سەرکۆت و دو چەمکەی و چەپاو سەرکیەنیەل تەبیعی زاگروس و مەردمەل لور و بەختیاری ئێ لاین دەسڵاتدارەل مەرکەز ئێرانێرە، ئومرێ ڤە دریژای تاریخ بیە. هامسایەتی بەشێ ڤە زاگروس جور بەختیاری و لورستان و بویرئەمەد ک ئاوەل کیەنی بان کیەنیان زورم ئاوەل زاگروسە گەرد شهرەل فارس نشین هڵەت بێ ئاو، بیەسە گرفت گیرودەل ئێ بەش کوردستانێرە
سەرژە داین بان ئێ کیشاین ئاو زاگروسیرە ڤە هڵەت نام ڕاس ئێران، هەم خراویەل ئقتسادی دێرێ هەم زەوی و ئاو هەوامانە مەگۆرنێ، هەم بان فەرهەنگ مەردم ئەسەرە مەیلێ، حاکمیەت میتێ زور و هێز وژ بان مەناتق کوردی زال بەردەوام بمینێ، ڤە هەر یە بیەسە بایس یە ک ئێ هەمکە بێکاری و نەداری و گرفتەل تر جور سەر هەل گرتن و چینەری ئێ شهر وژت ئەڕا شهرەل تر وە منەی کار و ژیان بهتری بوو
دەسڵاتدارەل فارس ئێران، ڤە کیشان ئاو زاگروس ئەڕا هڵەت مەرکەزی ئێران، هانە دۆم یێرە ک جیاوازی بایژنە نام مەردم کوردێرە هەر ڤە ورمێ تا بەختیاری و شهرکرد، ک بتوینن، بەشێ ڤە شهرەل لورستان و بەختیاری بایژنە سەر ئسفهان ک بەشەل لور بان و هوار ئێ یەک جیا بکەن و سیاسەتەل وژان بێرنە نوا
هەڵە سیاسەتەل ئقتسادی دەسڵاتدارەل فارس وە سازین کارخانەل فولاد و ئاسن نام ڕاس هڵەت بێ ئاو ئسفهان ک ئێ کارخانەلە مەگستا ڤە لۊ ئاو زەریا بسازریا بیەسە ئافەت ئاوەل کوردستانێرە ک ئیسە هەر چێ ئاو ئێ مەناتقەسە مەکیشنە ورە ک ئێ دو کارخانە بمینێ، کارخانەی ک هیچ خێرێ بێجگە شەڕ ئەڕا لا ئیمە نیاشتیەسێ
کیشاین ئاو ڤە هڵەت مەرکەزی ئەڕا هواردن نیە و فرەتر هانە شوون بەردەوام بین سازەل کارخانە وژان و گرتن دەسڵات ئقتسادی ئێ مەناتقە، ک ئێ سیاسەتانە ئەڕا ئەوان بیەسە کیەنێ خێر وە ئەڕا مەردم زاگروس بیەسە گرفت سەرەکی و ئاخر سیە
کۆنگرە ملی کورد ڤە نوا ئێ سیاسەتەل دو چەمەکی حاکمیەت فارسە وژە مەسوولە مەزانێ ک خەلک زاگروس ئاگادار بکێ ڤە مەردم زاگروس کوو بکێ ک نوا ئێ خارەت بڕووئە بگرن
ئیسە ڤە سرەژە داین ڤە ئێ گەپەلمانە ک دا، کۆنگرە ملی کورد، گرەکەسێ گفت لفت حەق خوازی کوردەل ڤە نام قالب ناسین تاریخ و فەرهەنگ مەناتق هوار زاگروس جور بەختیاری و لورستان بایژیە رێ
تاریخ سابت کردیەسێ ک تەنیا ڕێ ئیمە، زانستن مەردم وژمان، ڤە نا ئداڵەتی و دو چەمەکی حکومەتەل فارس ڤە مڵ مەردم زاگروس بیە، ڤە بایستی ئاخر وژمان و یەکگرتن وژمان بیلیمە ڤەر چەم.
کونگرەی گەلی کوردستان
کومیسۆن ژینگە پاراستن