#عەلی تولابی# ڕیسی سەدساڵەی فاشیزمی فارسی کردەوە خوری
د. #ئارام ڕەفعەت#
دواجار عەلی تولابی بووە براوەی خەڵاتی (عەسری جەدید).
عەلی ئەو مناڵە بلیمەتەیە کە لەگەڵ خوشک و برایەک و دایک و باوکیدا لە خانوویەکی دوو ژووریدا دەژین، پرۆڤەی گۆرانییەکانی لە هەمان ئەو ژورەدایە کە خێزانە پێنج کەسییەکەی تێیدا دەخەون، دەخۆن، دەخوێنن و میوانداری دۆست و خزمانییان دەکەن. عەلی ڕاهێنەری نەبووە و تەنها باوکی هاوکاری بووە.
عەلی لەو کەلاوەیەوە بەسەر دەیان مناڵی خواپێداوی نەتەوەی سەردەستی فارسدا بووە براوەی پێشبڕکێکە.
#حەسەن زیرەک# ئەو کەلاوەیەشی نەبوو، نزیک بە سەرتاپای ژیانی بێ ماڵ و حاڵ بوو. بەڵام، ئەگەر لێم بپرسن چ شتێک کورد هەیەتی فارس و عەرەب و تورک نییانە و کوردی پێ لەو نەتەوانە جیا دەکرێتەوە، بێ دوو دڵی دەڵێم #حەسەن زیرەک#.
ئاخر دەوڵەتەکانی تورک و عەرەب و فارس ملیۆنان دۆلار لە هونەرمەندەکانیان سەرف دەکەن و بەڵام کامییان هونەرمەندێکی خۆرسکی هاوشێوەی حەسەن زیرەکییان هەیە؟
#محەمەدی ماملێ# وتبووی بەدەنگی خۆم و بە کەمان و تەمبوورێک، ئەویش دوو ئازەری بۆیان دەژەنیم، هەر ئەوەندەم پێ دەکرێ. بەڵام ئەوەی ماملێ کردووییەتی جۆرێکه لە موعجیزە. ماملێ هێندە ڕەسەنە، هێندە ڕەسەنە، هونەرمەندی هیچ نەتەوەیک لەم بوارەدا شان نادەن لەشانی. مرۆڤ دەبێت ڕۆحییەت و زەوق و چێژی کوردبوونی بە هونەری داگیرکەر نەشێوابێت ئەوسا دەتوانێت لێوان لێو چێژ لە ماملێ ببینێت.
#یەڵماز گۆنای# مەزن هێندەی تەمەنی هونەری لەزیندان بەسەر بردووە، چارەکی ئەوەی لەدەرەوە نەبووە. زۆرینەی فیلمەکانی لەزیندان بەرهەم هاتوون. تێکست و سیناریۆ و پڕۆڤە و تەنانەت هەندێکیان وێنە و ئەکشنی بەشێک لە فیلمەکانیشی لەزینداندا بووە. لە بەرامبەریشدا هوونەرمەندە تورکەکان هەموو ئیمکاناتی ماددی و مەعنەوی دەوڵەتی تورکیان لەژێر دەستدا بووە، بەڵام گۆنای دەبێتە براوەی خەڵاتی کان و ئێوەش پێم بڵێن تا ئێستا کامە تورک براوەی ئەو خەڵاتەیە؟
ئێوە تەماشای ناونیشانی ئەم بەرنامەی ئێرانییەکان بکەن، واتە (عەسری جەدید) لانی کەم شەش سەدەیە فارسی زمانی فەرمی دەوڵەتە و لە سەد ساڵی ڕابردووشدا دەیان ملیار دۆلاری خراوەتە خزمەتی پێشکەوتن و گەشەسەندنی ئەو زمانە و لە بەرامبەریشدا سەدان ملیۆن دۆلار بۆ لەبیر بردنەوەی زمانی کوردی خەرج کراوە، کەچی فارسی ناتوانێت و نەیتوانیوە بێ هاوردەکردنی نیوەی چەمک و وشەکانی ببێتە زمانێکی سەربەخۆ و کەڵکی ئاخاوتن و نوسینی هەبێت.
دواجار عەلی تولابی ڕیسی سەدساڵەی فاشیزمی فارسی کردەوە خوری. ڕیسی دابڕاندنی لەک و لوڕ لە نەتەوەی مەزنی کورد. ڕەنگە لوڕەکان وا بەئاسانی پەیوەست نەبنەوە بەکورد، بەڵام عەلی گیان بەو ئاڕاستەیەدا بەربەستێکی نەفسی سەختی تێکشکاند. بەربەستێک کە تەنانەت بە خەیاڵی هیچکام لە حیزبەکانی ڕۆژهەڵاتدا نەهاتووە.[1].
19-07-2022