ئاژانسا ئەلمانیا د ڕاپۆرتەکێ دا دیار دکەت کو پشتی مەسعود بارزانی سەرۆکێ ھەرێما کوردستانێ سەرەدانا ئەمریکا و ھندەک وەلاتێن ئوروپی کری، پشتەڤانیەکا باش بۆ ڕاگەھاندنا دەولەتا کوردی بدەستڤە ئینایە و بارزانی دێ دەولەتا کوردی ڕاگەھینیت و وەلاتێن زلھێز ژی دژبەریا ڕاگەھاندنا دەولەتا کوردی ناکەن.
ئاژانسا دویتشە فیلە یا ئەلمانیا د ڕاپۆرتەکێ دا بەحسێ ڕەوشا دووماھیێ یا ڕۆژھەلاتا ناڤین، عیراق و کوردستانێ دکەت و د ڕاپۆرتێ دا ھاتیە دیار کرن کو ئەڤرۆکە ل ڕۆژھەلاتا ناڤین دو دەولەت پارچە بووینە و ئەو ژی عیراق و سووریانە، داعشێ پشکەک گەلەک مەزن ژ ئاخا ھەر دو وەلاتان داگیر کریە و نھا بەرێ خوە ددەتە بەغدا و دیمەشقێ و ل عیراق و سووریا ئێدی دەولەتەکا ئێکگرتی نەمایە و ڕەوشا وەلاتان ژی گەلەک خرابە و حوکمەتێن ناڤەندی یێن ھەر دو وەلاتان ژی نەشێن ئێمناھیێ بۆ خەلکێ خوە دابین بکەن و ڕۆژانە ڕێکخستنا تیرۆرستی یا داعشێ ب دەھان وەلاتیێن بێ تاوان دکوژیت و لەشکرێ وان وەلاتان ژی نەشیایە سنۆرەکێ بۆ زێدەگاڤیێن داعشێ دانێت.
د بەردەوامیا ڕاپۆرتێ دا ھاتیە دیار کرن کو ھەرێما کوردستانێ ب سیاسەتا سەرۆکێ وێ ھەرێمێ مەسعود بارزانی شیایە ئاخا خوە ژ تیرۆرستێن داعشێ پاقژ بکەت و نھا کورد ئیدارا کەرکووکێ دکەن و دخوازن ب ڕیفراندومەکێ وی باژارێ مەزن و گرنگ ڤەگەریننە سەر ھەرێما کوردستانێ و نھا کار بۆ وێ یەکێ دھێتە کرن و ب ڤەگەراندنا کەرکووکێ دێ بارزانی دەولەتا کوردی ڕاگەھینیت.
ئاژانسا ئەلمانی ئاماژە ب ڤێ یەکێ کریە کو د سەرەدانا خوە یا ڤێ دووماھیێ دا بۆ ئەمریکا سەرۆک و جێگرێ سەرۆکێ ئەمریکا پشتەڤانیا خوە بۆ بارزانی دیار کرینە و وان ژی ئێدی نەڤێت کو کورد ببنە پشکەک ژ ئالۆزیێن ناڤخوەیی ل عیراقێ، چونکو بۆ ئەمریکا و وەلاتێن ڕۆژئاڤا ھەبوونا ھەرێم یان ژی دەولەتەکا کوردی ل عیراقێ گەلەک گرنگە، کورد نھا باشتر ژ ھەر کەسەکێ بەرژەوەندیێن ڕۆژئاڤا دپارێزن و ب ھزاران نەتەوە و کێم نەتەوێن دی یێن کو ژ دەستێ داعشێ ڕەڤینە نھا ل ھەرێما کوردستانێ دانە و کورد وان دپارێزن و ئەوە ژی خالەکا گەلەک گرنگە کو دبیتە ئەگەر وەلاتێن ڕۆژئاڤا پشتەڤانیێ ل دەولەتا کوردی بکەن.
د دووماھیا ڕاپۆرتا ئاژانسا دویتشە یا ئەلمانیا دا ئەو یەک ژی ھاتیە دیار کرن کو کورد ل ھەرێما کوردستانێ و پارچێن دی یێن کوردستانێ نھا پتر ژ ھەر دەمەکێ پشتەڤانیێ ل ڕاگەھاندنا دەولەتا کوردی دکەن و گەلەک وەلاتێن کو بەری نھا دژبەریا کوردان دکرن ژی پشتی شەرێ داعشێ بۆ وان دیار بوو کو ھەبوونا دەولەتەکا کوردی چو زیانا خوە بۆ وان نینە، بەلکو بەرۆڤاژی وێ یەکێ کورد دشێن ببنە جیران و ھەڤپەیمانێن باش بۆ وان، ئێک ژ وان وەلاتێن کو نھا ل ھەمبەر دەولەتا کوردی وەک بەرێ توند نینە ژی تورکیایە و بێگومان تورکیا دەمێ دیت ئەمریکا و ئوروپا پشتەڤانیێ ل کوردان دکەن ئێدی ناخوازیت پەیوەندیێن خوە یێن ب ھێز کو ل گەل کوردان ھەنە تێک بدەت و ئەو ھەموو خالە ژی دبنە ئەگەر کو بارزانی ڕژد بیت د دەمەکێ نێزیک دا دەولەتا کوردی ڕاگەھینیت.[1]
کوردیپێدیا بەرپرس نییە لە ناوەڕۆکی ئەم تۆمارە و خاوەنەکەی لێی بەرپرسیارە. کوردیپێدیا بە مەبەستی ئەرشیڤکردن تۆماری کردووە.
ئەم بابەتە بەزمانی (کرمانجی) نووسراوە، کلیک لە ئایکۆنی
بکە بۆ کردنەوەی بابەتەکە بەو زمانەی کە پێی نووسراوە!
ئەڤ بابەت ب زمانێ (کرمانجی) هاتیە نڤیساندن، کلیک ل ئایکۆنا
بکە ژ بو ڤەکرنا ڤی بابەتی ب وی زمانێ کو پێ هاتیە نڤیساندن!
ئەم بابەتە 1,455 جار بینراوە
ڕای خۆت دەربارەی ئەم بابەتە بنووسە!