حەیدەریینامەی نووسەر و ڕۆژنامەنووس #مومتاز حەیدەری#
ئەمڕۆ 13/1/2019 هەر چوار بەرگی [حەیدەریینامە]ی نووسەر و ڕۆژنامەنووس مامۆستا مومتاز حەیدەریم بەدەست گەیشت.دەمێکە لە #هەولێر# دەرچووە و بڵاوکراوەتەوە. کاتێک زانیم دایکی کاروان نەخۆشە و لە هەواڵی تەندروستیم پرسی کاک مومتاز گووتی ئەو دیاریەم بۆ داناوی ئەگەر یەکێک یان خوشکان بۆت ڕەوانە بکەن و کێشەکەی هەشت کیلۆ و هەندێکە. هەر لە خەمی گەیشتنی ئەو دیاری یە گەوهەرە بووم بەڵام کەسم بۆ ئەو کارە بە باش نەزانی ئەرکەکەی بخەمە سەر. برادەرێک گووتی پۆستە لە هەولێرەوە دێتە ستۆکهوڵم ئەوەش ژمارەی تلفونەکەیە، یەکسەرە تلفونم بۆیان کرد گووتیان دەبێت لە هەولێر بچنە ئوفیسەکەمان [مکتەبی هەولێر] و لەوێش زانیاری وەردەگرن.
خزمی خۆشەویستم کاکە [ عامر قادر ]م ئاگادارکردەوە بۆ ئەوەی پرسیاری پۆستم بۆ بکات پاش ماوەیەک گووتی بەڵێ هەیە و دە دۆلاریش هەر کیلۆی وەردەگرن. گووتم داوایەک هەیە بۆم جێبەجێ بکە و پارەش ئامادەیە بەڵکو بچیە لای کاک مومتاز حەیدەری و چواربەرگی کتێبەکەی بۆم داناوە و بۆم وەربگری و ڕەوانە بکەی دەکرێت یان بەلاتەوە گرانە. بەبێ دوو دڵی گوتی تەلیفونی بۆ بکە دەچمە خزمەتی. یەکسەرە تلفونم بۆکاک مومتاز کرد و خەبەری کردمەوە با ناسیاوەکەت بێتە لام و بۆت دانراوە. کاکە عامر چووە ماڵی مامۆستا مومتاز و گەلێک وێنەی جوانیشی بۆ گرتم و کتێبەکانی بردە ئوفیسی ڕەوانەکردن و گواستنەوەی کەلوپەل.
رۆژی 18/11/2018 وێنەی کارتونی گرت و حەیدەریینامەی دا بەو کەسانەی کەلوپەل بۆ دەرەوەی هەولێر ڕەوانە دەکەن. لێرەوە سوپاس بۆ کاکە عامر و دڵنیام کردەوە پۆستەکە گەیشت و هیچی تر خەم نەخوات. سوپاسی مامۆستا مومتاز حەیدەری م کرد و وێنەی کتابەکانیشم بۆ ڕەوانەکرد. داوای کرد بە تێروتەسەلی نووسینەکی دەربارەی بنووسم و بۆی ڕەوانە بکەم.یەکە یەکە بەرگی کتێبەکەم هەڵدایە و سەیرم کرد چ کارەکی پیرۆزە کاک مومتاز لە ئاهەنگی هەشتاساڵەی لەدایک بوونی پێشکەشی کتێبخانە و فەرهەنگ و ئەدەبیاتی کوردی کردووە.
لە کاتژمێر دەونیوی بەیانی هەتا شەش و نیوی ئێوارە خەریکی دەورکردنەوەی ئەو بەرهەمە پیرۆزە بووم. مەلەوان لە دەریا ماندوو نابێت بۆیە خۆشەویستی منیش بۆ کتیب و هوردکردنەوە ماندوو بوونم پێ نابەخشێت و چێژ و خۆشیم پێشکەش دەکات.
ئەو هەموو ناوانەی کە کەس بە بیری نایەتەوە و یان لەبیرکراوە چۆن هاتۆتە ناو ئەو گەنجینە و چاوی خوێندەواری کوردی پێ ڕووناکدەبیتەوە. ئەو وەسیەت نامەی لەدواوەی کتابەکەی چاپی کردووە چۆن خوێنی خستە چاوانم کە بەداخەوە کوردە فەقیر چەند مردوو پەرستە و لەکاتی ژیاندا ڕیز لە بەهرەدار و هونەرمەند و نووسەر و تێکۆشەر ناگیرێت کەچی لە مردن و لە چلەی ڕۆڕۆی بۆ دەکرێت و شان و باڵی بەرینتردەکرێت. وای چ کولتورەکی سەقەت و بێ مانامان دروستکردووە کە لەهی هیچ میللەتێک ناچێت. ئەو چواربەرگە حەیدەریینامە یە بەرگێکی جوان و کاغەزی جوان و ڕەنگی جوان و چاپی جوان.
پڕۆژەیەکی یەکەمینی سەردەمی تازەی تەکنەلۆژیا و ئینتەرنێت هیوادارم ئەو کارەش تەواو بکات و بە ئەرکی نەزانێت بیخاتە ناو جیهانی ئینترنێت بۆ ئەوانەی لە دەروەی کوردستان دەژین وێنە و ناو و ژیانی لەدایک بوون و زانیاری دەربارەی کەسایەتی و بڵاوکراوەکان بە ئاسانی بەدەستیان بگات و سوودی لێوەربگرن، کە دەزانم بۆ زۆر کەس سەختە هەشت کیلۆ و نیو کتاب لەگەڵ خۆی بهێنیتە دەرەوە یان ڕەنگە گران بکەوێت بۆ خوێندکاری هەژار بۆ ئەو قوتابیانەی باری دارایی یان کەمە و لە ناوچەی جیاجیا دەژین ڕەنگە نەتوانن بەدەستیان بگات بەڵام بە دابەزاندنی لە ئینترنیدا بە ئاسانی دەبینرێت و دەخوێندرێتەوە. تەمەنت درێژبیت و دوو هەشتا ساڵی تریش بۆمان بژیت هەتا بەرهەمی زیاترمان پێشکەش بکەیت. ئەوەی بۆمن دەمینێتەوە بڵێم کە دەستت خۆش و لە کتێبخانەکەم وەکو چرا دامناوە و ڕووناکی دەبەخشێتەوە. مامۆستا مومتاز خەرمانت بەرەکەت و هەر تەندروست بیت.
#فەهد گردەوانی# 13/1/2019 ستۆکهۆڵم