ناو: خدر
ناوی باوک: حەمەد خدر
نازناو: خدر خۆشناو
خدر خۆشناو-گۆرانیبێژ
نووسینی: خالید عومەر عوسمان
ناوی تەواوی (خدر حەمەد خدر) ە، ساڵی 1961 لە گەڕەکی خانەقای شاری #هەولێر# لەدایک بووە، تا پۆلی پێنجی سەرەتایی خوێندووە لە قوتابخانەی سۆران لە هەولێر، لە قوتابخانە ڕۆژانی پێنجشەممە بۆ بەرز کردنەوەی ئاڵا سروود و گۆرانی گوتووە بە هاوکاری مامۆستا ی هونەرمەند چەتۆ حەسەن ئەو کات لە گۆڕەپانی قوتابخانە ئۆکۆردیۆنی بۆ دەژەنی، پاشان لە ساڵی 1973 لەگەڵ ماڵی خوشکی دەچێتە #حاجی ئۆمەران# لەوێ دەخوێنێ پاشان لەگەڵ نسکۆی شۆڕشی ئەیلول ئاوارەی ئێران دەبێت و لە ئۆردوگای زێوە ژیانی ئاوارەیی بەسەر دەبەن و پۆلی 6ی سەرەتایی تەواو دەکات، پاشان لە ساڵی 1976 دەگەڕێتەوە ئێراق، ئەو کات ڕژێمی بەعس ئەوەی لە ئێران بگەڕابوایەوە ساڵێکی خوێندنیان بۆ هەژمار نەدەکردن و پۆلێکیان کەم دەکردنەوە، خدر خۆشناو لەو کاتەوە واز لەخوێدندن دەهێنێت و دەست دەکات بە کارکردن و خەریکی پیشەی ئاسنگەری دەبێت، ساڵی 1978 خولیای هونەر و گۆرانی وتن دەبێت، ساڵی1980 دەچێتە ڕیزی سەربازی، ساڵی 1982 ژیانی هاوسەرگیری پێکدەهێنێت و 3 کوڕ و 5 کچی هەیە، ساڵی 1984 لەگەڵ کۆمەڵەی هونەر و وێژەی کوردی/ هەولێر گۆرانی (ئەی دڵ یار ڕۆیی) بۆ تەلەڤزیۆنی #کەرکووک# تۆمار دەکات، لەگەڵ کۆمەڵەی هونەر و وێژەی کوردی لە ساڵانی هەشتاکان و لەگەڵ هونەرمەندان (کەریم بایز و پەروین شازادە) هەفتانە لە بەغدا ئاهەنگیان گێڕاوە، پاشان بەردەوام دەبێت و زیاتر لە هونەری میللی ئەسپی خۆی بەشێوەیەکی زۆرچاک تاودەدات، پاش ڕاپەڕینیش دەورێکی گرنگی هەبوو لە هونەری شۆڕشگێری بە تۆمارکردنی چەندین سروود و گۆرانی، هونەرمەند هەر لە منداڵییەوە خولیای بەخێو کردنی باڵندەو پەلەور بووە و گرنگی تەواوی پێداوە، هونەرمەند (خدر خۆشناو) ئەندامی تیپی هونەری میللی هەولێر بووە، ئەندامی دەستەی کارگێڕی کۆمەڵ و هونەر و وێژەی کوردی مەڵبەندی گشتی هەولێر بووە، بەداخەوە لە #27-08-2020# بەهۆی نەخۆشی کۆرۆنا لە نەخۆشخانەی فریاکەوتنی ڕۆژاوای هەولێر گیانی پاکی سپارد و ماڵ ئاوایی لە خزم و دۆستان کرد و لە گۆڕستانی شێخ ئەحمەد لە هەولێر بەخاک سپێردرا.
ئەم ژیاننامەم لە (ئازاد) ی برای وەرگرتووە لە 2021/7/23[1]
خدر خۆشناو لە ساڵی 1961 لە شاری #هەولێر# لە دایکبووە. لە ساڵی 1978 دەستی بە گۆرانیوتن کردووە. ئەندامی تیپی هونەرە میللییەکانی هەولێر بوو. خدر خۆشناو خێزاندار بوو، باوکی پێنج کچ و سێ کوڕ بوو.
ڕۆژی #27-08-2020# بەهۆی کۆڕۆناوە کۆچی دوایی کرد.