جەماوەری ئازیزی کوردستان
تێکۆشەران و ئازادیخوازانی کوردستان و عێراق
دەستپێک، بەبۆنەی (61) شەست و یەکەمین ساڵیادی هەڵگیرسانی شۆڕشی مەزنی ئەیلوول پیرۆزبایی لە گەلی کوردستان دەکەین، تایبەت خانەوادەی سەربەرزی شەهیدان و پێشمەرگە گیان فیداکان و ڕێبوارانی ڕێگای ئازادی و تەواوی ئەو ئازیزانەی بەشدارییان لەو شۆڕشە مەزنە کردووە و ڕۆڵ و نەخشیان بەرز دەنرخێنین.
هاوڵاتییانی خۆشەویستی کوردستان
بەر لە شەست و یەک ساڵ، ئەو کاتەی کۆماری ئەوسای عێراق لە بەڵێنەکانی پاشگەزبۆوە، دانی نەنا بە مافەکانی گەلی کوردستان، پرەنسیبەکانی شەراکەت و پێکەوە ژیانی سیاسی نێو دەستووری عێراقی ژێر پێ خست، تەنانەت ڕێگە مەدەنییەکانی خەباتیشی داخست و بە لەشکرکێشی، ئاگر و ئاسن و شەڕ وەڵامی گەلی کوردستانی دایەوە، ئەوکات گەلی کوردستان بەڕابەرایەتیی #مەلا مستەفا بارزانی#، بۆ بەرگریکردن لە گەلی کوردستان و مافەکانی، خاک و سەروەرییەکانی، مانەوە و شکۆ و پیرۆزییەکانی، لە ڕۆژی 11 ی ئەیلوولی ساڵی 1961، خەباتی چەکداریی دەست پێکرد و هەموو تواناکانی لە شۆڕشێکدا کۆکردەوە، کە بە درێژترین و کۆکراوەترین و بەرهەمدارترین شۆڕشی نێو مێژووی گەلی کوردستان دەژمێردرێت، کە تائێستایش هەمووان، بە جیاوازییە ئایینی و نەتەوەیی و سیاسییەکانەوە شانازیی پێوە دەکەین و هێندە بە قووڵی، مەزنیی و مانا فرەڕەهەندەکانی ڕۆچۆتە نێو مێژوو، نەوە دوای نەوە پەند و عیبرەتی لێ وەردەگرن و بۆتە سەرچاوەیەکی ڕوون و زەڵاڵیش بۆ وانە گەورەکانی: (کوردایەتی، ڕەسەنایەتی، ڕابوون، وەستانەوە لە ڕووی ستەم، ویقاری پێشمەرگە، گیانفیدایی، عەدالەتخوازی، ڕۆشنبیریی نیشتیمانی، ماف و دیموکراسی، دیالۆگ و ئازادی، هونەری دانووستان و، دواجار کوردستان یان نەمان).
هاونیشتیمانیانی هێژا
شۆڕشی مەزنی ئەیلوول شۆڕشی هەمووان بوو، شۆڕشی هەموو جیاوازییەکان بوو، کۆکەرەوە و ڕوئیا ڕوون و ئاییندەبین بوو، هەر بۆیە زوو بەرهەمەکانی چنییەوە و ڕژێمی #بەغدا#ی ناچار کرد، کە غرووری خۆیان بشکێنن و بێن لە دامێنی چیا سەرکەشەکانی کوردستانەوە، لە نێو خێمە و بارەگا سادەکانی شۆڕشەوە داوای دانووستان لە ڕابەری نەتەوە، سیمبوڵی ئازادیی گەل (مستەفا بارزانی) بکەن، کە ئاکام ڕێککەوتننامەی مێژوویی 11ی ئاداری 1970 لێکەوتەوە، ئەو ڕێککەوتننامەیەی بووە بەڵگەنامەیەکی مێژوویی و بناغەیەکی پتەو بۆ هەموو ئەو دەسکەوتانەی دواتر بەدیهاتن. ئەوەش یەکەمجار بوو کە شۆڕشێکی کوردستانی بتوانێ بە ئامانج بگات و دروشمی خۆی بێنێتەدی و سەرکەوتنە سەربازییەکانی بکات بە دەسکەوتی سیاسی و مافی نەتەوایەتی و نیشتیمانی بەدەست بهێنێ. دەبێ نەوەکان ئەم دیمەنە سیاسییانە بخوێننەوە، دەبێ هەمووان لەو ڕاستییە ڕۆشنە تێبگەین، کە ڕەوایی ماف، ئیرادەی گەل و یەکڕیزیی نیشتیمانی کلیلی سەرکەوتنەکانە و، ئاکام مەزنترین هێزی دوژمنکارانە تێکدەشکێنن، وەک ئەوەی شۆڕشی ئەیلول و پێشمەرگە قارەمانەکان و #پارتی دیموکراتی کوردستان# و ڕابەرە خۆنەویستەکەی کردی، ئەم وانانە پتر لە هەموو کات، بۆ ئەمڕۆ زۆر گرنگ و پێویست و بایەخدارن، تایبەت کە ئەرک گەلێکی زۆرمان بە ئەستۆوەیە و، عێراق و ناوچەکە سیخناخن بە ناڕوونیی سیاسی و گۆڕانکارییە چاوەڕوانکراوەکان، بۆیە دەبێ هێزە سیاسییەکانی کوردستان و عێراق بە هەمان گیان و ئیرادەی شۆڕشی مەزنی ئەیلوول، قۆڵی چارەسەریی لێ هەڵماڵن، تا بتوانن هەمووان بەیەکەوە دەروو و دەروازەیەکی خێر بۆ گەل و ئاییندە سیاسییەکەی بکەنەوە.
هاوڵاتییانی ئازیز
لەم یادە پڕ شکۆیەدا نابێ ڕۆڵی زێڕینی پارتی دیموکراتی کوردستان نەخەینە بەر دید و زیهنی هەمووان، تایبەت لاوانی کوردستان و ئەو نەوە تازەیەی، کە ژیرانە دەتوانن ئەمڕۆ بە دوێنێ وە گرێ بدەن و لە پێناو ئاییندەسازیدا لە نێو کۆڕی کار و بەخشش و خەباتدا سەرگەرمی داهێنانن، بەوپەڕیی سەربەرزییەوە دەڵێین: لە نێو ئەو شۆڕشە مەزنەدا، دواتر لە شۆڕشی گوڵان، ڕاپەڕین، پرۆسەی ئازادیی عێراق و شەڕی نەگریسی داعش، پارتی دیموکراتی کوردستان زۆرترین قوربانی داوە، زۆرترین شەهیدی نەزری نیشتیمان کردووە، زۆرترین دەسکەوتیشی وەدەستهێناوە و لە کوێ شەڕ هەبووبێ قەڵغانی بەرگری بووە و لە کوێش سەقامگیری و ئارامی هەبووبێ، لەوێ دەستی ئاشتی و بازووی ئاوەدانی بووە، ئەمڕۆش بە هەمان گیان و بە هەمان گڕوتین و بڕواوە بەردەوام دەبێت لە خەبات، قوربانیدان، بەرگریی نیشتیمانی، چەسپاندنی ئاشتی و ئاوەدانی و، لەو پێناوەشدا لەگەڵ هێزە سیاسی و کولتووری و کۆمەڵایەتییەکان کار دەکات و تێدەکۆشێت.
لە کۆتاییدا، بە ئاوڕدانەوە لە مێژووی پر ئیفتیخاری شۆڕشی مەزنی ئەیلوول، دەڵێین:
دروود بۆ گیانی بەرزەفڕی شەهیدانی گەلی کوردستان، سەروەریان بارزانیی نەمر و کاک ئیدریسی جوانەمەرگ.
دروود بۆ ڕێزدار سەرۆک #مەسعود بارزانی#، ئەو سەرۆکە تێکۆشەرەی (60) شەست ساڵە پێشمەرگەی ڕێگای ئازادییە.
دروود بۆ ئازادیخوازان، بۆ هەموو ئەوانەی پێخەمەت ئازادی، دیموکراسی و پێکەوژیانی ئاشتییانە خەبات دەکەن.
دروود بۆ هاوڵاتییانی کوردستان، ئافرەتان، لاوان، قوتابیان، پیر و جەوان و تێکڕای چین و توێژەکانی کوردستان.
دروود بۆ پارتی دیموکراتی کوردستان، ئەو پارتە (76) حەفتاو شەش ساڵە پێشڕەوی خەبات و تێکۆشان و قوربانیدان و دەسکەوتەکانە.
پارێزراو بێت دەسکەوتە دیموکراسییەکانی کوردستان، کە خۆی لە پەرلەمانی کوردستان، سەرۆکایەتی هەرێمی کوردستان، حکومەتی هەرێمی کوردستان و دامەزراوە شەرعیەکانی هەرێمی کوردستان بەرجەستە دەکات.
شکۆدارتر بێت (61) شەست و یەکەمین ساڵیادی هەڵگیرسانی شۆڕشی مەزنی ئەیلوول.
بژی کورد، بژی کوردستان. [1]
مەکتەبی سیاسیی
پارتی دیموکراتی کوردستان
10ی ئەیلولی 2022