بەعس دڕندەترین دوژمنی ئێمەبوو، کاتێ مفاوەزات و ڕێکەوتنێکمان لەگەڵ ئەکرد، خەڵکی ئێمە حەوت شەوو حەوت ڕۆژ هەڵئەپەڕین!
نەورۆزی ئەو ساڵەی #ئامەد#، سێ ملیۆن کەس بەشداری تیاکردو قەرەباڵغترین نەورۆزبوو لە مێژوودا، چونکە نەورۆزی ئاشتیبوو!
ئەمەوێ بڵێم، هاوڵاتی بە تەبیعەت ئەیەوێ بژی و مەیلی ئاشتی کۆمەڵایەتی و ئیستقراری سیاسی هەیە.. تەنانەت لەگەڵ بەدترین دوژمنیشدا حاڵەتە ئاساییەکە ئەوەیە کە (ڕێکەوتن وەکو مەبدەء پەسەندە) بەڵام ئەشێ لەسەر تەفاسیلەکەی قسە هەبێت.
(لای ئێمە شتەکە عەکسبۆتەوە، ئێستا ئێمە کێشەمان لەگەڵ خودی ڕێککەوتن هەیەو هەر لەڕێوە ڕەتمانکردۆتەوە، بەبێ ئەوەی تەفاسیلەکەیمان بۆ گرنگ بێت!)
دنیاکە خراپتر ئەبێ یان باشتر، ئەسڵەن ئەوەمان بۆ مەوزوع نیە، گرنگ ئەوەیە ڕێکنەکەوین!
فەوزایەک ڕێکنەکەوتن بیهێنێ، زۆرمان لا باشترە لە ئارامییەک کە ڕێکەوتن بیهێنێ! بەجۆرێک کە ئەو ساڵە، جوملەی (چوارساڵ ئارامیی) بووبە عەیبە بۆ هێزێکی سیاسی، وەک ئەوەی ئیشی هێزی سیاسی دروستکردنی نائارامیی بێت!!
جا ئەم حاڵەتە زۆر نائاسایی و ترسناکەش، ئەشهەدو بەرهەمی پۆپۆلزمی سیاسی و موعارەزەی هاشوهوش بوو. ئاخر پارتی و یەکێتی شەیتاندنیان تا ئاستی شەڕ برد، بەڵام تاکی ئێمە، هێشتا نەگەیشتە ئەوەی کە کێشەی لەگەڵ خودی ڕێکەوتن هەبێ و لای نائاسایی و خراپ بێت. وەلێ موعارەزەیەک هات، باڵانسی شەیتاندنی بەجۆرێک بەرزکردەوە، کە ئیتر لای ئێمە، ڕێکنەکەوتن بووە حاڵەتە ئاساییەکەیەو ڕێکەوتن بووە شتێکی قبوڵ نەکراو!
بە منبێ هەڵەی گۆڕان ئەمەی ئێستای نیە، نەفەسی ڕاماڵین و شەیتاندنەکەی پێشترە. باجێکیش کە ئێستا ئەیدا، هی ئەو هەڵە کۆنەیە، نەک ئەوەی ئێستای کە ئەسڵەن جاری دیارنیە ڕاستە یان هەڵە. یەعنی بە تەعبیرە شەعبییەکە، گۆڕان قاچی لە گووی خۆیایەتی.
جا کێشەی من ئەوەنیە، کێ ڕێکئەکەوێ و کێ ڕێکناکەوێ، کێشەی من لەگەڵ عەقڵیەتێکە کە ڕێکەوتنی دوو هێزی سیاسی بە #کفری# سیاسیی ئەزانێ، لەکاتێکا ئەوە حاڵەتە ئاساییەکەیەو لە فرەیی سیاسیدا حیزبی سیاسی کاریان هەر ئەوەیە کە کۆببنەوەو ڕێکبکەون. یان ئەگەر ڕێشنەکەون، لانیکەم یەکتری بەشەیتان و دنیا ڕەشوسپی نەکەن، بۆئەوەی سڕینەوەی سیاسی نەیەتە گۆڕێ، چونکە سڕینەوە شتەکان عەکس ئەکاتەوە.
لە سڕینەوەدا ئیتر پەرتبوون و یەکبوون شوێنەکانیان ئەگۆڕنەوەو پەرتبوون ئەبێتە حاڵتە ئاساییەکە، چونکە لەگەڵ شەیتاندا هەرچۆنێ یەکبیت، خۆشت ئەبیتە شەیتان! لە دنیای ڕەشوسپیدا ئیتر قەت ناگەینەوە یەک، چونکە بگەینەوە یەک، سپییەکە ڕەش ئەبێت!
کیشەکە ئەوەیە، ئێمە هەموومان سەربە سەقافەتی منین، سەقافەتی منیش ئەوانیتر ئەسڕێتەوەو قبوڵیان ناکات.
ئێستا گرنگ نیە کێ ئەچێتە حکومەت و کێ ناچێ، گرنگ ئەوەیە چۆن لە منی سیاسییەوە، بپەڕینەوە بۆ ئێمەی سیاسیی!
ئاخر هەموومان لەو منەدا تەقلیدین، هێزی ناتەقلیدی ئەوەیە کە ئەخلاقی ئێمەی سیاسی دائەهێنێت، نەک ئەوەی کە بە دەنگێکی بەرزتر بڵێ من.
سیاسەت لە مانا نوێکەیدا یەعنی ئێمە، سیاسەت تەنیا لە فاشیزمدا یەعنی من، ئێمەش تەنیا فاشیزمی هێزە گەورەکانمان نیە، تەنیا پارتی و یەکێتی یەکترو ئەوانیتر ڕەتناکەنەوە، بەڵکو ئەوانیتریش پارتی و یەکێتی و یەکتر ڕەتئەکەنەوە.
ئێمە نائومێدین، لەبەرئەوەی خۆمان لە خۆمان نائومێدکرد. گۆڕان هات نائومێدمانکا لە پارتی و یەکێتی، نەوەی نوێ هات نائومێدمانکا لە گۆڕان، هێزێکی تریش دێت نائومێدمانکا لە نەوەی نوێ.. ئیتر هێزی ئێمە بۆ ئەوە نایەت ئومێدێکی تازەمان لادروستبکات، بۆئەوە دێ ئومێدێکی کۆنمان بکوژێ.
کە ئەڵێم ئێمەی سیاسی بێگومان بە پارتی و یەکێتیشەوە!
ئاخر ڕاستە سەتا هەشتای نائومێدیمان لە پارتی و یەکێتی، پەیوەندی بە کارە گڵاوەکانی خۆیانەوە هەیەو ئەوان خۆیان نائومێدیان کردین لە خۆیان. بەڵام موعارەزەیەکیش هات موباڵەغەی لەم ڕێژەیەدا کردو هەشتاکەی بەرزکردەوە بۆ لەسەتا سەت، کە ئەمە وانییە!
وانیە چونکە دەسەڵاتی خراپی ڕەها بوونی نیە، خراپترین دەسەڵات لە شوێنێکیدا هەر باشە یان ئەکرێ باشبێت، ئەمەش لەبەر چاوی کاڵی شەعب نا، لەبەر مانەوەی دەسەڵاتەکە خۆی.
جا لەگەڵ پارتی و یەکێتی، کاری گەورە ناکرێ، چونکە ئەوان ماڵی خۆیان وا بیناکردوە، بە چاکسازیی ڕیشەیی ئەڕوخێ بەسەریاندا.
بەڵام لەگەڵ پارتی و یەکێتی کاری بچوک و مامناوەند ئەکرێ لەقازانجی گشتی، کاری هێزەکانی تریش چ لە حکومەتبن یان لە موعارەزە، هەر ئەوەیە کە پارتی و یەکێتی و یەکتری بەو ئاقارەدا بەرن، نەک ئەوەی هێزەکان کورتان بە یەکتر فڕێدەن و جووتە وەشێنراوەکانیش بەر خەڵک بکەوێ.
ئێمە چیتر پێویستمان بە بڕێک عەقڵانیەتە، نەک بەو بێتامییەی کە پێ ی ئەوترێ بوێریی.
ئێمە ئەو بوێرییەمان تاقیکردەوە کە زەڕب لە یەکتربدەین، ئێستا کاتی ئەو بوێرییەیە کە گەورەو بچوک و دەسەڵات و معارەزە.. یەکتر بخوێنینەوە[1].