لەشفرۆشی کۆنترین پیشە لەمێژوودا
نوسەر: #شوان ئەحمەد#

(کامتان بێگوناهە، بایەکەم بەردی تێبگرێت)
-حەزرەتی مەسیح -
ئەم نوسینە بەر لەهەر شتێ، بەخاتری هەموو ئەو کچ و ژنانەیە کەدەستکورتی و هەژاری و قۆرتی زەمانە، ناچار بەپیشەیەکیان دەکات کە خۆیان خوازیاری نین و ئاواتی بۆ ناخوازن.

-1-
تەمەنم نزیکەی دەساڵانێک دەبوو. بەسەردان چووبوین بۆماڵی خزمێکمان. لەپڕ لەدەرەوە غەڵبەغەڵب و بێنەوبەردە پەیدابوو. هەموو بەپرتاو بۆی دەرچوین، تابزانین چ باسە. هێندەی نەبرد ئەو کۆڵانە بەرتەسکە، پڕ بوو لەخەڵک و خوا.
لەو سەروبەندەدا، ژنێکی عەبا بەسەری سەرتاپا ڕەش دەرکەوت. دوو پۆلیس پێش خۆیان دابوو. لەپیاوێکی کەتەی چوارشانەیان دەپاراست کەدوای کەوتبوو. هەڕەشەی لێدەکردو جنێوی پێدەدا. کێردێکیشی بەدەستەوەبوو.
هەرچۆنێک بوو ژنەیان بەپاڵ خستە پشتی ئەو ئۆتۆمۆبێلەی، لەو سەری گەڕەکدا وەستابوو. ئەو ناوە پڕبوو بوو لەهاتوهاوار و فیکە کێشان و هەلهەلە لێدانی ئەو خەڵکەی لەوێدا کۆبووبوونەوە، لەگەڵ دانیشتوانی ماڵەکانی ئەو چواردەورەدا.
ئەوکات دایکم زۆر هەوڵیدا (کەنازانم بۆچی)، تامن هیچ حاڵی نەبم و نەیدەهێشت گوێبیستی قسەو باسی ئەو ئێوارەیەی گەورەکان بم. بەڵام هەرچۆنێک بێت تێگەیشتم، ئەو ژنە لەماڵی براکەی ڕایکردووەو چووە بۆماڵی خۆشەویستەکەی.
کەدەچێتە ئەوێ یەکێک لەماڵە درواسێکان، هەواڵ بەبراکەی دەدات و براش بەقەسدی کوشتنی هەڵدەکوتێتە سەری. ناچار ئەو ماڵەی کچەکەی لێدەبێت، پۆلیس ئاگاداردەکەنەوە. ئەوانیش دێن و دەیبەن بۆ بنکەو پاشان، دەینێرنە ماڵی موختاری گەڕەک. ڕەنگە دواجار ئەو کچە ژیانی لەسەردەستی براکەی و ئەو کێردە تیژە کۆتایی هاتبێت کە تائێستاش، لەبەرچاوم لاناچێت و لەیادەوەریمدا ناسڕێتەوە.
بیرمە هەرچەندە ئەوکاتە منداڵیش بووم، بەڵام شەوەکەی خەو لەچاوم نەکەوت. شەوێک بوو پڕبوو لەمۆتەکە و غایلەی خراپ. لەژێر لێفەکەوە بەبێدەنگی دەگریام. دەگریام و نەشم دەویست، کەس پێم بزانێت. دیمەنی ئەو ژنە عەبا بەسەرەی بەرەو نادیار دەبرا، لەیەککاتدا تۆقێنەر و تاقەت پڕوکێنەربوو. هەستم بەرامبەری تێکەڵیەک بوو لەڕق و بەزەیی، لەخەمخۆری و بەنەفرەت کردن.
کاتێک بووم بەپارێزەرەو کێشە و دۆسێی کەسانی لەشفرۆش و داوێن پیس و سۆزانی دەهاتە لام، ڕێک و ڕاست وێنەی ژنەی عەبا بەسەری ئەو ڕۆژە، لەیادەوەریمدا قوت دەبووەوە.
ئەوکات نا کەمناڵ بووم، وەلێ ئەوکاتەی دۆسێی لەشفرۆشان لەسەرمێزی ئۆفێسەکەم کەڵەکەبوون، زانیم زۆربەی زۆری ئەوانە قوربانین. قوربانی نەزانی و نەبونی و کورت بینی. ئەوانە قوربانی باوک و برا و مێرد و تەنانەت خۆشەویستەکانیشیان بوون.
قوربانی کۆمەڵگەن، ئەو کۆمەڵگەیەی لەسەر هەندێ هەڵە، سەختگیرە و لەپای هەندێ هەڵەی ناقۆڵاتردا لێبوردە و سنگفراوانە. بەئاشکرا تەرێز لەهەندێ کاری نابەجێ دەکات و بەپەنهانی و ژێر بەژێریش ئەنجامیان دەدات.
ئەمە پێشەکی کتێبەکەی نوسەر و پارێزەر و ڕۆژنامەنوسی عێراقی خاتوو (سەلام خەیات)ە بەناوی (لەشفرۆشی بەدرێژایی مێژوو) و دەیەوێت ئەوەبکاتە دەروازەیەک، بۆ قسەکردن لەبابەتێکی بڤەو ڕێگە پێنەدراو. بابەتێک هەمووان بەڕواڵەت تەرێزی لێدەکەن و بێزی لێدەکەنەوە، کەچی بەنهێنی و لەژێرەوەش قسەی لەبارەوە دەکەن و حەسرەتکێشن بۆی.
ئەم کتێبە یەکێکە لەو سەرچاوە کەم و دەگمەنانەی، خۆی لەقەرەی بابەتێکی یاساغ و نەخوازراو دەدات. بابەتی لەشفرۆشان، بابەتی کۆنترین پیشە لەمێژوی مرۆڤایەتیدا.

- 2-
لەشفرۆشان کێن؟ بۆچی ئەو کارە دەکەن؟ ئەوەی دەیکەن هەڵبژاردنێکی ئاگایانەو لەقەناعەتەوەیە، یاخود کارێکی غەفڵەت زەدانەیەو ناچاری پێیان دەکات؟
لەشفرۆش ئەتکی جەستە و کبریائی خۆی دەکات، یان جەستەی دەگەشێنێتەوەو غەریزەی تائەوپەڕی تێر دەکات؟ بەکورتیەکەی لەشفرۆشی کامەیانە، بەدبەختیە یان مومارەسەکردنی ئازادییە؟ بێ حورمەتیکردنە بەنۆرم و بەهاکانی کۆمەڵگە، یاخود گوێگرتنە لەغەریزەکانی خۆی و جڵەو شلکردنە بۆ حەز و ئارەزووە ئیرۆتیکیەکان. تۆڵەکردنەوەیە لەخود یان لەبەرامبەر؟ چێژ بینینە یاخود بزنس؟
نەسکی یەکەمی ئەم کتێبە، تەرخانە بۆ هۆکار و پاڵنەرەکانی لەشفرۆشی و هەرلەوێدا پێناسەکردنێکی کورتی لەشفرۆشی تێدایە، دەڵێت: (لەشفرۆش ئەو ژنە یاخود ئەو پیاوەیە کە بەرامبەر بڕێک پارە، چێژی سێکسی دەبەخشێتە - یان دەفرۆشێتە -، چەندین کەس و جەستەی دەکاتە کاڵایەک بۆ پارە پەیداکردن).
لێرەدا پرسیارەکە ئەوەیە: ئایا ئەو کچ و ژنانەی ئەوە دەکەنە پیشەو لەڕێی هەڕاج کردنی لەشولاریانەوە پارە پەیدا دەکەن، لەکچ و ژنانی تر جوانترن یان ژیرتر و زۆرزانترن؟ یان ئەوانە پێداویستی بایۆلۆژیان بۆ سێکسکردن و ڕاموسان خۆ خاڵیکردنەوە، لەوانی دیکە زیاترە؟ یاخود پێداویستی زیاتریان بە پارەوپول هەیە؟
یان تۆبڵێی ئەوانەی لەشفرۆشی دەکەنە پیشە، هۆکارەکەی ئەوەبێت کەسانێکی تەمبەڵ و ئیش نەکەربن و بیانەوێت بەپیشەیەک نان پەیدابکەن و ژیان بگوزەرێنن کە نەتەقەللای فیکری دەوێت و نەپێویست بەشانوباڵ کوتین دەکات و نە سەرمایەیەکی گەورەشی گەرەکە؟
سەرەتاو بەپشت بەستن بەتیۆرە و تیۆریزەی زۆرێک لەدەرونناسان، دەبێت بڵێین هەرچەندە ئەنگێزەی سێکسی، جڵەوی بڕێک لەڕەفتار و هەڵسوکەوتی مرۆڤ دەکات و (زیگمۆند فرۆید)یش وەک درێژە پێدەری ئەنگێزەی ژیان سەیری دەکات، وەلێ لەگەڵ ئەوەشدا ئەو غەریزەیەو پرۆسەی جوتبوون و خۆ تێهەڵسوین و سێکسکردن لای زۆرێکی زۆر لەسۆزانیەکان، دوچاری خامۆشی و متبوونێکی قوڵ دەبێت و زۆربەیان ناتوانن چێژی لێوەربگرن.
لەشفرۆشی سەرەڕای پەیوەستبونی بەسێکس و مومارەسەی جوتبوونەوە، وەلێ هیچ چێژێکی جەستەیی بۆ خانمانی لەشفرۆش تێدانییەو مەبەست لەئەنجامدانی شتێکی دیکەیە (پارە پەیداکردن). پوڵ لەبەرامبەر سێکسدا، ئەوە ئامانج و مەبەستەکەیە.
بەئامانج گرتنی سێکس بۆ پارە لای سۆزانییەکان، ئەو هاوکێشە باوە هەڵدەوەشێنێتەوە کەسێکسکردن، بۆ حەزی ڕۆحی یان چێژی جەستەیی یاخود بۆ ئەنجامدانی پێداویستیەکی بایۆلۆژی بێت، یان بۆ منداڵ خستنەوە بێت، بۆ خاتری پاراستنی ڕەگەزی مرۆڤایەتی (بەتێگەیشتنە کۆمەڵایەتیەکەی).
نەخێر سێکس لای لەشفرۆشان، تەنها بۆخاتری پارەیە. ئەوەش سێکسکردن دەکات بەپیشەو لەشفرۆشیش وەک هەر کاسبی و بازرگانیەکی دیکە، دەمەو ئێوارە بێت یان دەمەو بەیانی، سەیری جزدان و جانتای پارەکانی دەکات و هیچی تر.
لێرەوەیە پەیوەست بونی ویژدانی و ڕۆحی لەشفرۆشان بەمشتەرییەک لەمشتەریەکانیانەوە، یان هەر نییە یاخود گەر هەشبێت دەگمەنە. پەیوەست بونی ڕۆحی و بیرکردنەوەی تەندروست لەیەکێک کە سەبوریت بدات، لەدۆخێکی ئارام و پڕ سوکنایدا دروست دەبێت، نەک لەفەزایەکی پڕ لەدڵەڕاوکەدا، یاخود لەشوێنێکدا کە لەشفرۆش هەوڵدەدات لەکەمترین ماوەدا، لەگەڵ زۆرترین کەسدا تگەوبەرانی بکات، بۆخاتری بەدەست هێنانی زۆرترین بڕی پارە.
دەرونشیکاران جیاوازی لەنێوان دوو جۆر لەجەستەدا دەکەن: (جەستەی تەندروست و جەستەی سۆزانی). جەستەی تەندروست بۆ خاوەنەکەی دەبێتە چاوگی ئارەزووی جنسی و دەسوێژێک بۆ تێربوون و گەیشتن بەئۆرگازم. وەلێ جەستەی سۆزانی بۆ خۆی نییە، بەڵکو جەستەیەکە بۆ ئەوی دی و بۆ تێرکردنی حەز و ئارەزووە نەخۆشەکانی کابرای سێکس کڕ.
لێرەوە لەشفرۆش جەستە جەستەی خۆی نییە، بەڵکو بارمتەی حەز و چڵێسیەکانی کڕیارەو پابەندە بەئارەزووەکانی ئەوەوە. هەر بۆیە جەستەی لەشفرۆش، جەستەیەکە بێگیان و ساردوسڕ و مردوو. لەکاتی سێکسکردن و دەست پێداهێنان و لستنەوەیدا، نەک هەر ناگەشێتەوەو موچرکەی پێدا نایەت، بەڵکو زیاتر جەستەیەکی ڕەق و تەق و شەڕانگێز و سادی دەردەکەوێت.
زۆرن ئەوانەی لەقەحبەخانەکان و ماڵوحاڵی لەشفرۆشاندا، بەنیازی باوەشی گەرم و سۆز و میهرەبانی چون، بەڵام دواجار بەر جنێو و زلە و تف و پاشە لەقەی لەشفرۆشان کەوتن و گەردن کەچ و ڕۆح بریندار هاتونەتە دەرێ .
لێرەدا پێویست بەوەدەکات ئێستێک بکەین و ئەو پرسیارە بوروژێنین کە داخۆ پاڵنەری سەرەکی و تاقانە بۆ لەشفرۆشی، هەر پارە و مادەیە و هیچی تر؟
ئێمە گەر پاڵنەری مادیمان وەک تاقە سەرچاوە سەیرکرد، ئەوا دەبێت حوکمێکی بێویژدانانە بدەین و بڵێین (هەرچی ژن و کچی دەسکورت و نەدارە لەشفرۆشن) کەهەرگیز وانییە، یان بڵێین (هەرچی لەشفرۆش بێت، دەوڵەمەند و پارەدارە) کەئەویش ڕاست نییە.
دەی گەر بشڵێین هۆکاری سەرەکی شەبەق و پێداویستی سێکسیە، کەواتە دەبێت (هەموو کچانی شونەکردو سۆزانی بن)، کەوانیە. یان دەڵێن لەشفرۆشی پەیوەندی بە نەخوێندەواری و نزمی ئاستی ڕۆشنبیری و نەفامیەوە هەیە کەئەوەش ڕاست نییە، چونکە وەک خاتوو سەلام خەیات دەڵێت (یەک دنیا لەشفرۆش هەن، ئەوەندە ڕۆشنبیر و خوێندەوار و ژیرن، کەس نایان بەزێنێت).
ئەمانە دەریدەخەن کە لەشفرۆشی تاکە پاڵنەرێکی نییەو زیاد لەهۆکارێک بەشدارن تێیدا، وەک (هۆکاری ئایینی، هۆکاری ئابوری، هۆکاری دەرونی، هۆکاری فسیۆلۆژی و... هتد).
لەڕاستیدا ئەوەی ئاشی لەشفرۆشی دەگێڕێت ژنان نین، پیاوانن. پیاوە نەخۆش و پڕ لەگرێ و چەپێنراوەکانن. داینامۆی لەشفرۆشی کیسە پارەی بەرباخەڵی ئەو پیاوانەیە کە حەزدەکەن لەماڵی خۆیاندا، سەردار و سەروەر بن و لەتیاترۆخانەو خانە و لانەی لەشفرۆشانیشدا، خۆڕی و تۆڕی بچنەوە سەر پلێتە ئەسڵیەکەی خۆیان.
لێرەدا سەرنجی خوێنەر بۆ لای ڕۆماننوسی گەورەی میسری و خاوەنی خەڵاتی نۆبڵی ئەدەبیاتی ساڵی 1989، نەجیب مەحفوز ڕادەکێشم لەسێینەکەیدا (بین القصرین، قصر الشوق، السکریة). لەوێدا ئەحمەد عەبدولجەواد کەل ەزنجیرە تەلەفزیۆنیەکەیدا مەحمود مورسی ڕۆڵی دەبینێ ، لەماڵەوەو لەئاست هاوسەرەکەی (کەهودا سوڵتان ڕۆڵی دەگێرێ ) و منداڵەکانیدا، چەند بەویقار و سەختگیر و ترسناک و بەشەرەفە، کەچی کە شەوانە لەگەڵ هاوڕێکانیدا دەچنە ماڵی لەشفرۆشان (لەزنجیرە تەلەفزیۆنیەکەدا شویکار و مەعالی زاید ڕۆڵی لەشفرۆشەکان دەبینن)، دەبێت بەچ جاکەش و موونەرم و سوکوسەلمێک.
ئەوەی تەمەنی لەشفرۆشی لەبەربەیانی مێژووەوە (واتە لە زەمانی هەپە هەپەکەوە) درێژکردۆتەوە تائەمڕۆ، پیاوانی تەرەس و شەرواڵ پیسن، بەخۆیان و کیسەی پڕی بەرباخەڵیانەوە. خاتوو سەلام خەیات دەڵێت، لەشفرۆشێک ئاوای دەوت: (تۆبە دەکەم، بەخودای گەورە تۆبە دەکەم. بەڵام دەبا پیاوانیش بەرلەمن تۆبە بکەن و ئیتر لەدەرگام نەدەن).
بەڕاست پیاوان بۆ تۆبە ناکەن، چی وادەکات پیر و گەنج، ژندار و بێ ژن (زگورتی و لۆزەنگەر)، ڕێی ماڵە سۆزانیەکان بگرنە بەرو بەسەر دەست و پێی لەشفرۆشاندا بکەون؟
سەیر ئەوەیە زۆرێک لەو پیاوانەی موشتەری بەردەوامی قەحبەخانە و ماڵی لەشفرۆشانن، ئەوانەن کەژن و منداڵیان هەیەو هاوسەرگیریان کردووە.
ئەوە بۆ توێژەرانی دەرونی و دەرونناسی، جێ سەرنج و شوێن پرسیار بووە.. پرسیاری ئەوەی بۆچی دەبێت پیاوێک کەخاوەنی ژن و منداڵ بێت، بەناو جێگایی هاوسەرەکەی ڕازی نەبێت و ئارەزووەکانی لەباوەشی سۆزانیەکدا تێر بکات؟
ئەم جێگۆڕکێ کردنەی پیاوان لەسێکسکردندا و پشتهەڵکردن لەهاوسەرەکانیان و ڕوکردنە سۆزانیەکان، هەندێک خەتاکەی دەخەنە ملی ژنان خۆیانەوە. بەوەی هەموو وەختی خۆیان، دەدەن بەماڵ و منداڵ و مێردەکانیان وەلاوە دەنێن. یان لەکاتی ئاوسبون و منداڵ بوون و عادەبونی مانگانەدا، لەسێکسکردن و جوتبوون دەچنەوە. یاخود ئەو بێزاری و بێتاقەتیەی توشی ژنان دێت دوای ساڵی یەکەم لەهاوسەرگیری، وایان لێدەکات تەرێز لەسێکس و جوتبوون بکەن، لەگەڵ پیاوەکانیاندا.
پاڵنەرێکی دیکە کە پیاوان والێدەکات ناوجێگەیی هاوسەرەکانیان جێبێڵن و باوەشی سۆزانیەکان هەڵبژێرن، پەیوەندی بەوەوە هەیە ژنی خۆرهەڵاتی بەهۆی پەروەردەی خێزانیەوە، ترسی هەیە لەگەڵ خۆشەویست و دەزگیران و مێردەکەیدا، هەستوسۆزی ڕاستەقینەی خۆی بەیان کات و وەک ئەو بجوڵێتەوە.
ئەوەش وادەکات پیاوان نەتوانن، لەچوارچێوەی خێزان و پەیوەندی ژن و مێردایەتیدا، سێکسێکی (پڕاوپڕ) لەگەڵ هاوسەرەکانیاندا ئەنجام بدەن، بەبیانوی ئەوەی ئەوانە بەڕێز و خانەدانن و مادامەکی بەو شێوەیەشن، کابرا ئەو پەرۆشی و جۆش و خرۆشەی نابێت بۆ پەڕین.
وەلێ کاتێک ئامبازی لەشفرۆشێک دەبێت، جڵەو بۆ حەز و ئارەزووەکانی شل دەکات و پیاوەتی و نێرایەتی خۆی، تائەوپەڕی دەگەیەنێت. ئاخر ئەو لەگەڵ کەسێکی بێحورمەت و ڕەوشت نزمدا سێکس دەکات، ئیدی شەرم لەچی بکات و ترسی لەچی هەبێت؟
ئەو ڕێزو حورمەتەی پیاو لە لەشفرۆشانی دەسەنێتەوەو دەیکات بەبەری هاوسەرەکەیدا، ماڵوێرانیەکە هەم بۆ ژنە و هەم بۆ خۆشی، لەبەرئەوەی هیچیان لەڕووی سێکسیەوە تێرنابن و چێژ لەیەکتری نابینن.
پیاوی خۆرهەڵاتی بۆیە واڕەفتار دەکات، تاژنەکەی پاک و بێگەرد بێت و ژنەش بۆیە واخۆی نیشان دەدات، تاوەک فریشتە دەربکەوێت لەکاتێکدا ئەو مرۆڤەو فریشتە نییە.
دیاردەی لەشفرۆشی، شەڕێکی بێئامانی لەنێوان ژناندا دروستکردووە. سۆزانیەکان بەسوک سەیری ژنانی مێرددار دەکەن، چونکە ناتوانن وەک پێویست مێردەکانیان تێر بکەن و ئەو چێژەیان تەنها لای ئەوان دەسگیر دەبێت. ژنانی مێرداریش زۆر شەڕانگێزانە سەیری خانمانی لەشفرۆش دەکەن، چونکە پێیان وایە پیاو خۆرن و هەر بۆیان هەڵکەوێت مێردەکانیان لێدەفڕێنن. کچە ئۆغر و سەلارە شونەکردووەکانیش، داخ لەدڵن لەسۆزانیەکان و دەترسن، ئەو کوڕانە فریوبدەن کە ئەوان چاوەڕوانی ئەوەن، لەداهاتوودا مێردیان پێبکەن.
سەیر لەوەدایە سۆزانی کە بەپێوەدانگی کۆمەڵگە کارێکی بەدڕەوشت و قێزەون دەکات، پیاوانی بەشەرەف و بەویقار و خاوەن پلەوپایە، ئامادەن سەرجێگایان لەگەڵ بەشکەن و ڕایان موسن و لەگەڵیاندا بخەون.
کۆمەڵگە بەو ژنانە دەڵێت بێڕەوشت و بێئابڕو و قەحبە و سەڵیتە، بۆشی دەست بدات شاربەدەریان دەکات و سەریان دەتاشێت و بەویژدانێکی ئاسودەوە تیرۆریان دەکات. کەچی لەبەرامبەردا هیچ ناوێکی خراپ ناداتە پاڵ پیاوەکان (وەک بکەر و کارەکتەرێکی سەرەکی)، پرۆسەی بەدڕەوشتی سێکس فرۆشی و سێکس کڕین و وەک بەرزەکی بانان بۆی دەردەچن.
ئەم کتێبە زۆرێک لەو بڕگەو بابەتانەی تێدایە کە دنیای لەشفرۆشیمان بەبێ ڕوتوش نیشان دەدات، هەر لەمێژووی لەشفرۆشیەوە تا لەشفرۆش لەسەردەمی مۆدێرن و لەمێژوی ئایینە جیاجیاکان و ماڵ و شوێنی لەشفرۆشی و یاسا و سزاکانی، لەگەڵ دەردو نەخۆشی و چارەسەرکردنی. هەروەها بەسەرکردنەوەی لەشفرۆشی لەئەدەبیاتی جیهانی و بەناوبانگترین لەشفرۆشان لەمێژوداو دوجاریش داهاتووی پیشەی لەشفرۆشی لەسەر ئەم ئەستێرەیە.[1]