ئامادەکردنی: #زریان سەرچناری#
سلێمانی 2018
سەید محەمەد تاهیر هاشمی
ئەسیری دامی عیشقم خەستەیی دەردی دڵم چ بکەم
لە تۆ دایم پڕە قەلبم لە خۆم گەر غافڵم چ بکەم
نە شێخ و زاهد و سۆفیم، نە قازی و واعیز و موفتیم
نە دێوانەم، نە فەرزانەم، نە زانا و عاقڵم چ بکەم
لە دەرکی پێچ و ئەشکەنجەی سەری زوڵفت پەرێشانم
ئەترسم حەل نەبێ جارێ، خودایا موشکڵم چ بکەم
لە سایەی خاری هیجرت دامەنم پڕ گوڵ لە ئەسرینە
ئەگەر گاهێ دەناڵم لێم مەڕەنجێن بولبولم چ بکەم
بڵێم چی دەهری دوون گەر چاوی ئینعامی بە ئەنعامە
نییە خۆ غەیری فرمێسک و هەناسە حاسڵم چ بکەم
بڵا با مامە سۆفی ئاگرم تێ بەر نەدا وەعزی
سرشتەی عیشقی خووبانە ئەمن ئاب و گڵم چ بکەم
ئومێدی دیدەنی یارم هەیە تاهیر لەمەو پاشیش
خەریکی نەزم و تەرتیبی خەیاڵی باتڵم چ بکەم
2
پێنجخشتەکی لەسەر غەزەلێکی مەحوی
نیساری ڕێی کەسێ سەد گەوهەری یەکتا نەکەم چ بکەم
بە شەمسێ مانگی دڵ پڕشوعلە و ئیحلا نەکەم چ بکەم
لە قاپی پیری مەیخانە دەمێ هانا نەکەم چ بکەم
(بە نووری بادە کەشفی زوڵمەتی تەقوا نەکەم چ بکەم
بە شەمعێکی وەها چاری شەوێکی وا نەکەم چ بکەم)
سەحیفەی خاترم تۆماری ئالام و سووەیدایە
بە باڵام کیسوەتی غەم وەک خەڵاتێکی سەراپایە
هەزاران گەنجی خانەی ڕەنجی هیجری دڵبەرم لایە
(لە خەزنەی دڵمەدا هەر چی هەیە، هەر داغی سەودایە
دەسا ئەم نەقدە دەردی عیشقی پێ سەودا نەکەم چ بکەم)
بە مەستی شوهرە نابی تا نەگەیتە مەرتەبەی خەممار
مەدەد بگرە لە عیشوەی چاوەکانی حەزرەتی دڵدار
خیلافی عیشقە عوجب و خۆپەرستی و کیبر و عەیب و عار
(لەگەڵ دەستی مەلا ڕێ ناکەوێ زونناری زوڵفی یار
وەکوو شێخ ئیختیاری مەزهەبی تەرسا نەکەم چ بکەم)
دەریغا سەیلی غەم نەیهێشت لە هەستیم نوون و ئاسارێ
تەبیبی دەردی دڵ نەیبیست دەمێ ناڵینی بیمارێ
لە پڕشەی خوێنی من خۆی لا ئەدا ڕەندی جەفاکارێ
(لەڕێی ئەو شۆخەدا خۆم کرد بە خاک پێی پیا نەنام جارێ
دەسا خاکی هەموو عالەم بەسەر خۆما نەکەم چ بکەم)
زەمانێکە کە ئاشوفتەی نیگاهت مەست و مەدهۆشە
عەزیزم ڕۆزگارێکە کە خۆشم لا فەرامۆشە
دڵا بێ سوودە دانیشتن لە ئەم سووچ و لە ئەو گۆشە
(دەمێکە شاری پڕشۆری موحەببەت مات و خامۆشە
بە قانوونی تەجەننون شۆڕشێ ئینشا نەکەم چ بکەم)
دڵم پڕ مەینەتە شادیم غەمی دووری لە پێی سەریە
ویساڵم وەسوەسەی هیجرە خەیاڵم عیشقی تۆ بەریە
فیدای سایەی هومایێکم کە عالەم شێتی سێبەریە
(لە چاوانم نەما بۆ گریە، نۆبەی سەجدە بەر دەریە
سیاساڵم نەبارە، نوێژی ئیستسقا نەکەم چ بکەم)
ڕەفیقی هەمدەمم ئاهە شەرابی عیشرەتم دەمعە
غوڵامی سووتن و تاوانەوەم پەروانە و شەمعە
لە تەعنەی ناکەسان بیستن عوقوولم (قاصرالسَمع)ە
(لەسەر تۆم دوشمنە دنیا، قەزییەم (مانع الجَمعە)
کە تەرکی تۆ نەکەم، تەرکی هەموو دنیا نەکەم چ بکەم)
ئەیا ئەشکی جەفای جانان بە کوڵ جارێ لەسەر ڕوو بە
ئەیا بەختی ڕەشم وەک زوڵفەکەی پڕ پێچ و واروو بە
دڵی زارم! لە کونجی سینەدا بێ دەنگ و نووستوو بە
(بەجێماوم لە یاران، نابەجێ ماوم، ئەجەل، زوو بە
بە مردن لەم قوسووری ژینە ئیستعفا نەکەم چ بکەم)
لە مەکتووبی دڵمدا غەیری دەرد و غەم نییە (مەطوي)
لە تەگبیری ژیانمدا جەماڵی دڵبەرە (مەنوي)
بە مەیلت فانییە (تاهیر) مەکەن یاران خەیاڵی وی
(ئەوا لەیلا بە ڕۆژی حەشر ئەدا وادەی لیقا (مەحوی)
هەتا قامی قیامەت ئاﮪ و واوەیلا نەکەم چ بکەم [1]