بەهاتنی نەورۆزی 2720، نەورۆزی ئازادی و پێکەوە ژیانی گەلان، لە هەموو ئازادیخوازان بە تایبەت ڕێبەر ئاپۆ، بنەماڵەی شەهیدانی سەربەرز، گیراوانی سیاسی و گەلەکەمان لە ڕۆژهەڵاتی کوردستان و ئێران پیرۆز دەکەین.
نەورۆز بۆ گەلی کورد هێمای ژیانەوە، سەرهەڵدان و تێکۆشانی ئازادیخوازانەیە، لە بەرامبەر داگیرکاری و چەوساندنەوە، وەبیر هێنانەوەی کاوەی ئاسنگەرە کە لە ناخی کۆمەڵگاوە سەرهەڵدەدات و قەڵای دەسەڵاتداران هەڵدەوەشێنێت، هاوکات هەڵکردن و گەشانەوەی ئاگری ئازادییە لە لووتکەی چیا سەرکەشەکانی نیشتمانەوە.
نەورۆزی گەلی کورد لەسەردەمی کۆن و نوێدا، هەڵگری پەیامێکی کۆمەڵایەتی بووه لە بەرامبەر زهنیەتی دەسەڵاتداران، بەهاتنی وەرزی بەهار و گەرم بوونەوەی زەوی، دەسەڵاتی سەرما و سۆڵە کۆتایی پێدێت و سرووشت جارێکی دیکە دەبووژێتەوە، بە هەمان شێوە نەورۆز بووژانەو و سەرهەڵدانی گەلانە لە پێناو دەسپێکردنەوەی وەرزێکی نوێ لە ژیانی ئازاد و دیمۆکراتیکدا.
مێژووی بەرخۆدانی هاوچەرخی کورد بە پێشەنگایەتی ڕێبەر ئاپۆ، نەورۆزی کردە هێمای سەرهەڵدانەوەیەکی نوێ لەکوردستان، چەندەش داگیرکەرانی کوردستان هەوڵیاندابێ ئازادی سنووردار و کەلەبچە بکەن، بەڵام گەلی کورد بێ پسانەوەو تاگەیشتن بە ئارمانجەکانی ئازادی و دێمۆکراسی، دوا بە دوای هەر تێکشکان و کۆمەڵکوژییەک، بە ڕەمزی نەورۆز، کاوە ئاسا شەستە بەند و زنجیری داگیرکەرانی تێکشکاندوەو و بە گەرمایی و ڕۆشنایی خۆری ئازادی سەرلەنوێ ژیاوەتەوە.
بە پێشەنگایەتی کاوەکانی سەردەم شەهیدان (مەزڵووم دۆغان و زەکیە ئالکان) ئەمڕۆ نەورۆز لە هەرکاتێکی دیکە زۆرتر پەیوەست بە خواستی بەشە چەوساوەکانی کۆمەڵگا بووە، ئەگەر بۆ گەلانی ناوچەکە نەورۆز تەنیا هێمایەک بێت، بۆ گۆڕانکاری وەرز و نوێبوونەوەی ساڵێک، نەورۆز بۆ گەلی کورد هێمای چڕکردنەوەی تێکۆشان لە پێناو ئازادییە، نەورۆز هەڵوێستی کۆمەڵگایەکە کە لەبەرامبەر داگیرکەریدا سەرهەڵدانی کردووە و هیچکات ملکەچی یاسای داگیرکاری نەبووە، نەورۆز چالاکیەکی کۆمەڵایەتیە بۆ بەرەنگار بوونەوەی دەسەڵاتداران، بە گیانی نەورۆزەوە ئەمڕۆ گەلی کورد بە پێشەنگایەتی و بەرخۆدانی ڕێبەر ئاپۆ، گەریلا و #شەڕڤان#ەوە، بووەتە هیوای ڕزگاری گەلان و بە هەڵکردنی ئاگری ئازادی لە لووتکەی چیاکانی زاگرۆس تیشکی ڕووناکی دەخاتە سەر جیهانی دەوروبەر و ڕۆژ لەدوای ڕۆژ، تەنگ بە تاریک پەرەستان هەڵدەچنێ و چیای دەسەڵاتی سەهۆڵبەستراوەکان بە ئاگری تێکۆشانی دەتوێنێتەوە، نەورۆزی #ئامەد# و #قەندیل# لەسەر زهنیەتی نەتەوەی دیموکراتیک لەمێژووی هاوچەرخی گەلەکەمان بووە کۆنگرەیەک بۆ ئەو گەلانەی کە تامەزرۆی ئازادیین، ئەو مەشخەڵەی کە لەوێ داگیرسا، دەست بە دەست گەڕا و ئەمڕۆ، نەورۆزی ئازادی لە سەرجەم شار و گوندەکانی وڵات بە خرۆشەوە هەڵدەکرێت.
بە تێکۆشان و بەرخۆدانی بێ وێنەی گەلی کورد لەساڵی 2719ی کوردی، ساڵێکی تری پڕاوپڕ لەشکۆی سەرکەوتن بۆ گەلی کورد و گەلانی ئێران تۆمار کرا، لەساڵێک کە تێپەڕ دەبێت گەلانی ئازادیخوازی ئێران و ڕۆژهەڵاتی کوردستان بە تێکۆشانی نەبەزانەیان کۆشکی دەسەڵاتدارانیان هەژاند، ڕاپەڕینەکانی مانگی خەزەڵوەر، بەردەوامی ڕق و کینەی چەندین ساڵەی گەل بوو لە بەرامبەر دەسەڵاتی ڕژێمی سێدارە، هەروەها لاوازکردنی پێگە ئایدیۆلۆژیەکەی بوو کە ساڵانێکە لە هەموو دامودەزگاکانی خۆیدا دەیاندا بەگوێ خەڵکدا، هەر لێرەوە لە یەکەم نەورۆزی شەهیدانی مانگی خەزەڵوەرەوە، هەموو شەهیدانی ڕێگای ئازادی وەبیر دێنینەوە و بەڵێنی بەردەوام کردنی ڕێگایان تا گەیشتن بە ئارمانجەکانیان دووپات دەکەینەوە، گەلانی ئێران بەرپەرچی داگیرکەریەکانی ڕژێمیان بە بایکۆت کردنی هەڵبژاردنە نمایشیەکەی ڕژێم گەیاندە لووتکە، دەسەڵاتی ڕژێمی داگیرکەری ئێران ئەمڕۆ نەتەنیا لە بواری ئایدیۆلۆژیدا تووشی هەڵوەشانەوە و داڕمان بووە و ڕەوایی خۆی لەدەست داوە، لە هەمان کاتدا لە بواری لەشکەری و ڕێوەبەریشدا تووشی داڕمان بووە. خستنە خوارەوەی فڕۆکە ئۆک#ڕانیە#کە بە دەستی پەدافەندی هەوایی سوپا لە بەر چاوە. هەر وەها لەسەروبەندی هاتنی نەورۆزی ئەمساڵدا، بێ بەرپرسیارانە و ناکارامەیی کاربەدەستانی ڕژێم لە نەگەرتنەبەری ڕێوشوێنی پێویست بۆ پێشگرتن لە تەشەنەسەندن و کۆنتڕۆڵ کردنی وایرۆسی کۆرۆنا (کوڤید-19) کە سەرەتا ویستی بۆ پەردەپۆش کردنی ئەنجامی هەڵبژاردنەکان هەروەها قەیڕانی ئابووری بەکاری دەهێنێ، ڕۆژ لەدوای ڕۆژ وڵاتی تووشی قەیرانی مەزنتر کردووە.
لە کاتێکدا بەرەو پیری نەورۆز دەڕۆین کە جیهان و ئێران بە گشتی لە ژێر مەترسی نەخۆشی کۆرۆنادایە، بە هۆی ئەم نەخۆشیەوە ئەمساڵ دەرفەتی بەرێوەبردنی جەماوەریانەی نەورۆزنییە، پێویستە گەلەکەمان بێ چاوەڕوانی لە دەسەڵات خۆی لەو نەخۆشیە بپارێزێ، دەبێ ئەمساڵ بە درووشمی (نەورۆز سەرهەڵدانی گەلانە) هەموو شوێنێک بە ڕۆحیەی نەورۆز بڕازێننەوە و هەر کەس، شوێنی مانەوەی بکاتە قەڵای تێکۆشان و کاوەئاسا بە هەڵکردنی ئاگری نەورۆز لە لووتکەی چیاکان، کۆلان و گەڕەکەکان، پەیامی ئازادی گەشاوە بکەن و پەیامی نەسرەوتن تا سەرکەوتن بەرز بکەنەوە و زامنی سەرکەوتنی سەرهەڵدانی گەلان ببن، گەلی کورد پێویستە لەساڵی نوێ بە ڕۆحی نەورۆزەوە دەستپێشخەری سەقامگیری ئاشتی و ئارامی لەناوچە بکات و بە هەموو هێزەوە بۆ تێکشکاندنی گۆشەگیری لەسەر ڕێبەر ئاپۆ و ئازادکردنی پەرە بە تێکۆشان بدەن.
لەو بڕوایەداین کە گەلەکەمان لەرۆژهەڵاتی کوردستان و ئێران بۆ تێکشکاندنی زهنیەتی فاشیست و داگیرکەری بە جۆش و خرۆشی نەورۆزەوە لەساڵی 2720ی کوردی، یەکێتی و یەکڕیزی نێوانیان پتەو و بەهێزتر دەکەن و بەوەش شکۆی ڕژێمی چەوسێنەر و داپڵۆسێنەری گەلان زەمین کێش دەکەن.
هاوکات ڕۆحیە و بەرپرسیاری نەورۆزی 2720ی کوردی، ئەوە بە سەر هەموو هێز و لایەنە سیاسی، ڕێکخراوە مەدنیەکان، مافناسان، ڕۆشنبیران، سیاسەتمەداران، ژنان و گەنجان فەرز دەکات کە بۆ دەستەبەر کردنی ئازادی و چارەسەری کێشەی گەلی کورد و گەلانی ئێران، بە ڕێگای ئاشتیانە هەنگاو بۆ یەکێتی و یەکڕیزی گەلی کورد و گەلانی ئێران و بونیادنانی نەتەوەی دیموکراتیک هەڵبگرن.
وەک #پژاک# لەساڵی نوێ دا لەپێناو یەکڕیزی و یەکێتی نێو ماڵی کوردی و یەکێتی گەلانی ئێران بە هەموو هێزمانەوە درێژە بە تێکۆشانمان دەدەین و داوا لەهەر کەس و لایەنێک دەکەین کە بەرپرسیارانە و بە ڕۆحی شۆڕشگێڕانە بە ئەرکی سەرشانیان ڕاپەڕن.
لەکوتاییدا لە نەورۆزی ئەمساڵدا یادی هەموو گیانبەخت کردوانی ڕێگای ئازادی بەرز ڕادەگرین و بە هەڵکردنی ئاگری ئازادی ڕێگایان بەردەوام دەکەین.
نەورۆز، سەرهەڵدانی گەلانە
نەورۆزتان پیرۆز
مەجلیسی پارتی ژیانی ئازادی کوردستان – پژاک
#20-03-2020#