی هێمنانە و عەقڵانی کە لەرێگەیەوە متمانە دروستببێتەوە و بەرژەوەندی گشتی و نیشتمانی بەسەر بەرژەوەندی و دەستکەوتی کاتی زاڵ ببێت.
پرەنسیپی نییەت پاکی و دیبلۆماسییەتی نەرم و ئازایەتی لە گفتگۆکردن و دورکەوتنەوە لە هەڵوێستی توند، کەرەستە و نەخشەڕێی مام جەلال بوون بۆ چارەسەرکردنی کێشە و قەیرانەکانی عیراق.
ئێمە ویست و بەها و سووروبوونی گەورەی مام جەلال وەک پاڵنەرێک دەبینین بۆ چارەسەرکردنی کێشەکان کە لەگەڵ بەها نیشتمانییەکان و بڕوابوونمان بەپێویستی پێکهێنانی وڵاتی دامەزراوەدا یەکانگیردەبێت، تێیدا بەرژەوەندی هاووڵاتی پێش هەر بەرژەوەندییەکی تاکە کەسی و چینایەتی بخات.
لەم ڕوانگەیەوە جەخت لە پێویستی گەڕانەوە دەکەین بۆ گفتوگۆی نیشتمانی کۆکەرەوەی هەموو عیراقییەکان تاوەکو هەموو پرس و گفتوگۆ و ناکۆکییەکانمانی تێدا باس بکەین و چارەسەری بنیاتنەرانەش لەخاڵە هاوبەشەکانمان پێشکەش بکەین.
عیراق و گەلی عیراق و بەرژەوەندی عیراقییەکان ئەو ئامانجەن کە پێویستە لەگفتوگۆییەکی نیشتمانییاندا لەپێش هەر پرسێکی دیکەوەبن، ڕێکەوتنی نیشتمانی لەسەر بنەمای پرسە هاوبەشەکان و بەها نیشتمانییەکان و کارێکی قورس نییە، عیراقییەکان توانیویانە خۆیان بەشێوەیەکی باش پێشکەشی جیهان بکەن بۆیە توانای چارەسەرشیان هەیە کە تێیدا داهاتووی خۆیان و نیشتمانەکەیان پارێزراو بێت.
دەستگرتن بە گفتوگۆ، گفتگۆ، گفتگۆ، تاکە ڕێگەیە بۆ چارەسەرکردنی کێشەکان، بەپێچەوانەوە هەموومان پێکەوە دەسوتێین، ئازایەتی ڕاستەقینە خۆی لە پاراستنی بەرژەوەندی عیراقییەکان و ئاسایش و ئاشتی کۆمەڵایەتی و بیرکردنەوە لە داهاتووی نەوەکانماندا دەبینێتەوە.
خوشکان و برایانی ئامادەبوو
هەموو دەزانین لەماوەی دوو ساڵی ڕابردوودا پەیوەندی برایانەی ئەرێنی لەئاستێکی بەرزدا حکومەتی فیدرالی و حکومەتی هەرێمی کوردستان پێکەوە کۆکردووەتەوە، ئەم پەیوەندییە باشە دوای قۆناغی جیاوازی ناسەقامگیری و پشێوی هاتووە، گەیشتن بەم قۆناغە لە بۆشاییەوە نەهاتووە بەڵکو لەئەنجامی پرەنسیپی گفتوگۆ و نییەت پاکی و سیاسیەتی نەرم و دوور لە شپرزەیی دروستبووە، پێویستە هەنگاوەکان بەرەو پاڵپشتی زیاتری خاڵە هاوبەشەکان و چارەسەری کێشەکان بێت، بەڕۆحییەتی برایانە و چارەنووسی هاوبەش، لێرەدا پێویستە ئاماژە بەوە بدەم کە ئاستەنگ و لەمپەڕ زۆربوون بۆ شکستپێهێنانی ئەزموونی حکومەت، بەڵام زۆربەیانمان تێپەڕاندووە کە دوایینیان پەسەندکردنی پشکی دواخراوی جووتیارانی خۆشەیستی هەرێمی کوردستان بوو، سوپاسی خۆڕاگری و بەرگەگرتنی جوتیاران دەکەین کە بەهۆی نەبوونی یاسای بودجەوە لەعیراق دروستبووە.
ئەم حکومەت بەرگەی زۆر بارودۆخی قورس و دانسقەی گرت لە تۆمەتبەخشینەوەی بێبنەما و درۆ بۆ دروستکردن و بۆ دەستخستنی بەرژوەندی بچوک کە لەگەڵ هیچ بەهایەکدا ناگونجێت، ئێمە وەک ئەرکی نیشتمانی و ئەخلاقی و مرۆڤدۆستی لەپێناو عیراق خزمەت دەکەین کە لانکەی شارستانییەتی مرۆڤایەتی بووە.
هەوڵدرا ئەم حکومەتە لە ڕژاندنی خوێن و ئەنجامدانی دزی و مامەڵەی گوماناوی تێوەبگلێندرێت، هەندێک ویستیان حکومەت وەک پردێک بۆ تێپەڕاندنی قۆناغێکی دیاریکراو بەبێ گۆڕانکاری بەکاربهێنن، بەڕاشکاوی بۆ مێژوو دەڵێم هەندێک دەیویست حکومەت ئەو دەنگانە کپ بکاتە کە داوای بچوکترین مافی خۆیان دەکەن، هەوڵدرا حکومەت وەک کەرەستەیەک بەدەستیانەوە بێت، بەڵام هەموو هەوڵەکانیان شکستی هێنا، بۆیە بەهەموو شێوەیەک ئاستەنگیان لەبەردەم حکومەت دەوستدەکرد.
لەگەڵ هەموو ئەمانەدا بەرگەمان گرت و لەئەزموونی کەسایەتی سەرۆک مام جەلال فێربووین کە لەپێناو بەرژوەندی باڵادا ئارامگر بین و بەڕاستگۆیی و دڵسۆزی خزمەت بکەین و ئاوڕ لەهیچ تانە و دەنگیک نەدەینەوە کە دژی بەرژوەندی گشتی بێت.
بێ دوودڵی تا دوا سات کاردەکەین و داوای گفتوگۆ لەهەموان دەکەین و خوێن و شکۆمەندی گەلەکەمان بەهەر نرخێک بێت دەپارێزین، هەرچەند هێرش بکرێتە سەرمان و تۆمەتمان ئاڕاستە بکرێت بەوەی لاوازین، ئێمە بەردەوام دەبین و خوێنی هاووڵاتیانمان بە پیرۆز دەزانین و هەر جۆرە خوێنڕشتنێک بەلامانەوە هێڵی سوورە. هەوڵدەدەین کۆتایی بە قۆناغی توندوتیژی و جەنگ بهێنین و کاردەکەین بۆ ئاشتی و ئارامی، لەپێناو داهاتوویەکی دوور لە خوێن ڕشتن و پر لەهیوا و لەکار لەپێناو عیراق و عیراقییەکان.
عیراق ئەمانەتە لەگەردنمان پێویستە ئەو ئەمانتە ڕادەستی خاوەنەکانیان بکەین
دروود و نەمری بۆ سەرۆک مام جلال
دروود و نەمری بۆ شەهیدانی عیراق و هەرێمی کوردستانی خۆشەویست
لەکۆتاییدا سڵاوی خواتان لێبێت.[1]

تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!