نۋیستەی: ئاکۆ مارانی
11و ئەپڕیلو 2017
مانیفێست-کەرڎەو یەکسانی ژەن و پېیای
پاسە زانیان و ئەژناسیان، ناوچەو ھۆرامانی دېیارڎەو ژەنکوشتەی، ژەن بە ژەنی و گۆرە بە گۊلانە و ژەنی جېیاتی ونۍ و ھەر پاسە سێکس-ۋرەتەی و سواڵکەرڎەی ژەناش چنە نەبېیەن و ئا چېۋۍ بنەماو جېیاۋازیی کولتۇرو ھۆرامەکا بېیېنۍ. بەڵام چنی ئانەیچە چېرو ھەژمۇن بارکەرڎەی و جەنگی و ئاۋارە بېیەی و تېکەڵ بېیەی ناچاریی بە کولتۇرو بەرو ھۆرامانی و چە ئانیشا خراپتەر زاڵ بېیەو کولتۇرو پارتییایەتینە (حزبایەتینە)، کە مەڵامەتی سەرەکیی تڼوتیژی ھەن و بە بەراورڎکەرڎەو جۊرو پەیۋەڼییە کۊمەڵایەتییەکا ۋەڵۍ سەرھۊرڎای دەسەگەریی پارتییایەتی و بارکەرڎەی دەگاکا و جەنگی و ئاۋارە بېیەی و چنی پەیۋەڼییە کۊمەڵایەتییەکا ئی سەردەمەیە، کە پارتییایەتی دما خانەو مەژگو ھۆرامەکاو بەشۊ ئێراقیش ژاراوی کەرڎەن، بەرگنۊ کە ژەنکوشتەی، ۋنەدای ژەن و زاڕۊڵەی و ناکۊکی کۊمەڵایەتیی زېیاتەر سەرشھۊردان و کولتۇرو ھۆارامانی و ھۆرامەکاش شېۋنان.
ۋەرو ئانەیە و پەی ئا مەبەسەیە، مشیۊ ئېمە ھەم بە ئەۋەگېڵای پەی سەرو بنەماو ئارامیی و ئاشتیوازی کولتۇرو ھۆرامەکا و ھەم بە پەشتبینای بە بنەماکا جاڕنامەی گەرڎۇنی مافو مرۊڤی، تڼوتیژیېۋی ڕەگەزیی و ڕامیاریی و ئایدیۆلۆجیی، کە ۋەرانۋەرو ژەنا و زاڕۊڵا درۊسبېیەن، دلېنەبریۊ، پەی ئانەیە مشیۊ بە کرڎەۋە ناوچەو ھۆرامانی کریۊ بە ناوچەو ئاشتەۋایی کۊمەڵایەتی و ژیۋارو پارېزیای یەکسانی مافو ژەن و پېیای:
- دلېنەبەرڎەی جېیاۋازی کەرڎەی و سۇکایەتی کەرڎەی ڕەگەزیی چە سیستەمو پەرۋەرڎەی و فېرکارینە و ھەر پاسە پاڵافتە کەرڎەو زۋانی چە ۋاچا و دەسەۋاچە سۇکایەتیکەر و ڕەگەزپەرستییەکا پېیاسالاریی، ۋەرانۋەرو ئانەیۆ، یاگەۋستەی زۋانی ڕێزگېرانە و یەکسانگەرایانەو ڕەگەزو ژەن و پېیای دلۍ پەیۋەڼییەکا ڕاۋەبەریی کۊمەڵۍ و یاساکا ڕاۋەبەریینە.
- دەسەبەرکەرڎەو وەنەی باڵاتەری چە دەگاکا ھۆرامانینە، تاکو کناچۍ ھۆرامانی چە وەنەی بېبەشۍ نەبا و ئاسانکاریی پەی درېژەدای وەنەی کناچا، کە نەبېیەو فېرگاو وەنەی باڵاتەری بۊ بە مەڵامەتو نەکېیاستەی و نەتاۋای لۋای کناچا پەی وەنەی باڵاتەری چە بەرو دەگاکانە یان بەرو ھۆرامانینە.
- دەسەبەرکەرڎەو خزمەتگۊزارییە تەندرۊسی و دەرمانییەکا چە دەگاکا ھۆرامانینە، تاکو ژەنۍ ھۆرامانی فریاگوزاریی کریا، بەتایبەت خەسەخانەو زاڕۊڵەبېیەی و پزیشکی تایبەتیی ژەنا.
- دەسەبەرکەرڎەو خولە تایبەتەکا ھۊشیاریی کۊمەڵایەتی و کولتۇری و تەندرۊسی و ژیۋارپارېزی و پەرۋەرڎەی و فېرکەرڎەی و ھونەری و ئەدەبی و ..تد، تاکو ئاستو ھۊشیاریی و زانیاریی ژەنا ھۆرامانی بەرزبۊۋە و چە وابەستەیی و چەمەڕایی دەسو پېیایا ڕزگارشا بۊ.
- دەسەبەرکەرڎەی یەکسانانەو ھەلۊ ھەرمانکەرڎەی بە درۊسکەرڎەو ھەرمانگایا پەی ژەن و پېیای چە دەگاکا ھۆرامانینە، تاکو ژەنی با بە داراو دەسەڵاتی ئابۇریی وېشا و چە ملکەچیی پەی پېیایا ڕزگارشا بۊ.
- ئەۋەکەرڎەو سەنتەرو ھۊشیاریی و پارېزنای ژەنا، بەڵام دۇر چە ھەژمۇنو پارتییایەتی و ئایدیۆلۆجی و ئایینی و سەرپەرشتیکەرڎەیش چە لایەنو ژەنا وېشاۋە.
- ئەۋەکەرڎەو سەنتەرو دژە-تڼوتیژی پەی پارېزنای و پەشتیۋانیکەرڎەو ئا ژەنا، کە کۆتېنۍ و گنا ۋەرو تڼوتیژی دەرۇنی و جەسەیی دلۍ خېزانینە؛ بەتایبەت تڼوتیژی خەتەنەکەرڎەی و نەرېتۊ ئەتککەرڎەی جەسەیی ژەنا ھەر بە زاڕۊڵەی چە ڕاو خەتەنەکەرڎەیۊ.
- بەشکەرڎەی و بەخشای پلە و پایەکا ڕاۋەبەری دەگایا، فېرگاکا، ھەرمانگاکا و ...تد بە پیمانەو ئاماڎەیی و توانایی کەسیی کەسەکا و بە یەکسانی سەرو ھەر دۋە ڕەگەزەکەیەرە.
- ئەۋەکەرڎەو سەنتەرەکا وۍ-پارېزی و وۍ-فېرکاری و وۍ-کۊمەکیی ژەنا، کە چا سەنتەرانە ژەنی بتاۋا شارەزایی و زاناریی و ئەزمۇنەکا وېشا چنی یەکتری بەشکەرا و فاڕاۋە.
- ئەۋەکەرڎەی سەنتەری تایبەتی پەی پەرۋەرڎەکەرڎەی تواناییە ئەدەبی و ھونەریی و زانستی و کولتۇرییەکا ژەنا بە مەرامو زەمینەسازی پەی ڕاۋەبەریی کۊمەڵایەتیی و بەشداریی کولتۇریی ھەر دۋە ڕەگەزەکەی [ژەن و پېیا].
- ئەۋەکەرڎەی سەنتەرو ھۊشیار-کەرڎەی و ھەستیار-کەرڎەو ژەنا ۋەرانۋەرو ھەراسان-کەرڎەی سێکسیی و ئەتکی و زۊردایی سێکسیی چ دلۍ خېزانینە و چ بەرەو خېزانینە.
- ڕېکۆتەی کۊمەڵایەتی سەرو قەڎەخەکەرڎەی نەریتۊ خەتەنەکەرڎەی و سزادای ئەنجامدەرا خەتەنەو زاڕۊڵا بەگرڎینەیی و کناچا بەتایبەتیی و دەسنیشانکەرڎەیش بە تاوانی کولتۇریی و ڕېکۋستەی ڕۊشنگەریی کۊمەڵایەتی پەی وازئاۋرڎەی ئەڎایا چە خەتەنەکەرڎەو زاڕۊڵەکاشا.
------------------------------------------
وەنەرۍ بەڕێزی، پەی ئەژناسای پیتە تایبەتە ھۆرامییەکا دلۍ ئی نۋیستەیە، سەرو لینکو پیتەکا کلیک کەردۍ:
- ڎ: ئەڎا: دەنگ https://t.me/Ferhengu.Zvani.Horami/6322
- ۋ: ۋاران: دەنگ https://t.me/Ferhengu.Zvani.Horami/6328
- ڼ: مەڼ: دەنگ https://t.me/Ferhengu.Zvani.Horami/6324
- ۊ: لۊ: دەنگ https://t.me/Ferhengu.Zvani.Horami/6326
- ې ۍ: دەنگ https://t.me/Ferhengu.Zvani.Horami/6330
- ﯗ = و: مۇ
لینکو گرڎو پیتەکا ئەلفابێتی ھۆرامی
https://t.me/Ferhengu.Zvani.Horami/7588
[1]