#زەردەشت# یەکەم کەس بوو کە بانگی تاک خودایی دا و مرۆڤایەتیی هان دا بۆ ژینگەپارێزی و نیشتەجێبوون.
زەردەشت زاراوەیەکی پەهلەویی کۆنە، کە مانای ئەستێرەیەکی ڕووناک و درەوشاوە و جوان دەدا، ئەو زاراوەیە بە چەندین شێوازی جیا و دەربڕینی جیاواز کەوتە نێو ناوان وەک (زەرتشت، زەراتوشت، زرادەشت، زەراتوشتا، زەرتوشتوا، زەرادەشت، زەردەشت، ...)، هەمووشیان یەک مانا دەبەخشن، کە مەبەست لە هەموویان دەرکەوتنی ئەستێرەیەکی جوان و دەرەوشاوەی ئاسمان بوو بۆ مرۆڤایەتی بەگشتی و باوەڕدارانی بەتایبەتی، تەنانەت خودی زاراوەکەش وەک ناو، بۆ چەندین خەڵکی ئاسایی لە قۆناغی مێژووی کۆن بەکار هێنراوە، کە یەکێک لەوان (سیتاما کوڕی پورشاسپ) بوو. دواتر لە خۆشەویستی و گەورەیی ئەو کەسایەتییە، بووەتەوە ناوی هەزاران باوەڕداری زەردەشتی و تەنانەت ئایینەکانی تریش.
واتە ناوی زەردەشت وەک ناسناو لە سیتاما نرا، چونکە باوەڕداران و پەیڕەوانی، ئەویان بە کەسایەتییەکی بەرز و پیرۆز و ئەستێرەیەکی جوان و درەوشاوە زانی، کە پەروەردگار بۆ ئەوانی ناردووە، تا کۆمەڵگا و جیهان و مرۆڤایەتی لە نەزانی و فرەئایینی و فرەخودایی ڕزگار بکات و هەموویان لە ئایینێکی یەکگرتوودا کۆ بکاتەوە.
زەردەشت کوری پورشاسپ، کە ناوی تەواوی (سیتاما کوڕی پورشاسپ) و دایکیشی ناوی (دۆغدا) بووە، لە ساڵی 660 پێش زایین لەدایک بووە. زۆربەی مێژوونووسە بیانییەکان کۆکن لەسەر ئەوەی کە زەردەشت لەدایکبووی ناوچەی (#ورمێ#)ی ڕۆژهەلاتی کوردستانە، بەڵام کۆمەڵێک لە مێژوونووسە کوردەکان هاوڕان لەسەر ئەوەی زەردەشت لە ناوچەی هەورامانی کوردستان لەدایک بووە.
زێدی زەردەشت
#جەلیل عەباسی#، مێژوونووس و توێژەری تایبەتی زەردەشتانسی وەرگێڕی زۆر لە کتیب و تێکستەکانی ئایینی زەردەشتی بۆ زمانی کوردی، لە پەڕتووکی (#ئاڤێستا نەسکی یەکەم#)دا، سێ هۆکاری سەرەکی بۆ ئەم بۆچوونە دەهێنێتەوە و لەڕییەوە دەیەوێ بیسەلمێنێت کە زەردەشت لەدایکبووی ناوچەی هەورامانە:
1- لێکچوونەوەی ناوی چیای (گوسالە) کە مێژوونووسان دەڵێن زەردەشت لەوێ لەدایک بووە، لەگەڵ چیای (#کۆسالان#) کە گوسالە حاڵەتی فارسیکراوەی هەمان کۆسالانە لە هەورامان و (ئیرانویچ)یش هەمان (ئورامۆن)ە و (ئوەرمێ)ش حاڵەتی هەڵە نووسراوی (ئورامیە) ئورامان یان هورامان واتا شوێن و مەڵبەندی ئاهوورامەنە.
2- ڕێژەیەکی یەکجار زۆر شوێنەوار، لە ئایینی زەردەشتی لە هەورامان بەجێ ماون، کە دەتوانین بڵێین لە ناوچەکانی تر کە ئایینی زەردەشتیان پەیڕە و کردووە، زۆرترە.
3- سەرنجدان لە جلوبەرگی کوردی و بەستنەوەی پشتوێنێک بە سێ گرێ، کە نیششاندەری دووپاتکردنەوەی هەموو ڕۆژەی سۆز و پەیمان لەگەڵ ئاهورامەزدایە بۆ بەجێهێنانی بنەمای ئایینی زەردەشتی، کە (بیر و وتە و کرداری چاکه) یە، لەلایەن کوردەوە.
ئامادەکردنی: سارا سەردار
[1]