هاوڵاتیانی خۆشەویست...
بە بۆنەی هاتنەوەی جەژنی رەمەزان، لە دڵەوە پیرۆزبایی گەرم لە هەموولایەک دەکەم، دەخوازم ئەم بۆنەیە ببێتە هەوێنی ئاشتەوایی و یەکڕیزی لە کوردستان تاکو پێکەوە رووبەڕووی تەنگەژەکانی بەردەممان ببینەوە.
لەسەرەتای ئەمساڵەوە کۆرۆنا و دابەزینی نرخی نەوت، کاریگەریی خراپیان لەسەر بەرنامەکانی حکومەت بۆ چاکسازی و بنیاتنانەوە و رەخساندنی هەلی کار دانا، گرنگیدانی ئێمەشی گۆڕی بۆ پاراستنی تەندروستی و دابینکردنی موچە.
بە هەوڵ و ماندووبوونی تەندروستکاران و هێزە ئەمنییەکان و پابەندیی هاوڵاتیان، رێگری کرا لە تەشەنەکردنی پەتای کۆرۆنا، بەڵام هێشتا مەترسی بڵاوبوونەوەی نەخۆشییەکە بەردەوامە، ئەمەش دەمانخاتە بەردەم بەرپرسیارێتی بەردەوامیی پابەندبوون بە رێنماییە تەندروستییەکان.
حکومەتی هەرێم، بەخودی سەرۆکی حکومەت و بەندە و وەزیرە بەڕێزەکانەوە، بە هەموو توانامانەوە لە هەوڵدا دەبین بۆ دابینکردنی مووچە و چارەسەرکردنی ڕیشەیی ئەم کێشەیە، لەم پێناوەشدا کاری پێویستمان کردوە بۆ رێککەوتنی گشتگیر و دادپەروەرانە لەگەڵ حکومەتی ناوەند. دانوستانەکانمان لەگەڵ بەغدا چڕتر کردووەتەوە و ئێستا لێکتێگەیشتن لەهەمووکات زیاترە و گەشبینین بە گەیشتن بە رێککەوتن لەگەڵ کابینەکەی بەڕێز مستەفا کازمی بۆ چارەسەرکردنی بەشی زۆری کێشە هەڵپەسێردراوەکان.
لەدوای 2014 وە گیرۆدەی جۆرەها قەیران بووین، بەڵام هیچ کات بێخەم نەبووین و هەموو دەرفەتەکانمان قۆستۆتەوە بۆ چاکسازی و خاوکردنەوەی گرژییە سیاسییەکان و لەڕێی یەکگرتوویی کابینەی پێشووی حکومەتی هەرێمی کوردستان، توانیمان قەوارەی هەرێمەکەمان بپارێزین و لەکێشەی ناوخۆیی بەدووری خەین. جگە لەمەش، تۆماری بایۆمەتری و بە ئەلەکترۆنیکردنی هەندێ لەکارەکانی حکومەت، پڕۆژەی خزمەت و وردبینیکردنی داهاتی نەوت و یاسای چاکسازی بەشێک لەو هەوڵانە بوون کە خەریکە وردە وردە کاریگەرییەکانیان بۆ هەموو لا ئاشکرا دەبێت. لە کابینەی نۆیەمی حکومەتیشدا، توانرا یاسای چاکسازی بەکردەیی پەسەند بکرێت.
لەئێستاشدا وێڕای خەمی دابینکردنی مووچە، ئەرک و خەمی حکومەت بونیادنانی ژێرخانی ئابوری و دابینکردنی خزمەتگوزاری شایستە و چاکسازی و نەهێشتنی گەندەڵییە، ئەم هەنگاوانەش بەبێ دروستکردنی متمانە سەرناگرێت، نابێت دەرفەتەکان بە هۆی ململانێی ناتەندروست و بارگرژی سیاسییەوە لەکیس بدەین، پێویستمان بە دروستکردنەوەی تەباییە لەنێوان لایەنەکانی پێکهێنەری حکومەت، لەنێوان حکومەت و هاوڵاتیان، لەنێوان حکومەت و کەرتی تایبەت و دواجاریش لەنێوان هەرێم و بەغدا.
لە کۆتاییدا خوازیارم جەژن ببێتە بۆنەیەک بۆ ئاشتەوایی سەرانسەری، بۆ پتەوکردنی تەبایی نێوانمان. جارێکیتر جەژنی هەموو لایەک پیرۆز بێت بەتایبەت خانەوادەی شەهیدە سەربەرزەکان و پەرستشی رۆژووەوانانیش قبوڵ بێت و هەمووان پارێزراو و تەندروست بن.
قوباد تاڵەبانیقوباد تاڵەبانی
23-05-202023-05-2020

#قوباد تاڵەبانی | #23-05-2020 |