Hevalên hêja, Newroza we pîroz be!
Piraniya welatên cîhanê ji bo ku nifûsa bajar û bajarokên xwe, temen, nijad, ol, ziman û zaravayên xwe bizanin, ji bo ku îstatîstikên civaka xwe deynin û wan di pêvajoyên biryara xwe de bi kar bînin, her ji deh salan carekê, li gellek herêman, serjimêriya nifûsa xwe dikin.
Wekî ku hûn dizanin, serjimêriya îsal di çend hefteyên 21’ê Adarê (roja Newrozê) de li Ingilîstan û Gallerê tê kirin. Tê pêşbînîkirin ku formek di derbarê serjimêriyê de bi posteyê ji hemî mal, xanî û cihên rûniştinê yên wan her du perçeyên Brîtanya re were şandin. Di civakên azad û azadîxwaz ên Rojavayê de, beşdariya serjimêriyan û bersiva pirsan di teşeya rast de peywireke girîng a civakî û neteweyî ye ku divê her kes pêk bîne.
Ji ber vê yekê, em ji we hêvî dikin ku hûn pirsnameyan paşguh nekin û ji kerema xwe re wan dagirin.
Di serjimêriyên berê de, mixabin, hin endamên civata Kurd, bi xeletî beşên Etnîsîte û Ziman dagirtine. Wekî encamek, li Almanya, piraniya Kurdan wekî Tirk hatine tomarkirin, digel ku tê texmînkirin ku nêzî sê mîlyon mirovên ji Tirkiyê yên li vî welatî bi etnîkî kurd in jî! Bi heman rengî, li gorî lêkolînekê ku endamekî civaka kurd li dibistaneke Haringeyê li bakurê Londonê di salên 1990’î de kiriye, ji % 70’ê zarokên ku bi etnîkî weke tirk hatine qeydkirin, di rastiyê de kurd bûn!
Ev xemsarî bi qanûnî û civakî ve ne rast e. Ev yek, saziyên rêveberiyên neteweyî û herêmî dixe rewşên xeternak ên ku nizanin ka gelo nifûsa wan çawa ye û divê karûbarên xwe li gorî kê saz bikin. Ev yek jî ji bo çalakiyên çandî û civakî yên civaka kurdî a li Brîtanya û Ewropayê astengeke mezin derdixe holê, ji ber ku tomarên hikumetê civaka kurdî ji rastiyê kêmtir û piçûktir nîşan didin. Wekî encam, di nava civakên de ku em tê de dijîn, civaka me hêjayî naskirinê nayê dîtin.
Em bang li hemwelatiyên kurd ên li Brîtanyayê dikin ku, pêşiyê, di heman roja 21/03/2021’ê û piştî wê de formên serjimariyê dagirin, û bi dû re jî, di beşên li ser etnîsîte û zimanê axaftinê de, xwe weke “Kurd” û “axêverên zimanê kurdî” qeyd bikin, ji ber ku ji xwe rastî jî ev e û guman tê de nîne. Wê hingê, Kurdên ji Tirkiye, Iran, Iraq û Sûriyê dê bi xeletî wekî Tirk, Faris û Ereb neyên tomarkirin. Ev yek dê rêyê li ber veke ku saziyên hikumetê rastiyan bibînin û rewşê rast fam bikin.
Digel vê girîngiya siyasî û sembolîk a vê çalakiyê, yek ji encamên nasandina etnîsîte û zimanê xwe ew e ku afirandina bêtir derfetên kar ji bo civakê were bicîhkirin, weke mînak zencîreyên mezin ên supermarketan, wekî Tesco û Sainsbury, dibe ku dest bi stokkirina wan alav û tiştan bikin ku ji hêla civaka kurd ve têne hilbijartin û her weha karkerên kurdîaxêv bixin karî da ku bêtir bala kirîdar û muşteriyên kurd bikişînin. Wekî din, saziyên rêveberiyên herêmî dê pêwîst bibînin ku daxuyanî û agahdariyên xwe li zimanê kurdî wergerînin. Ya herî girîng, gava ku hejmara rastîn a civaka kurdî diyar bibe, partiyên rayedar ên Brîtanî, di lêgerîna rayên Kurdan de, dê polîtîkayên xwe yên li hember Kurdistanê ji nû ve binirxînin, û dibe ku li deverên ku nifûsa Kurdan lê pir e namzetên kurd rakin û bi rêya wan ve bi dengdêran re bikevin peywendiyê.
Ji ber ku tê pêşbînîkirin ku welatên din ên Ewropayê jî serjimêriyên xwe pêk bînin, an di heman rojê de di 21’ê Adarê de an jî demeke kurt bi şûn de, ji bo hemû Kurdên ku li welatên ewropî dimînin guncan e ku li ciddiya mijarên li jorê bifikirin.
Koma Dilxwazên Kurd ji bo Kampanyaya ji bo serjimêriya 2021’ê li Keyaniya Yekbûyî,
London
5’ê Adarê, 2021